Ձեր վստահելի աղբյուրը

Երևանի ավագանու նիստում քաղաքապետ Հրաչյա Սարգսյանն ասաց, որ տեղյակ է Արցախում առկա խնդիրներին, կապի մեջ է Ստեփանակերտի իր գործընկերոջ հետ։

«Այս պահի դրությամբ, որպես այդպիսին, աջակցության կարիք չկա: Եթե անհրաժեշտություն լինի, իհարկե, պատրաստակամ ենք մեր հայրենակիցներին օգնելու, աջակցելու: Այդ հարցը գտնվում է նաև կառավարության ուշադրության ներքո, ակտիվ զբաղվում են կառավարության մե8 գործընկերները»,- նշեց նա։

Ավագանու անդամ Թեհմինա Վարդանյանն անդրադառնալով նույն խնդրին՝ ասաց. «Ամենայն հարգանքով բոլոր հուշատախտակների, փողոցների անվանակոչությունների նախագծերի հանդեպ, բայց մենք այսօր օրակարգում չունենք կարևորագույն մի հարց, որը վերաբերում է Արցախում տիրող վիճակին: Ստեփանակերտը Հայաստանի երկրորդ մայրաքաղաքն է, իսկ մենք որևէ կերպ որևէ միջոց չենք ձեռնարկում նրանց աջակցելու համար։ Ասում եք՝  կառավարությունը խնդրին տեղյակ է, մենք խոսել ենք, աջակցության կարիք չունեն։

Ինչ ասել է՝ աջակցության կարիք չունեն։ Այդ մարդիկ տաք ճաշ ուտելուց սկսած ամեն ինչի կարիք ունեն: Առաջարկում եմ փոքրիկ էլեկտրական տաքացուցիչներ, էլեկտրական գազօջախներ, սնունդ, ցանկացած բանով օգնել: Մենք այսօր այստեղ ծաղիկ ենք նկարում, բանտիկներից ենք խոսելու, բայց այնտեղ կա լուրջ խնդիր, ու մենք որևէ հոդվածում գումար չենք նախատեսում: Սա ինչի՞ մասին է խոսում: Արցախի բնակիչներն այս հոգեբանորեն  ճնշված պահին պետք է զգան Երևանի ու երևանցու ուժը: Այնտեղ իսկապես սարսափելի վիճակ է։ Ուզում եմ հասկանալ՝ ի՞նչ միջոցներ ենք ձեռնարկել, ինչ խնդիրներ կարող ենք լուծել»:

Հրաչյա Սարգսյանը վստահեցրեց, որ Երևան համայնքը, պետությունը միշտ կանգնած է եղել Արցախի թիկունքին:

«Մենք պատրաստ ենք աջակցություն ցուցաբերել մեր գործընկերներին: Եթե կան նմանատիպ խնդիրներ, կարող ենք քննարկել, կարող ենք արտահերթ նիստ հրավիրել և համապատասխան ֆինանսական միջոցներ ուղղել, որպեսզի կարողանան մեր հայրենակիցներն իրենց խնդիրները լուծել: Բայց այն խնդիրները, որոնք բարձրացրեցիք, անկեղծ ասած, տեղյակ չեմ, որ իրենք դրա անհրաժեշտությունն այս պահին ունեն։ Այո, խնդիր կա, բայց ձեր թվարկածները չկան»,- ասաց Հ.Սարգսյանը: