Ձեր վստահելի աղբյուրը

Վարդենիս խոշորացված համայնքի ավագանին 14 կողմ, 13 դեմ ձայներով համայնքապետ ընտրեց Ահարոն Խաչատրյանին։ Նրա թեկնածությունը պաշտպանեցին «Ահարոն Խաչատրյան» և «Միասնական Վարդենիս» խմբակցությունները: 

Ավագանու «Քաղաքացիական պայմանագիր» խմբակցությունը համայնքապետի թեկնածու չառաջադրեց: ՔՊ-ն, որն ուներ 13 մանդատ, դեմ քվեարկեց Խաչատրյանի թեկնածությանը  և խմբակցության անդամները դուրս եկան դահլիճից։ 

Քվեարկությունից հետո ՔՊ խմբակցության ներկայացուցիչն ասաց, որ օրենքով տրվել է հնարավորություն փոքր խմբակցությունները միավորվեն, իրենք դրա հետ բացարձակ չեն համակերպվում. «Մեր ընտրողները դեմ են նման լուծմանը, մենք էլ նրանց հետ դեմ ենք»։

ՔՊ խմբակցության ղեկավար Արամ Մելքոնյանի խոսքով, երեք դաշինք է մասնակցել ընտրություններին, բացահայտ առավելությամբ ձայներ են ստացել իրենք, օրենքի բացի պատճառով ժողովրդի մեծամասնության քվեն ստացած խմբակցությունը դուրս է գալիս այստեղից և մնացածը թողնում է մյուս երկու խմբակցությունների վրա։

Նորընտիր քաղաքապետ Ահարոն Խաչատրյանը լրագրողների հետ զրույցում շնորհակալություն հայտնեց իրեն ընտրողներին ու չընտրողներին. «Ոչ մի տարբերություն չկա՝ ով է ինձ ընտրել, ով՝ ոչ։  Բոլորն ինձ համար իմ վարդենիսցիներն են, աշխատելու եմ ամեն ինչ անել ի շահ  մեր Վարդենիսի, ի շահ մեր ազգաբնակչության։

Ինձ համար ամենակարևորը՝ եթե մարդն աշխատող է ի օգուտ մեր համայնքի, կմնա ու կաշխատի։  Ես էլ մեծ սիրով աշխատելու եմ իշխանությունների հետ։ Կարծում եմ՝  ամեն մի իշխանություն ուրախ կլինի, որ համայնքի ղեկավարն իր ծրագրերը ներկայացնի ի շատ այդ համայնքի»։ 

Նա նշեց, որ ինչ պահանջում է օրենքը, արել է դա։ 

2021-ի դեկտեմբերի 5-ին Վարդենիսում կայացած ՏԻՄ ընտրություններում ավագանու 27 մանդատներից 13-ն ստացել էր ՔՊ-ն, 10 մանդատ ստացել էր «Ահարոն Խաչատրյան» դաշինքը և 4 մանդատ՝ «Միասնական Վարդենիս»-ը:

Դեկտեմբերի 30-ին համայնքապետարանում տեղի 18 ունեցel  ավագանու առաջին նիստը, ոհամայնքի ղեկավար էր ընտրվել Ահարոն Խաչատրյանը։ Ավագանու ՔՊ-ական անդամները հայտարարել էին, որ այդ նիստը տեղի է ունեցել օրենքի խախտումով, իրենք տեղեկացված չեն եղել նիստի մասին: Քպ-ականները դատարան հայց էին ներկայացրել՝ պահանջելով անվավեր ճանաչել դեկտեմբերի 30-ի ավագանու նիստը, որի ընթացքում համայնքի ղեկավար էր ընտրվել Ահարոն Խաչատրյանը։

Վարչական դատարանը փետրվարի 2-ին մասնակի բավարարել էր ավագանու «Քաղաքացիական պայմանագիր» խմբակցության անդամների հայցը և անվավեր ճանաչել որոշումը, որով համայնքի ղեկավար էր ընտրվել Ահարոն Խաչատրյանը։