Ձեր վստահելի աղբյուրը

«Մենք առաջարկեցինք և կառավարությունը պաշտպանեց, որ մինչև 1 մլն դրամ արժեքով ապրանքների արտահանման ժամանակ մաքսավճար չվճարվի, ասեմ, որ այստեղ խոսքը գնում է մոտ 100 մլն դրամի բյուջեից վնասի մասին»,- Տնտեսական հարցերի մշտական հանձնաժողովում հայտնեց էկոնոմիկայի նախարար Վահան Քերոբյանը՝ ներկայացնելով «Պետական տուրքի մասին» օրենքում փոփոխություններ կատարելու մասին կառավարության հեղինակած օրինագիծը:

Նախարարի խոսքով՝ նախագիծը գործադիրում անվանում են «Վոլտերմենի» նախագիծ, որը կապված է նույնանուն դրամապանակի հետ, քանի որ այս փոփոխությունն առաջարկվել է հենց դրանք արտադրող ընկերության կողմից:

«Խնդիրը կայանում է նրանում, որ «Վոլտերմենը» և այլ ընկերություններ ինտերնետով ապրանք վաճառելուց Հայաստանից արտահանելիս բախվում են այն խնդրին, որ նույնիսկ շատ փոքր գումարի ապրանք արտահանելու համար ստիպված մաքսավճար էին վճարում, որը որոշ դեպքերում կարող է նույնիսկ գերազանցել ապրանքի արժեքը և այդ գործարքն էլ ժամանակատար է»,-բացատրեց նախարարը և հավելեց. «Օրինակ Վոլտերմեն դրամապանակի միջին արժեքը 250 դոլարին համարժեք դրամ է, նրա մաքսային ձևակերպումը մի քանի օր է տևում և Հայաստանից աշխարհի վրա բիզնես անելը դարձնում է շատ մեծ գլխացավ և պրոբլեմատիկ, այդ պատճառով էլ մենք հանդես եկանք նման առաջարկով»։

Վահան Քերոբյանի խոսքով՝ այս արգելքը վերացնելով էապես կբարելավվի Հայաստանից փոքր ապրանքների արտահանման ծավալները:

Տնտեսական հարցերի մշտական հանձնաժողովի նախագահ Վահե Հակոբյանը հետաքրքրվեց, թե 1 մլն շեմը ինչի հիման վրա է սահմանվել:

Էկոնոմիկայի նախարարը պարզաբանեց, որ ուսումնասիրել են արտահանումների ծավալները և բաշխվածությունը և պարզել, որ արտահանվող մանրածախ ապրանքների գոմարը 1 մլն դրամը հազիվ թե գերազանցեն:

«Մենք բոլորս գիտենք, թե մեր բիզնեսմեններն ինչպիսի ճկուն մտածողություն ունեն, հետևաբար՝ իրենց արտահանվող ապրանքը կմասնատեն և բյուջեին հասցվող 100 մլն դրամ վնասը մյուս տարվա վերջում կդառնա 3 մլրդ»,- իր մտահոգությունը հայտնեց ՔՊ պատգամավոր Հովիկ Աղազարյանը և հետաքրքրվեց, թե այդ դեպքում ո՞վ է պատասխան տալու:

Վահան Քերոբյանը պատասխանեց որ արտահանման հարցում Հայաստանը արտոնություններ է սահմանել և ընդհանուր արտահանման մաքսատուրքերն անգամ չեն հասնում 3 միլիարդ դրամի:

ՔՊ պատգամավոր Ծովինար Վարդանյանն էլ հետաքրքրվեց, թե հնարավոր է, որ այդ արտոնությունը փոքր բիզնեսին առավելություն տա խոշորի հանդեպ:

Վահան Քերոբյանը պատասխանեց, որ նման բան հնարավոր չէ, քանի որ միջազգային շուկայում նման խոշոր հայկական ընկերություն չկա:

Հանձնաժողովի նախագահ Վահե Հակոբյանը, փորձեց ավելի դետալային ներկայացնել Ծովինար Վարդանյանի հարցը:

Քերոբյանը նկատեց, որ Վահե Հակոբյանը բիզնեսից է եկել, դրա համար է այդ հարցը շեշտադրում և զարմանք հայտնեց, որ հանձնաժողովում նման հարցեր են քննարկվում:

«Այստեղ բարձրացվող հարցերը, զարմանալի չէ, որ քննարկվում են, վատ բան չեղավ, ուղղակի նման գնահատական չարժի տալ»,- արձագանքեց Վարդանյանը:

Անդրադառնալով Քերոբյանի խոսքին՝ Վահե Հակոբյանն էլ ասաց.«Այո, ես բիզնեսից եմ եկել, դրա համար էլ մենք տարբեր լեզունեով ենք խոսում»:

Նախաձեռնությունը ներկայացնելիս Քերոբյանն ընթերցեց ամբողջ նախագիծը, որում ասվում է.

«Պետական տուրքից ազատվում են՝

1) Հայաստանի Հանրապետության տարածք մարդասիրական օգնության և բարեգործական ծրագրերի շրջանակներում ներմուծվող ապրանքները: Օրենսդրությամբ (այդ թվում՝ միջազգային պայմանագրերով) ուղղակիորեն նշված չլինելու դեպքում ծրագրի տարբերակումն ըստ բնույթի որակում է վարչապետի ստեղծած՝ բարեգործական ծրագրերի համակարգման խորհրդակցական հանձնաժողովը.

2) միջազգային կանոնավոր փոխադրումներ իրականացնող տրանսպորտային միջոցները՝ այդ փոխադրումների իրականացման ժամանակ.

3) ֆիզիկական անձանց կողմից առանց մաքսատուրքերի և հարկերի վճարման կամ մաքսատուրքերի և հարկերի վճարումից ազատմամբ՝ Հայաստանի Հանրապետության պետական սահմանով տեղափոխվող անձնական օգտագործման ապրանքները.

4) անհատ ձեռնարկատեր չհանդիսացող ֆիզիկական անձանց կողմից Հայաստանի Հանրապետության սահմանով տեղափոխվող՝ Միության անդամ պետություններում հաշվառված թեթև մարդատար տրանսպորտային միջոցները.

5) ցուցադրման նպատակով «Ժամանակավոր արտահանում» կամ «Ժամանակավոր ներմուծում» մաքսային ընթացակարգերով ձևակերպված, ինչպես նաև դրանց ժամկետի ավարտից հետո համապատասխանաբար «Վերաներմուծում» և «Վերաարտահանում» մաքսային ընթացակարգերով վերաձևակերպված՝ Հայաստանի Հանրապետությունում սահմանված կարգով գրանցված կամ գրանցման ենթակա մշակութային արժեքները.

6) մեկ առաքողից մեկ ստացողին մեկ տրանսպորտային փաստաթղթով Հայաստանի Հանրապետության սահմանով տեղափոխվող (բացառությամբ՝ արտահանվող, այդ թվում՝ ԵԱՏՄ անդամ երկիր)՝ ընդհանուր մաքսային արժեքը 200 եվրոյին համարժեք գումարը չգերազանցող գումարի չափով ապրանքները:

7) մեկ առաքողից մեկ ստացողին մեկ տրանսպորտային փաստաթղթով Հայաստանի Հանրապետության սահմանով արտահանվող, այդ թվում՝ ԵԱՏՄ անդամ երկիր՝ ընդհանուր մաքսային արժեքը 1.0 միլիոն ՀՀ դրամը չգերազանցող գումարի չափով ապրանքները:

8) «Հրաժարում՝ հօգուտ պետության» մաքսային ընթացակարգով ձևակերպվող ապրանքները»:

Հանձնաժողովը հաստատեց նախագիծը ԱԺ օրակարգ ընդգրկելու որոշումը: