Ձեր վստահելի աղբյուրը

«Պատիվ ունեմ» խմբակցության պատգամավոր Տիգրան Աբրահամյանը «Հայելի» մամուլի ակումբում դիտարկեց ՀՀ-ի սահմանին, Արցախում տեղի ունեցած իրադարձությունները և անդրադարձավ անվտանգային հիմնահարցերին:

Այն խաղաղությունը, որի մասին խոսում է այս իշխանությունը՝ իրականում նոր պատերազմի և նոր կապիտուլյացիայի մասին է

«Իրականության մեջ «խաղաղություն» բառը շատ ականջահաճո է և մարդկանց թվացյալ հանգստության կամ կայունության մասին է հիշեցնում, բայց այն խաղաղությունը, որի մասին խոսում է այս իշխանությունը՝ իրականում նոր պատերազմի և նոր կապիտուլյացիայի մասին է, որովհետև հռչակված խաղաղության դարաշրջանից հետո ՀՀ ինքնիշխան տարածքը հետպատերազմյան ժամանակահատվածում արդեն երրորդ անգամ հարձակման և ագրեսիայի է ենթարկվում: Հարձակման է ենթարկվում այս իշխանությունների հանցավոր անգործության և անվտանգության համակարգում ոչ բավարար միջոցառումների իրականացման պայմաններում:

Վերջին տեղեկատվությունը կապկված է Սյունիքի մարզի Ներքին Հանդ գյուղի հետ և ուշագրավ է, որ այդ մասին տեղեկացնում են ոչ թե իշխանությունները, պետական  համապատասխան մարմինները, այլ դրա մասին քարտեզներով և փաստական տվյալներով նախ ահազանգեր հնչեցրեց նախկին ՄԻՊ Արման Թաթոյանը, քաղաքագետներ էդգար Էլբակյանը, Ալվինա Աղաբաբյանը, այսօր էլ այդ մասին խոսել է Կապան խոշորացված համայնքի ղեկավար Գևորգ Փարսյանը, որը, ըստ էության, հաստատել է, որ իրականության մեջ ադրբեջանական զորքերը 800 մետրից 1 կմ հատվածով ներխուժում են ապահովել Սյունիքի մարզի Ներքին Հանդ բնակավայրի ուղղությամբ, որը լուրջ խոչընդոտ է առաջացրել նաև այդ ուղղությամբ տեղակայված հայկական բնակավայրի բնականոն կյանքի ապահովման ուղղությամբ: Ես դեռ չեմ խոսում անվտանգային իրավիճակի և սպառնալիքների մասին: Այսօր մենք, ցավալիորեն խոսում ենք մեր սահմանամերձ համայնքների բնակիչների ապրելու, կյանքի էլեմենտար պայմանների մասին: Սա տեղի է ունենում այն ժամանակ, երբ ՀՀ իշխանությունները հայտարարել են խաղաղության դարաշրջանի բացման մասին:

Ներքին Հանդի հետ կապված երկու հանգամանք կա՝ ինչու չի ապահովվել անվտանգային համակարգը՝ անկախ նրանից, թե որ զորքերն այն կապահովեին, որը կկանխեր ադրբեջանցիների ներխուժումը ՀՀ տարածք, և ո՞վ է պատասխանատու դեռևս 2021 թվականին նույնանման զավթողական ներթափանցումների համար, որովհետև մինչև հիմա որևէ մեկը պատասխանատվությու չի կրել: 2021 թ. նոյեմբերին ադրբեջանական ագրեսիայից հետո միայն մի քանի ցածր պաշտոնի զինվորականների նկատմամբ քրեական գործեր հարուցվեցին, իսկ այն պատասխանատվության խնդիրը չի լուծում, որովհետև այստեղ, ոչ թե կոնկրետ մարտական դիրքում ծառայություն իրականացնողների խնդիրն է, այլ ռազմաքաղաքական  ղեկավարության՝ վերին էշելոններում կանգնածների քաղաքական, ռազմական և բարոյական պատասխանատվության հարցն է»,-հայտարարեց ԱԺ ընդդիմադիր պատգամավորը:

Նրանց իրական նպատակը Սյունիքի ճեղքումն է և ուղիղ կապի ապահովումը Ադրբեջանի, Նախիջևանի և Թուրքիայի միջև

Անդրադառնալով ՀՀ ԶՈւ ԳՇ-ում տեղի ունեցող գործընթացներին՝ Աբրահամյանն ասաց. «Այս իրականության մեջ այն, ինչ ասում է Նիկոլ Փաշինյանը և իր քաղաքական թիմի տարբեր ներկայացուցիչներ, պետք  է հասկանա ճիշտ հակառակը: Այս իրավիճակում մենք ցավալիորեն ընկած ենք այն ողբերգական իրադարձությունների մեջ, որոնք 2018 թվականին այս ուժի իշխանության գալուց հետո կախված է մեր ժողովրդի գլխին:

Այն մարդիկ, ովքեր քողարկում են ճշմարտությունը, մեր հայրենիքի տարբեր հատվածների նկատմամբ ոտնձգությունները, իրականում նրանք այդ ամենի համար պատասխանատվություն են կրում: Մենք փետրվար ամսից խոսում ենք այն մասին որ ՀՀ ԶՈւ ԳՇ-ում ճգնաժամ է ստեղծված: Արդեն մեկ ամիսը լրանում է, որ ՀՀ ԳՇ-ն պետ չունի: Ովքեր ասում են, թե պաշտոնակատար կա՝ թող գնան այդ հեքիաթներն իրենց տներում պատմեն, որովհետև մարդիկ, ովքեր տիրապետում են ռազմական գործին, գիտեն, թե ինչ է նշանակում տվյալ պաշտոնում պաշտոնակատարը և՝ ԳՇ պետ: Միաժամանակ ԳՇ-ում խոշոր փոփոխություններ են տեղի ունենում, այդ թվում՝ նաև կադրային, ինչը նման լարվածությունների պայմաններում անթուլատրելի է, որովհետև ԶՈւ ԳՇ-ն պետք է ժամացույցի ճշտությամբ աշխատող համակարգ լինի: Այս իրավիճակում նման հրատապ կարգով արագ փոփոխությունները, որևէ ձևով չեն կարող նպաստել մեր անվտանգության ապահովմանը: Այսօր Սյունիքում ևս մեկ խոցելիություն ապահովելով՝ ՀՀ իշխանությունները շատ ավելի են մոտեցնում թուրք-ադրբեջանական այն հավակնություններն ու մտադրությունները, որի մասին հայտարարվել է: Այստեղ խոսքը չի գնում միայն միջանցքի մասին, այն, միգուցե, կարճաժամկետ կտրվածքով է Թուրքիայի և Ադրբեջանի նպատակը: Նրանց իրական նպատակը Սյունիքի ճեղքումն է և ուղիղ կապի ապահովումը Ադրբեջանի, Նախիջևանի և Թուրքիայի միջև:Այդ պայմաններում ՀՀ իշխանությունները ոչ միայն լուռ են այլ զբաղված են իրենց թիմակիցներին պաշտոններ բաժանելով, արտոնություններ տալով, որովհետև այդ մարդկանց համար այս կյանքում կարևորը փողն է, արտոնությունը, պաշտոնը և նրանցից որևէ սպասելիք այսօր էլ չկա»:

Արցախում 10 օր է գազամատակարարում չկա և այս պայմաններում Հայաստանում ինչ-որ ծաղրածուներ են տարբեր պաշտոններում նշանակվում

«Հասարակությունը պետք է իրականությունը տեսնի այնպես, ինչպես կա: Այն սուտը, մանիպուլյացին և այն տոտալ սուտը որը բերվում՝ հրամցվում է մեր հասարակությանը ողբերգությունը դրա մեջ է: Հայաստաում կան մարդիկ, որոնք ոչ պատկերացնում են մեր իրական կորուստները, որոնք պատերազմից հետո ունեցել ենք Արցախում, ոչ պատկերացնում են իրական հետևանքները, որը մենք ունեցել ենք ՀՀ-ում, ոչ էլ ամբողջական պատկերացում են կազմում այն ամենից, ինչի մասին այսօր խոսում ենք: Իշխանությունն օգտագործելով մեդիատարածքում իր հսկայական հնարավորությունները՝ օրակարգային փոփոխությունները և իրականությունը  խեղաթյուրված ձևով հրամցնում են հանրության այն հատվածին, որը դեռևս հավատում է, կամ մանիպուլյացիաների ազդեցության տակ է: Նույն վիճակում են նաև Արցախի հայրենակիցները, որոնք արդեն 10 օր առանց գազամատակարարման են մնացել: Արցախում առաջացել են ենթակառուցվածքային խնդիրենր, հիվանդանոցները մանկապարտեզները, ծննդատները մնացել են առանց գազի: Այս պայմաններում Հայաստանում ինչ-որ ծաղրածուներ են տարբեր պաշտոններում նշանակվում, ինչ-որ պաշտոնական արարողություներ են արվում: Ճենք կարող մենք թքած ունենանք Արցախում մեր հայրենակիցների վրա: Այսօր այդ հարվածները արցախցիների, սյունեցիենրի նկատմամաբ է, վաղը լինելու է գյումրեցիների, տավուշցիների, բոլորիս նկատմամբ»,-Արցախում ստեղծված իրավիճակը ներկայացրեց ընդդիմադիր պատգամավորը: