Ձեր վստահելի աղբյուրը

Հինգշաբթի օրը կայացած ճեպազրույցում ՌԴ ԱԳՆ խոսնակ Մարիա Զախարովային հարցրել են.

«Ավելի քան մեկ շաբաթ է, ինչ Արցախի Հանրապետությունում հումանիտար աղետ է՝ ադրբեջանական կողմից գազատարը պայթեցնելու նաև Ադրբեջանի իշխանությունների՝ դրա վերանորգումը խոչընդոտելու հետևանքով։ Հանրապետությունում գազ չկա, ցուրտ եղանակի ֆոնին էլեկտրաէներգիայի հետ կապված մեծ խնդիրներ կան: Բացի այդ, ադրբեջանցի զինծառայողները պարբերաբար գնդակոծում են Արցախի գյուղերը՝ հրազենային զինատեսակներով և նույնիսկ ականանետերով, մի շարք գյուղերի բնակիչներից պահանջում են լքել իրենց տները՝ խախտելով 2020 թվականի նոյեմբերի 9-ի եռակողմ հայտարարության պահանջները։

Ինչպե՞ս է Ռուսաստանը վերաբերվում Բաքվի այս գործողություններին, և ի՞նչ է արվում Արցախի Հանրապետության բնակիչների անվտանգությունն ապահովելու և բնական գազամատակարարումը վերականգնելու համար»։

«Այո, մենք մտահոգված ենք այս տարածաշրջանում և հայ-ադրբեջանական սահմանի որոշ հատվածներում ստեղծված իրավիճակով։ Մարտի սկզբից մենք արձանագրում ենք հրադադարի կանոնավոր խախտումներ։ Ռուսական խաղաղապահ զորախումբն իր պատասխանատվության գոտում համապատասխան միջոցներ է ձեռնարկում կայունությունն ապահովելու և իրավիճակը վերահսկելու համար, և այդ ջանքերի շնորհիվ մարտի 13-ից ի վեր զինված միջադեպեր չեն գրանցվել։

Ինչ վերաբերում է հիշատակված սահմանային խնդրին, ապա մենք կողմ ենք, որ դրա սահմանազատման գործընթացը հնարավորինս շուտ սկսվի՝ համապատասխան երկկողմ հանձնաժողովի ստեղծմամբ»,- պատասխանել է Զախարովան։

ՌԴ ԱԳ խոսնակը նաև հավելել է. «Մենք տեղյակ ենք գազատարի վթարի հետ կապված ծանր հումանիտար իրավիճակից, այդ խնդիրը լուծելու համար կապի մեջ ենք երկու կողմերի՝ Հայաստանի և Ադրբեջանի հետ։ Մեր դիրքորոշումն այն է, որ պետք է խուսափել քայլերից, որոնք խնդիրներ կստեղծեն խաղաղ բնակիչների համար և կվատացնեն առանց այն էլ ծանր հումանիտար իրավիճակը։ Մենք այս ուղղությամբ աշխատում ենք միջազգային և արտաքին քաղաքական այլ ոլորտներում իրավիճակի զարգացումներից անկախ և դրանց դինամիկայից դուրս։ Մեզ համար նշված տարածաշրջանում իրավիճակի կարգավորումն առաջնահերթություն է, և դա գիտակցում են բոլոր կողմերը»։