Ձեր վստահելի աղբյուրը

Կառավարության նիստից հետո ՀՀ ՄԻՊ Քրիստինե Գրիգորյանը պատասխանեց լրագրողների հարցերին:

Ես հարգանքով եմ վերաբերում իմ կոլեգայի՝ պարոն Թաթոյանի հանրային գործունեությանը

Արձագանքելով Ներքին Հանդ գյուղում ստեղծված իրավիճակի վերաբերյալ ՄԻՊ գրասենյակի գործողությունների և այդ հարցում Արման Թաթոյանի հետևողական աշխատանքի վերաբերյալ դիրքորոշմանն առնչվող հարցին՝ Քրիստիննե Գրիգորյանն ասաց.

«Ներքին Հանդի հետ կապված մամուլի և սոցիալական ցանցերում կատարված հրապարակումներին ծանոթ եմ: Այս պահին էլ մեր արագ արձագանքման խումբը ճանապարհին է՝ տեղում ուսումնասիրություն կատարելու համար: Արագ արձագանքման խմբի առաջ դրված է խնդիր՝ տեղում հասկանալու համայնքի բնակիչների կյանքի պայմանների, անվտանգության հետ կապված ինչպիսի խնդիրներ կան, դրանք կարձանագրենք:

Այս ընթացքում կապի մեջ ենք եղել պաշտապանության գերատեսչության, տեղական ինքնակառավարման մարմինների իմ կոլեգաների հետ: Մեր հետևությունները կհրապարակայնացնենք և ըստ այդմ առաջարկությունները կներկայացնենք:

Սյունիք այց պլանավորում եմ, բայց եթե նման դեպքեր լինում են՝ մեր արագ արձագանքման խմբերը մեկնում են: Ապրիլին եմ պլանավորում այցելել Սյունիք, իսկ այս ընթացում մենք այցի բովանդակության և թիրախավորման ուղղությամբ ենք ուսումնասիրություն կատարում, տեղեկատվություն եմ հավաքում բազային ստորաբաժանումից և ըստ այդ տեղեկության, բնականաբար այց լինելու է  և արդյունքներով կիսվելու եմ:

Ես հարգանքով եմ վերաբերում իմ կոլեգայի՝ պարոն Թաթոյանի հանրային գործունեությանը:

Մարդու իրավունքների պաշտպանը պատասխանեց նաև Արցախ կատարած իր այցի արդյունքների վերաբերյալ հարցին:

«Այցի ժամանակ ես հանդիպել եմ Արցախի նախագահի, պետական նախագահի, իմ կոլեգա՝ պարոն Ստեփանյանի, ԱՀ գլխավոր դատախազի, ԱՀ ԱԺ ղեկավարների և խմբակցություների նախագահների հետ: Ստացած ուղերձները շատ կարևոր էին ինձ համար և տեղում խնդիրներին ծանոթանալու, Արցախի պաշտոնական դիրքորոշումները լսելու առիթ էին: Այցի ընթացքում առիթ եմ ունեցել լինել Խարմորթ գյուղում, շփվելու բնակիչների հետ և պետք է ասեմ, որ այցից դեռևս երկու շաբաթ առաջ սկսվել էր բարձրախոսերով հոգեբանական ճնշումներ գործադրելու  գործընթացը և շատ խիստ մտահոգիչ էր այն իրավիճակը, որ տեսա այնտեղ: Նկատի ունեմ բնակչության հոգեբանական վիճակը:

Այցից հետո, ցավալիորեն, ունեցանք շատ ավելի լուրջ զարգացումներ՝ ինտենսիվ կրակոցներ՝ նաև մեծ տրամաչափի զենքերով, նաև գազի անջատման և էլեկտրաէներգիայի ընդհատումներ: Անտանելի հումանիտար իրավիճակներ:

Այցի ընթացքում հանդիպումներ եմ ունեցել տեղահանված բնակիչների ժամանակավոր կացարաններում բնակվողների հետ: Նման կացարաններից մեկում առիթ եմ ունեցել տեսնել, թե ինչպիսի պայմաններում են մարդիկ ապրում: Եթե հոգեբանական վիճակը կարելի է գնահատել, որ մարդիկ ամեն ինչ գիտակցում են, այն իրենց հողն է, վերադարձել են իրենց հող, բայց մյուս կողմից կան կոնկրետ խնդիրներ, օրինակ՝ բնակարանաշինության: Ուրախալի է որ ԱՀ իշխանությունների կողմից մեծ բնակարանաշինության ծրագիր է իրականացվում, կարծեմ՝ ՀՀ կառավարության աջակցությամբ:

Կային նաև զբաղվածության, սոցիալական ինտեգրման, երեխաների ադապտացման խնդիրներ: Այցի արդյունքում հետևություններս այն են, որ Ադրբեջանակն կողմից ճնշման, ահաբեկման, հայաթափման քաղաքականությունը շարունակական է, այս ընթացքում ցուրտ պայմաններում գազի անջատումը և տևական ժամանակ վերականգնողական աշխատանքներ թույլ չտալը ևս մեկ  ապացույցներ էին, որ սա ուղղակիորեն մեկ կետից կառավարվող քաղաքականություն է՝ նպատակը պարզ է՝ Արցախի էթնիկ զտում և հայաթափում»:

Մեղմ ասած՝ ադրբեջանական կողմից անկեղծ չեն

Պատասխանելով հարցին, թե այդ պայմաններում ինչպես է պատկերացնում կողմերի միջև խաղաղության հաստատման գործընթացը՝ ՄԻՊ-ը պատասխանեց. «Մարդու իրավունքի պաշտպանի տեսանկյունից որևէ պաշտպան չի կարող ասել, որ խաղաղությունը վատ բան է, սա բոլորիս կոնսենսուսն է: Բայց որպես պաշտպան իմ մտահոգությունն այն է, որ խաղաղության խոսակցությունները,  դրա կամարտահայտումները պետք է ապահովագրված լինեն նաև այլ գործողություններով: Այս պահին պետք է արձանագրեք, որ վերջին երկու շաբաթվա իրադարձությունները և էսկալացիաները՝ ներառյալ հումանիտար վիճակի լարվածությունը ցույց են տալիոս, որ խաղաղության խոսակցությունների համար ուղղակի միջավայր չկա, գործողություններ չկան և դրանք, մեղմ ասած՝ ադրբեջանական կողմից անկեղծ չեն»:

Վիրավորանքը քրեականացնող կետի պրակտիկայի մասով խնդիրներ կան

Լրագրողներից մեկը հիշեցրեց, որ ժամանակին Քրիստիննե Գրիգորյանը ԱԺ-ում պաշտպանել է Քրեական օրենսգրթի 137 կետով վիրավորանքը քրեականացնող կառավարության օրինագիծը և հարցրեց, թե արդյոք պատրաստվում է ՍԴ-ից հետ վերցնել այդ օրենքի սահմանադրականությունը վիճարկող Արման Թաթոյանի դիմումը:

«Այն եղել է կառավարության դիրքորոշումը, որը ես ներկայացրել եմ ԱԺ-ում: Ես ընտրվելիս և դրանից հետո բազմիցս ասել եմ, որ իմ նախորդի որևէ դիմում, որը ներկայացվել է ՍԴ, հետ չեմ վերցնելու: Նախագծի կարգավորումների և պրակտիկայի հետ կապված դիտարկումները ցույց են տալիս. որ ունենք ոչ միանշանակ ընկալում և գործածության հետ կապված խնդիրներ և ՍԴ ներկայացված դիմումն լավ առիթ է, որ անդրադառնան հարցին և քաղաքականության մշակողների կողմից կատարեն հետևություններ և ես էլ իմ ուշադրության կենտրոնում եմ պահելու: Հոդվածի հետ կապված մի քանի դեպքերով մենք ուղղակիորեն մոնիթորինգ ենք կատարում, եղել են դեպքեր, որ մեր խմբերն արձագանքել են և գնացել ոստիկանության բաժանմունքներ: Այս առումով որոշակի գործընթացներ կան»,-հայտարարեց ՄԻՊ-ը: