Ձեր վստահելի աղբյուրը

«Այսօր մեծ անորոշություն կա, բայց հաշվի առնենք, որ հունվարին ձվի գերարտադրություն ունեցանք, ինքնարժեքից ցածր գնով իրացում էին կատարում, հիմա ձգտում ենք կայունացնել գները»,- Ազգային ժողովում լրագրողների հետ զրույցում ասաց Թռչնաբույծների ասոցիացիայի նախագահ Սերգեյ Ստեփանյանը՝ պատասխանելով հարցին, թե Զատիկին ընդառաջ հավկիթի գինը սովորաբար բարձրանում է, իսկ այս տարի էլ, հաշվի առնելով այն իրողությունը, որ թռնչաբույծները կերի պակաս կունենան, գնաճն ինչքա՞ն է կանխատեսում։

Ս. Ստեփանյանի խոսքով, ձգտում են օպտիմալ գնի վրա իրացում կազմակերպել, սպառողներին շատ չանհանգստացնել։

«Բայց արդեն մեկ շաբաթից ավելի է ամբողջ արտադրությունը բացարձակապես  կախված է ներկրումից. տարեկան եթե օգտագործում ենք 140-150 հազար տոննա, ամսվա կտրվածքով 350-400 տոննա համակցված կեր, 80 տոկոսը հատիկաֆուրաժ է, ամբողջությամբ ներկրվում էր  Ռուսաստանից և Ուկրաինայից, այստեղ լուրջ պրոբլեմներ են առաջանում»,- ասաց նա։

Ըստ Ս. Ստեփանյանի, 14 օր է Լարսում  կանգնած են ոլորտից արտադրողներ, չեն կարողանում դուրս գալ, քանի որ անորոշ վիճակ է Լարսում, հստակ չեն տիրապետում, թե սահմանափակումներն ինչին է վերաբերում, ինչ քանակության։

«Ստիպված պատրաստի  համակցված կեր գնեցինք, ինչը թույլատրվում է, բայց մեր ծախսերը 30-35 տոկոսով ավելացնում է»,- ասաց Թռչնաբույծների ասոցիացիայի նախագահը։

Նրա գնահատմամբ, աշխատում են անիվների վրա. «Այսօրվա դրությամբ, փաստացի, արտադրողներն ունեն մեկ շաբաթվա պահուստային կեր, խոշոր կեր արտադրողների պաշարները կազմում է 1-1,5 ամսվա։

Կտուժեն նրանք, ովքեր պաշարներ չունեն։ Իսկ պաշարներ չունեն փոքրերն ու միջինները։ Ոչ մասնագիտացված է 56 ֆերմերային տնտեսություն։ Ընդհանուր առմամբ,  ունենք ձու արտադրող 10-11 մասնագիտացված տնտեսություն, մսի արտադրող 8 խոշոր ընկերություններ։ Հիմնական կերն ու հատիկաֆուրաժն օգտագործումն են այդ տնտեսություններում։ Նրանց  կարիքներն արդեն գնում են դեպի զրոյական վիճակ»։

Նա ակնկալում է, որ գոնե երկուշաբթի օրը իրավիճակը կկարգավորվի. «Հանդիպել են Ռուսաստանի ու մեր պատվիրակությունները, ինչքան տեղյակ ենք փաթեթ է ներկայացվել, հուսադրող բան կա, որ Ռուսաստանը մեր պահանջարկը  կբավարարի։ Դրական ազդակներ կան։ Բայց վատթարագույնն այն կլինի, որ մենք ստիպված գլխաքանակի պարտադիր մորթ չկազմակերպենք, անցած աշնան մեր ամբողջ աշխատանքն ուղղակի ջուրն է ընկնելու»։

Սերգեյ Ստեփանյանն ասաց, որ տարիեր շարունակ սեփական կերի արտադրության բազա ունենալու հարց են բարձրացնում,  ինչը հնարավոր է, քանի որ կան անմշակ հողեր, չօգտագործված վարելահողեր։ Հայտնեց, որ 2-3 տարի է ծրագիր են առաջարկել, սակայն կանգնած վիճակում է։ Նաև առաջարկել են կառավարությանը տոհմային փոքր տնտեսություն ստեղծել, տեղում ունենալ մայրական կազմ ու տեղում կազմակերպել արտադրություն, քանի որ տարեկան դրսից ներկրում են 1 օրական ճտեր։

«Կառավարություն ասում է՝ դուք ձեր ուժերով արեք։ Իսկ մենք մեր ուժերով չենք կարողանում անել, քանի որ բոլոր  ընկերությունները ունեն վարկային խոշոր պարտավորություններ։ Տոհմային տնտեսությունն ամբողջ աշխարհում կառավարության  հովանավորության տակ է իրականացվում։ Ներդրման հետվերադարձը 5-6 տարի է»,- ասաց Սերգեյ Ստեփանյանը։