Ձեր վստահելի աղբյուրը

Երկու օր է Դատախազությունն ու ԲԴԽ-ն հրապարակումներով միմյանց հերքում են՝ չգալով ընդհանուր հայտարարի մեկ հարցի շուրջ՝ ի վերջո Դատական գործերի մակագրման համակարգի առգրավված բանալիները Դատական դեպարտամենտին վերադարձվե՞լ է, թե՞ ոչ։

Panorama.am-ի հետ զրույցում ՀՀ գլխավոր դատախազի խորհրդական Գոռ Աբրահամյանը նշեց, որ  տեղյակ չէ ,թե խնդիրն ինչումն է, սակայն Դատախազության կողմից գրությունն ուղարկելու պահից սկսած նշված համակարգի գործարկման պատասխանատվությունը լիարժեքորեն ԲԴԽ դաշտում է

«Ես չեմ կարող բացատրել, թե ինչ խնդիր է։ Չեմ կարող մեկնաբանել իրենց հայտարարությունները։ Իսկապես, մեզ համար տարօրինակ է, որովհետև այդ համակարգի գործարկման հարցում առաջին շահագրգիռը, մեր կարծիքով, ԲԴԽ-ն է։ Տվյալ դեպքում՝ մեր կողմից համապատասխան գրությունն ուղարկվել է իրենց, որը հրապարկվել է համացանցում՝ իմ կողմից։

Այն լիարժեք բավարար է մակագրումն էլեկտրոնային եղանակով իրականացնելու համակարգն  ամբողջությամբ գործարկելու համար։ Ամեն դեպքում, մեր կողմից իրենց գրությունն ուղարկելու պահից սկսած այդ համակարգի գործարկման պատասխանատվությունը լիարժեքորեն ԲԴԽ դաշտում է»,- Panorama.am-ին ասաց Աբրահամյանը։

Հարցին, թե ինչպե՞ս է ուղարկվել փաստաթուղթը, էլեկտրոնային տարբերակո՞վ, Գոռ Աբրահամյանը պատասխանեց․ «Ես հրապարակել էի փաստաթուղթը և այնտեղ գաղտնի մաս կար, հետևաբար չեմ կարող այլ մանրամասներ նշել»։