Ձեր վստահելի աղբյուրը

Գիշերվանից տեղացող առատ ձյան հետևանքով Արցախի Հանրապետության շրջաններից դեպի մայրաքաղաք գործող տրանսպորտային ոչ բոլոր միջոցներն են կատարել կանոնավոր երթևեկություն։ Այս մասին «Արցախպրես»-ի թղթակցի հետ զրույցում ասել է Ստեփանակերտի Ավտոկայանի Շահագործման բաժնի պետ Ալեքսանդր Ավետիսյանը։

«Այսօրվա դրությամբ գործել են  ԱՀ Մարտունի քաղաքից և Ասկերանի շրջանի Դահրավ գյուղից մեկական երթուղիներ։  Մնացած բոլոր երթուղիները, ելնելով կլիմայական պայմաններից, չեն գործարկվել, քանի որ վաղ առավոտյան ավտոճանապարհներին ձնահեռացման աշխատանքներ դեռ չէին իրականացվել, իսկ մեր վարորդները ռիսկի չեն դիմել»,-նշեց Ա. Ավետիսյանը։

Մեր զրուցակցի խոսքով՝ Ստեփանակերտ-Երևան երթուղայինը նույնպես չի գործարկվել, իսկ Երևանից Ստեփանակերտ շարժվող երկու երթուղայիններ այս պահի դրությամբ գտնվում են Բերձորում։

«Ավտոմեքենաները տեխնիկապես սարքին վիճակում են, անվադողերը ձմեռային են»,- հավաստիացրել է նա։