Ձեր վստահելի աղբյուրը

Բաքվի կողմից իրականացվող հարկադրանքի քաղաքականությանը սահուն կերպով միացել  և աջակցում է  Ադրբեջանի ավագ եղբայրը՝ Թուրքիան, ինչի ամենաթերմ վկայությունը Հայաստանի ԱԳ նախարարի այցն էր Թուրքիա և այդ այցին հաջորդած Թուրքիայի բարձրաստիճան պաշտոնյաների հայտարարություններն առ այն, որ Հայաստանը պետք է ընդունի Ադրբեջանի առաջարկները։ Այս մասին հայտարարեց «Պատիվ ունեմ» խմբակցության ղեկավար Արթուր Վանեցյանն ընթացող խորհրդարանական լսումների ժամանակ։

«Այս ամենին ի պատասխան Երևանը լուռ է, ավելի ճիշտ խոսում է։ Շարունակում է խոսել այսպես կոչված խաղաղության դարաշրջանի մասին։ Առավել զավեշտալի են իշխանությունը ներկայացնող տարբեր պաշտոնյաների արձագանքները Ադրբեջանի խախտումներին ու Արցախում ստեղծված սոցիալական, հումանիտար անելանելի իրավիճակին։ Նույնքան զավեշտալի ու անընընդունելի է  Հայաստանի այսօրվա իշխանությունների դիրքորոշումն Ադրբեջանի կողմից ներկայացված հինգ կետերի կամ ավելի ճիշտ կլինի ասել պահանջների վերաբերյալ»,-ասաց Վանեցյանը։

Նա ԱԺ ամբիոնից իշխանություններին հարց ուղղեց՝ պատասխանե՞լ են այդ հինգ պահանջներին, թե՞ ոչ։

«Եթե պատասխանել եք ադրբեջանական առաջարկին, ի՞նչ տրամաբանությամբ եք հրաժարվում հրապարակել այն։ Ո՞րն  է նպատակը։ Ավելին, Հայաստանի իշխանությունները պատրաստակամություն են հայտնում Ադրբեջանի հետ խաղաղության համաձայնագրի վերաբերյալ բանակցությունները կազմակերպելու համար դիմել ԵԱՀԿ Մինսկի խմբի համանախագահությաւնը։ Չգիտե՞ն արդյոք մեր պաշտոնյաները, որ ԵԱՀԿ Մինսկի խումբը չունի նման մանդատ, չե՞ն հասկանում արդյոք, որ այս կերպ Արցախը գործընթացից դուրս թողնելով՝ անդառնալի սխալ են գործում, թե՞ հերթական անգամ ադրբեջանական օրակարգն են սպասարկում՝ ի հաշիվ Հայաստանի, Արցախի ու հայության կենսական շահերի»,-ասաց նա՝ ընդգծելով, որ մեր երկրի անվտանգային խնդիրները շատ ավելի լայն են, քան այն պատկերացնում ու ներկայացնում են Հայաստանի իշխանությունները։

ԱԺ ընդդիմադիր պատգամավորը տեղեկացրեց՝ վերջերս եղել է Արցախում, հանդիպել տարբեր շրջանակների ներկայացուցիչների հետ, շփվել արցախցիների հետ։

«Տեղում անձամբ տեսա ու հասկացա, որ բացի չլուծված անվտանգային խնդիրներից Արցախն այսօր ունի նաև օր առաջ լուծում պահանջող սուր սոցիալական ու հումանիտար խնդիրներ, իրականում խնդիրները շատ են, կարելի է դրանք երկար թվարկել»,-ասաց օրենսդիր մարմնի ներկայացուցիչը։

Վանեցյանն ընդգծեց, որ Արցախի համար ունենք միջազգային երկարաժամկետ երաշխիքների խնդիր, ունենք խնդիր՝ գիտակցելու, որ Արցախի անվտանգությունը չի սահմանափակվում միայն  արցախցիների ֆիզիկական անվտանգությամբ, ինչպես այն փորձում է ներկայացնել Հայաստանի իշխող ուժը։

«Արցախի կարգավիճակի մասին խոսելը և «կարգավիճակ» բառը պարզապես արտասանելը չի լուծում Արցախի անորոշ ապագայի հետ կապված խնդիրները։ Ի դեպ, տպավարություն է, որ այդ մասին խոսողները չեն էլ հասկանում, որ կարգավիճակ ասվածը կարող է լինել ցանկացած ձև։ Եվ կարևոր է խոսել շատ հստակ, արցախահայություն ինքնորոշման իրավունքի լիարժեք ու առանց սահմանափակումների իրացման մասին»,-ընդգծեց նա։

Բանախոսը համարում է, որ կարևոր է հասկանալ ստեղծված խնդիրների պատճառները, բայց դա հիմա ոչ առաջնահերթ հարց է։

«Մենք այսօր ունենք մի շատ կարևոր ու ցավալի իրողություն։ Ստիպված պետք է ընդունենք ու փորձենք լուծումներ գտնել մի իրավիճակում, երբ Հայաստանում ամենօրյա կտրվածքով ճակատագրական որոշումներ են կայացնում, բանակցություններ են վարում, պայմանավորվածություններ են ձեռք բերում մարդիկ, որոնք մեզ բոլորիս միգուցե միտումնավոր, միգուցե չհասկանալով, բերեցին ու հասցրեցին այս վիճակին։ Այդ մարդիկ ցավոք սրտի դեռևս իշխանություն են»,-ասաց Արթուր Վանեցյանը։

Ամփոփելով ելույթը՝ «Պատիվ ունեմ» խմբակցության ղեկավարն ասաց՝ ունեն հիմնավորված ու արդարացի պահանջ այդ գործընթացների մասին պարբերաբար թարմացվող տեղեկատվություն ստանալու վերաբերյալ։

«Այս օրենսդրական նախաձեռնությունը կոչված է լուծելու հենց այս խնդիրը։ Կփոխվի՞ սրանով հանրության թիկունքում գաղտնի պայմանավորվածությունների գնալու իշխանությունների  քաղաքականությունը։ Գուցե և ոչ ամբողջապես։ Բայց այս գործիքակազմը նախ հնարավորություն կստեղծի հաշվետվողականության նոր էլեմենտ առաջ բերելու և ամենակարևորը այն հնարավարություն կտա հանրության համար այս կամ այն չափով մասնակիցը դառնալ, տեղեկացված լինել իր ճակատագրին ու ապագային վերաբերող գործընթացներին»,-ասաց նա՝ ավելացնելով, որ այն չի կարող լուծել առկա բոլոր խնդիրները։

Արթուր Վանեցյանը կրկնեց, որ առկա խնդիրների լուծումը հնարավոր է միայն այս իշխանությունների հեռացմամբ, Արցախի ու Հայաստանի պետական շահերով առաջնորդվող նոր իշխանության ձևավորմամբ։

«Այնուամենայնիվ, այսօրվա իրականության պայմաններում օրենքը թույլ կտա լրացուցիչ մեխանիզմներ կյանքի կոչել հանրության թիկունքում որոշումներ կայացնելու ու պայմանավորվածությունների գնալու իշխանության ձեռագիրը նվազագույնի հասցնելու առումով»,-ելույթն ավարտեց նա։