Ձեր վստահելի աղբյուրը

«Պարոն Արամ Գասպարի Սարգսյանի հետ մենք նախաձեռնել ենք ուղերձ, որով ուզում ենք, որ հայությունը վերսկսի Արցախի անկախության ճանաչման գործընթացը»,- խորհրդարանական լսումների ժամանակ հայտնեց ՀՀ նախկին վարչապետ Հրանտ Բագրատյանը և տեղեկացրեց, որ հասել են հաջողությունների և շատ մարդիկ ստորագրել են այդ ուղերձի տակ, որը կարելի է գտնել «Save Artsakh» Թելեգրամ-ալիքում:

Բանախոսը տեղեկացրեց, որ եղել են Արցախում, հանդիպել խորհրդարանի բոլոր խմբակցությունների հետ և եկել այն կարծիքին, որ Ադրբեջանի իշխանությունները Հայաստանի իշխանությունների հետ թև-թևի տված ոչնչացնում են Արցախի անկախության ճանաչման բոլոր հիմքերը՝ դրանք էռոզիայի ենթարկելով:

Համոզմունք հայտնելով, որ իրենց նախաձեռնությունը թղթակցում է Հայկ Մամիջանյանի օրենսդրական նախաձեռնության հետ՝ Հրանտ Բագրատյանն ասաց. «Արցախի ղեկավարության հետ հանդիպումից հետո ստացանք տպավորություն, որ ոչինչ էլ չի արվում Արցախի ճանաչման, նույնիսկ՝ Մինսկի խմբի համանախագահների շրջանակներում հարցն առաջ տանելու ուղղությամբ: Վերջինս հրաժարվեց հանդիպումներից, երբ Ալիևը գոռգոռաց նրանց վրա: Պետք չէ իլյուզիաներով ապրել, քանի որ այսօր գազամուղն են կտրել, վաղը կապն են կտրելու Արցախի հետ և մի քանի ժամ ժամանակ կտան արցախցիներին այնտեղից դուրս գալու համար և ամեն ինչ կվերջանա»:

ՀՀ նախկին վարչապետը նկատեց, որ 2022 թվականին Ադրբեջանը պաշտպանության բյուջեն ավելացրել է 22%-ով, իսկ Հայաստանը պակասեցրել է 1%-ով:

Նկատելով, որ իրականում պաշտպանության բյուջեն ավելացել է 11%-ով, բայց գնաճն արդեն 12 %-է՝ Բագրատյանն բացատրեց, որ նախարարության բյուջեն նման է քաղաքացու աշխատավարձին, երբ գները բարձանում է 12 %-ով, իսկ աշխատավարձը բարձրանում է 11%-ով, ապա նշանակում է, որ իրականում այն իջել է:

«Պաշտպանության իրական բյուջեն շարունակում է անկում ապրել, մենք չենք տեսնում, թե ինչ է արվում: Հաճախ իմ ելութներից հետո ինձ տարբեր մարմիններ են հրավիրում, ասում են՝ էս ի՞նչ է, իշմար ես տալիս, թե իբր մենք թույլ ենք: Իհարկե թույլ ենք, ձեր օրոք մենք թույլ ենք»,- հայտարարեց բանախոսը և հարցրեց՝ իշխանությունը կարծում է թե Ադրբեջանը չի՞ բացում հայկական կայքերը, որպեսզի տեսնի Հայաստանի բյուջեն ավելացել է, թե՝ պակասել:

Նրա կարծիքով՝ Ադրբեջանում ուշադրությամբ հետևում են Ուկրաինայի իրադարձություններին, որպեսզի որոշեն, թե երբ հարձակվեն Հայաստանի վրա:

Բագրատյանի խոսքով՝ Ադրբեջանն այսօր գնում է այնպիսի զենքեր, որոնք հասանելի չեն Հայաստանի ունեցած զենքերին, քանի որ նոր բայրաքթարները բարձրանում են մինչև 13 կմ:

Նա կոչ արեց, որ սահմանամերձ 40 գյուղերը դարձնեն ռազմական բնակավայրեր, 16-60 տարեկան կանանց և տղամարդկանց կրակել սովորացնեն, ինչպես նաև խրամատների փոխարեն հաստ պատերով կապսուլներ կառուցել, քանի որ բայրաքթարի հարվածը հողի մակերևույթն ընդգրկում է մինչև 30 մետր խորությամբ:

«Ընդհանրապես մի բան արեք, պարգևավճար եք միշտ ձեզ տալիս, 300-400 միլիոն դրամի պատմություն է սահմանի երկայնքով 100 հատ այդպիսի կապսուլներ կառուցելը»,- ասաց Բագրատյանը և, նկատելով, որ պաշտպանությունից հասկացող չկա, քանի որ Սյունիքի լայնությունը 43-50 կմ է և Ադրբեջանից ու Նախիջևանից գրոհելու դեպքում այն կկորցնենք, հավելեց. «Հետո ի՞նչ ենք անելու, լաց ենք լինելու, աշխարհին բացատրելու ենք, թե երկրորդ գենոցիդն ունեցանք՝ դե բանաձև ընդունե՞ք, թե ասելու եք՝ մեզ էս մեկը գցեց, չպաշտպանեց: Նախ և առաջ՝ մենք ենք մեզ քցում»։

Նրա խոսքով՝ ամեն մի զենք ունի իր պատասխանը, որը 5-10 անգամ ավելի էժան է, քան հարձակողական զենքը ր դրանք պետք է ձեռք բերվի:

«Օրերը կչորանան, կտաքանան: Փորձը ցույց է տալիս՝ թուրքը չի սիրում կռվելուց ցեխի մեջ թաղվել և վտանգն ավելի քան 50% է, որ ապրիլ-մայիսին ՀՀ-ի վրա կլինի հարձակում»,- հայտարարեց ՀՀ նախկին վարչապետը և պնդեց, թե թող ինքը սխալվի, բայց ՀՀ-ն իր այդ սխալը հաշվի առնի և պատրաստվի պատերազմի: