Ձեր վստահելի աղբյուրը

«Արցախի ներկայիս վիճակի ու ապագայի վերաբերյալ ցանկացած քննարկում այսօր պահանջված է, քանի որ գլոբալ ու տարածաշրջանային վերջին զարգացումները նոր մարտահրավերներ են առաջադրում հայ ժողովրդին»,-ԱԺ-ում անցկացվող խորհրդարանական լսումների ժամանակ իր ելույթում ասաց Արցախի Հանրապետության ԱԺ  «Արցախի ժողովրդավարական կուսակցություն» խմբակցության քարտուղար Գեղամ Ստեփանյանը։

Նրա խոսքով, 2020 թ. պատերազմից հետո Արցախում ստեղծված կացությունը լուրջ վերլուծությունների կարիք ունի, հայկական երկրորդ պետության ազգաբնակչության խնդիրները մշտական ուշադրության կենտրոնում պահելու, կորցրած պաշտպանական հնարավարությունները վերականգնելու և խաղաղապահ զորակազմի գործողություններն ընդհանուր համակարգի մեջ ճիշտ համադրելու տեսանկյունից։

Արցախցի պատգամավորը նկատեց, թեև վերջին օրերին որոշակի աշխուժություն է նկատվել հայկական պետությունների խորհրդարանների համագործակցության առումով, բայց այդ թեմաները չեն կարող սահմանափակվել կրթության, գիտության, տեխնոլոգիաների թեմաներով։

«Արցախի սահմանամերձ բնակավայրերի ամրապնդնման և տասը օր տևած հումանիտար ճգնաժամային իրավիճակը հաղթահարելու հարցերը պետք է անպայման ներառվեն քաղաքական հարցերի օրակարգում, և դրանց շուրջ ծավալված մտքերի փոխանակությունը, առաջարկությունները պետք է դառնան գործողությունների ծրագիր պատկան մարմինների համար»,-ասաց նա։

Արցախցի գործիչն իր խոսքում շեշտեց, որ Ադրբեջանի սանձազերծած պատերազմից, նոյեմբերի 9-ի հայտարարությունից հետո ապրում են բոլորովին այլ՝ մեզ համար վնասակար ու ամենօրյա վտանգներով համալրվող անվտանգային միջավայրում։

«Այնպիսի տպավորություն է, որ մեր հակառակորդները մինչև այսօր ճշգրիտ ժամանակացույցով իրականացնում նախապես մշակված ու մեր խոցելի, թույլ կետերի հաշվառումով լրացված համապարփակ ծրագիր։ Իսկ մենք ամեն օր մտածում ու այդպես էլ չենք կարողանում համաձայնեցնել դեռ երեկ իրականացված սադրանքի դեմ հակաքայլը։ Սահմանամերձ  գյուղերի դեմ իրականացվող բարոյահոգեբանական ճնշումները բոլոր հնարավոր միջոցներով այդ բնակավայրերում գյուղատնտեսական աշխատանքներին խանգարելը միջոցներ են, որոնք  հաստատ մեկանգամյա չեն։ Դրանք կիրառվում են որոշակի «արդյունք» ստանալու ակնկալիքով։ Իսկ Արցախ մտնող միակ գազատարի պայթեցումը տարվա այս շրջանում, և այնպիսի պայմաններում, որ բնակչության մեծամասնությունը հենց բնական գազն է օգտագործում ինչպես ջեռուցման, այնպես էլ տաք ջուր ունենալու համար, հաշվարկված քայլ է եղել։ Միայն մի դեպքում  կարելի է  Արցախոմ ապրող մարդկանց վերադարձնել հույսը, ցույց տալ, որ  մենք բոլոր պետական ինստիտուտներով ի վիճակի ենք ապահովել նրա ընտանիքի անվտանգությունը, որ մենք թիկունքում Հայաստանի Հանրապետություն ունենք՝ պատրաստ միջազգային մակարդակով կազմակերպել արցախցիների իրավունքների պաշտպանությունը, որ Սփյուռքում ապրող մեր հայրենակիցների համար Արցախը շարունակում է մնալ որպես համազգային նվաճում, համայն հայության հպարտություն»,-ասաց արցախցի պատգամավորը։

Իր ելույթում նա ափսոսանք հայտնեց, որ հայկական պետությունների համատեղ օրակարգում քաղաքական իրադրության կարգավորման ուղղությամբ ձեռնարկվող ջանքերի, միջազգային կառույցներում ղարաբաղյան թեմատիկայի, պատերազմի հետևանքների հաղթահարման, շարունակվող մշակութային ագրեսիայի վերաբերյալ հարցերի շուրջ կենտրոնացումը երկրորդական պլան է մղված։

Արցախի ԱԺ պատգամավորն առաջարկեց ակտիվացնել միջխորհրդարանական համագործակցությունը, առաջարկեց դիտարկել Հայաստանի ու Արցախի խորհրդարանների արտաքին հարաբերությունների ու պետաիրավական հարցերի մշտական հանձնաժողովների անդամներից համատեղ աշխատանքային խումբ ձևավորելու գաղափարը։

«Խմբին պետք է հանձնարարել մշտապես թարմացվող օրակարգ մշակել և պարբերաբար իրազեկել մյուս պատգամավորներին տեղի ունեցող զարգացումների մասին։ Ակնհայտ է, որ այս աշխատանքն արդյունավետ կարող է լինել կարգավորման գործընթացում ներգրավված կառույցների կողմից թարմ տեղեկատվության տրամադրման պայմաններում»,-ելույթն ամփոփեց Գեղամ Ստեփանյանը։