Ձեր վստահելի աղբյուրը

«Քննվող օրենսդրական նախաձեռնությունն  իր խորքում ընդդիմության իրավունքների ու պարտականությունների հարց է»,-ԱԺ-ում հայտարարեց ԱԺ նախկին փոխնախագահ, նախկին դեսպան Արա Սահակյանը՝ առաջարկելով այդ տեսանկյունից դիտարկել Հայկ Մամիջանյանի նախաձեռնությունը։

Բանախոսի գնահատմամբ, նախագիծը փորձարկելու է՝ թե որքանով է Հայաստանի հասարակությւոնը հասուն, որքանո՞վ է իշխանությունը հանդուրժող։

«Այստեղ գոյություն ունի քաղաքական կոնտեքստ, ընդդիմությունը խնդիր է դնում, որպեսզի ավելի պաշտպանված լինի իր տեղեկացվածության ու հավասարության իրավունքը։ Ընդ որում, քաղաքացիների անվտանգության ու արտաքին քաղաքականությանը վերաբերող խնդիրներին պարբերաբար ու համագործակցաբար քննարկելու պահանջը շատ կարևոր է»,-ասաց Արա Սահակյանը։

Նրա համոզմամբ, դա զուտ ընդդիմության քմահաճույքը չէ, սա քաղաքացիների իրազեկվածության խնդիր է, որը սակայն կարող է լուծվել միմիայն իշխանության՝ այսինքն մեծամասնության համաձայնությամբ ու աջակցությամբ։

«Այս առթիվ քննարկումներում պատասխան կստանան այն հարցերը, թե ինչ մակարդակում է  գտնվում մեզանում ժողովրդավարությունն ու քաղաքական կուլտուրան ու մշակույթն առհասարակ։ Ուզում եմ ձեզ հիշեցնել, որ 1988 թվականից Հայաստանում ընդդիմությունը քայլ առ քայլ նվաճել է իշխանությանն արդյունավետ դիմակայելու իրավական ընթացարկարգային քաղաքական միջոցներ ձեռք բերելով»,-ասաց նա։

Սահակյանի խոսքով, պետք է ընդունել, որ Հայաստանն ավելի ծանր խնդիրներ կունենար, ավելի շուտ կհայտնվեր այս վիճակում, եթե ընդդիմությունը չկատարարեր իր արդյունավետ դերը։

«Այնպես, որ նույնը կատարվում է հիմա, և պետք է միայն ողջունել։ Առաջարկվող փոփոխությունները չպետք է դիտարկել այս իշխանության դեմ ընդդիմության դավադրություն։ Այն ընդունվում է ապագայի համար, երկարատև ժամանակի համար»,-նշեց նա։

Հիշեցնենք, որ «Պատիվ ունեմ» խմբակցության նախաձեռնությամբ անցկացվող խորհրդարանական լսումները ««Ազգային ժողովի կանոնակարգ» սահմանադրական օրենքում լրացում կատարելու մասին» օրենքի նախագծի վերաբերյալ են։

Օրինագիծը ենթադրում է, որ ՀՀ ԱԳ նախարարը և վարչապետը համապատասխանաբար 3 և 6 ամիսը մեկ փակ-գաղտնի ֆորմատով ԱԺ-ին գրավոր զեկույց պետք է  ներկայացնեն արտաքին քաղաքականության հիմնական բանակցային ուղղությունների ընթացքի և առկա վիճակի վերաբերյալ:

Նախագծով սահմանվում է, որ այդ զեկույցները ստանալուց հետո ԱԺ պատգամավորների 25%-ի ստորագրությամբ ԱԳ նախարարը և վարչապետը հրավիրվելու են ԱԺ փակ նիստում զեկուցելու և հարցերին պատասխանելու համար, որը կարող է լինել մասնագիտական հանձնաժողովում կամ ԱԺ լիագումար նիստում: