Ձեր վստահելի աղբյուրը

«Այն անվտանգային լուծումը, որով առաջնորդվում է այսօրվա իշխանությունը, կառուցված է թուրքերի խոսքին հավատալու վրա: Եթե նախկինում մեր անվտանգային համակարգը բաղկացած էր բանակ-ռազմավարական դաշնակից բանաձևի վրա, ապա այսօր ասում են՝ դե 21-րդ դարն է, հո Թուրքիան նորից չի կոտորելու»,-ԱԺ-ում «Պատիվ ունեմ» խմբակցության պատգամավոր Հայկ Մամիջանյանի հեղինակած «ԱԺ կանոնակարգ»  սահմանադրական օրենքում փոփոխություններ կատարելու նախագծի վերաբերյալ հրավիրված հասարակական քննարկման ժամանակ ասաց «Հայկական նախագիծ»-ի համահիմնադիր Էդգար Էլբակյանը:

Ներկայացնելով ներկայում ընթացող հայ-թուրքական բանակցությունների ընթացքը՝ բանախոսը բացատրեց, թե Թուրքիան ասում է, որ միակ խնդիրը 7 շրջաններն է եղել, բայրաքթարներն էլ դրա համար էին ուղարկում:

«Նրանք ասում են՝ միջանցքը տվեք, Մեծ Հայքը հանեք դասագրքերից, Ադրբեջանի տարածքային ամբողջականությունը ճանաչեք՝ մենք որպես մեծ կխոսենք Ադրբեջանի հետ, թեման կփակվի, տեսնում եք՝ ռուսները չեն կարողանում թեման փակել, Ադրբեջանն ուզում է գազ է պայթեցնում, գյուղի վրա է կրակում, այ եթե դուք մեր ուզածն անեք՝ մենք Ադրբեջանին կասենք թեման կփակվի, ու ձեր ուզած խաղաղության դարշարջանը կլինի, դուք էլ այն թանկով կծախեք ձեր ժողովրդի վրա»,-բանակցություններում Թուրքիայի առաջարկը պատկերավոր ներկայացրեց քաղաքագետը և կարծիք հայտնեց, որ հայկական կողմից բանակցողներն այդ «կուտը կերել են»՝ հավատալով, որ խնդիրը միայն 7 շրջանն էին:

Նրա խոսքով՝ երբ Հայաստանի գործող կոլաբորացիոնիստական վարչակարգի շնորհիվ Թուրքիային հաջողվի ռուսաստանի  վերջնականապես հանել տարածաշրջանից, Անկարան ասելու է, որ նոր պահանջներ կան, օրինակ՝ Սյունիքը:

Էլբակյանը հիշեցրեց, որ Էրդողանը նման փորձ ունի և ժամանակին ասում էր, որ տարբերություն չկա Ռիզեյի և Բաթումի միջև և առաջիկայում էլ կասի՝ ի՞նչ տարբերույթյուն Կարսի և Գյումրու միջև, ո՞ր անաստավծն է այն բաժանել:

Ըստ բանախոսի՝ այդ ժամանակ, երբ Հայաստանը բանակից և ռազմավարական դաշնակցից զրկված լինի՝ դիմադրելու ոչ մի պոտենցիալ չի ունենա:

«Գործ ունենք կոլաբորացիոնիստական վարչախմբի հետ, քանի որ Հայաստանի տարածքի, ներառյալ Արցախը, ուղիղ 22 %-ն օկուպացված է, իսկ այսօրվա իշխանությունները համագործակցում են այն օկուպացնողների հետ»,-հայտարարեց Էլբակյանը:

Նա պնդեց, որ գործող իշխանություններն անվտանգային ճարտարապետությունն են քանդել՝ հիմնվելով 1991-98 թթ. Հայաստանում իշխած անձի կեղծ արգումենտացիայի վրա, ըստ որի Թուրքիայի բնակչությունը 80 միլիոնն անցել է, իսկ Հայատանի ողջ բնակչությունը 3 մլն է և չեն կարա հակադրվել, ավելի լավ է հետները յոլա գնան:

Էդգար Էլբակյանի կարծիքով՝ այդ թեզի մեջ մանիպուլյացիա կա, քանի անվտանգային գործոն են նաև աշխարհագրական դիրքը, որոնք 1994 թվականին Արցախում մեծ զոհերի գնով ձեռք էինք բերել և ռազմավարական դաշնակիցը:

«Իսկ այն, որ այս իշխանությունները երդվյալ հակառուս են, չեն ուզում դառնալ Ռուսաստանի դաշնակից, արդյունքում ասում են՝ ինչ պետք է անենք, պետք է դառնանք Թուրքիայի դաշնակից, իսկ ավելի ճիշտ՝ Վիլայեթ»,-հայտարարեց «Հայկական նախագիծ»-ի համահիմնադիրը և հավելեց. «Այս իշխանությունններն ամենամեծ հանցագործությունն են թույլ տվել մեր պետության հանդեպ, այն է՝ մարդկային զոհերը, տարածքների կորուստը և դրանից էլ ավելի վատ հանցագործություններն զրկել են իմաստից, որովհետեև, եթե չկա Արցախի համար պայքարը, Ցեղասպանության հարցում արդարության ձգտումը, հակաթուրքական մոտիվը, ուրեմն Հայաստանն էլ չա, քանի որ այն չի կարող հակաթուրք չլինելով դաշնակից ունենա, ի՞նչ իմաստ ունի ներդրում անել մի երկրի վրա, որը չի ուզում ստատուս-քվո փոխել»:

Նկատելով, որ Հայաստանի իմաստավորման միակ ուղին գործող իշխանությունների հեռացումն է՝ Էդգար էլբակյանն ասաց, որ Հայկ Մամիջանյանի նախաձեռնությոնը կաթիլ է ծովում, բայց այն կարող է քար ծակել ու եթե կօգնի ազատվել գործող իշխանություններից, ապա ինքը ողջունում է օրինագիծը: