Ձեր վստահելի աղբյուրը

ԱԺ «Հայաստան» խմբակցության պատգամավոր Աղվան Վարդանյանը ԱԺ նիստում ներկայացրեց իր հեղինակած նախագիծը, որով առաջարկվում է փոփոխություններ և լրացումներ կատարել ՀՀ Հարկային օրենսգրքում։

«Օրենսդրական նախաձեռնությունը վերաբերում է  գրահրատարակչության ոլորտին, առաջարկվում է գրքերի տպագրությունն ու  դրա համար անհրաժեշտ նյութերի ներմուծումն ազատել ավելացված արժեքի հարկից։ Օրենքի նպատակն ընթերցանության, կրթվածության խթանումն է, հրատարակչական գործին աջակցելը»,- ասաց նախագծի հեղինակը։

Ա. Վարդանյանի կարծիքով, այսօր հիմնական խնդիրներից մեկը հենց գրքի, ընթերցանության հանդեպ վերաբերմունք է, իսկ այս նախաձեռնությունը կբարելավի խնդիրները։

Նա նշեց, որ աշխարհի շուրջ 30 երկրում՝ Կանադա, Լիբանան, Հորդանան, Մեծ Բրիտանիա, Ուկրաինա, Նորվեգիա, Հարավային Ամերիկայի երկրներ, գրքերի համար սահմանել են 0  տոկոս  ավելացված արժեքի հարկ, իսկ մի շարք երկրներում՝ Սինգապուր, Ճապոնիա, Բելգիա, Կիրպոս և այլն,  տպագրված գրքերի համար սահմանված է ԱԱՀ արտոնություն  նվազման  դրույքաչափի կիրառման միջոցով։ Վրաստանում, Ադրբեջանում նույնպես արտոնություններ են ստանում։

Ա.Վարդանյանը հայտնեց, որ հարցը քննարկվել է ԱԺ գիտության, կրթության, մշակույթի, սպորտի, սփյուռքի և երիտասարդության հարցերով մշտական հանձնաժողովում, ՔՊ-ականները ձեռնպահ են քվեարկել, դրա համար բացասական եզրակացություն է ստացել։

«Հույս ունեմ խորհրդարանը, կարևորելով գրքի հանդեպ վերաբերմունքը, մեր հասարակության կրթվածության մակարդակի բարձրացումը, կընդգրկի այս հարցն օրակարգ։ Հույս ունեմ, բայց, վստահ եմ, չեք անի»,- ասաց ընդդիմադիր պատգամավորը։ 

Հարակից զեկուցող, ՔՊ-ական  Թագուհի Ղազարյանն ասաց, որ այսօր արտոնություններ կան գրահրատարակչության ոլորտում, գրքերի մի մասը՝ մանկական, ուսումնամանկավարժական ձեռնարկներն ազատված են հարկերից, հիմա առաջարկվում է այս նախագծով նաև գեղարվեստական ու հրապարակախոսական գրականությունն ազատել հարկերից, սակայն նախագծի երկրորդ  հատվածը խնդրահարույց է, որտեղ  առաջարկվում է  գրքերի հրատարակության համար ներկվող հումքն ազատել հարկերից, ինչը դժվար է որոշել։

Նա առաջարկեց դեմ քվեարկել նախագիծը լիագումար նիստերում քննարկելու առաջարկին, մինչև այստեղ քննարկելն այն պետք է այլ քննարկման փուլեր անցնի։

Աղվան Վարդանյանն ասաց, որ հանձնաժողովի նիստում քննարկման ժամանակ առաջարկել է՝ եթե այստեղ հարցեր են տեսնում, պատրաստ է հանել երկրորդ կետն ու թողնել միայն  գրքերի համար ավելացված արժեքի հարկի հանումը։

«Բայց, ցավոք, հանձնաժողովը դրան չարձագանքեց։ Չարձագանքել ու  այստեղ հիմնական պրոբլեմը  դարձնել ներմուծվող  ապրանքները, կարծում եմ, արդար չէ, ազնիվ չէ»,- ասաց «Հայաստան» խմբակցության պատգամավորը։

Քեարկության դրվեց Հարկային օրենսգրքում փոփոխություն և լրացումներ կատարելու մասին օրենքի նախագիծը  նստաշրջանի  օրակարգում ընդգրկելու մասին հարցը։

Կողմ քվեարկեց 20 պատգամավոր, դեմ՝ 60, ձեռնպահ՝ 1։ Որոշումը չընդունվեց։