Ընդդիմադիրներն առաջարկում են՝ քրեականացնել ՀՀ տարածքային ամբողջականության դեմ ուղղված արտահայտությունները
Ազգային ժողովում քննարկվում է ԱԺ փոխնախագահ Իշխան Սաղաթելյանի և «Հայաստան» խմբակցության պատգամավորներ Արամ Վարդևանյանի, Աղվան Վարդանյանի հեղինակած օրենսդրական նախաձեռնությունը, որով առաջարկվում է ՀՀ լրացումներ կատարել ՀՀ Քրեական օրենսգրքում և Քրեական դատավարության օրենսգրքերում։
«Ձեր դատին ու քննարկամը ներկայացնում ենք, կարծում եմ, Հայաստանի յուրաքանչյուր քաղաքացու համար իրապես սրբազան արժեք հանդիսացող հանգամանքի վերաբերյալ մեր առաջարկած նախաձեռնությունը։ Այն վերաբերում է նրան, որ այլևս Հայաստանի տարածքային ամբողջականությունը կամ դրա մի մասը որևէ տեսակ արտահայտությամբ կասկածի տակ դնելը կամ առավել ևս նշվածը հրապարակայնորեն արդարացնելը կամ քարոզելը լինի քրեորեն հատապնդելի արարք»,- ասաց Արամ Վարդևանյանը։
Նրա խոսքով, նշված կարգավորումն առավել արդիական է դարձել 2020 թվականի 44- օրյա պատերազմին հաջորդած ժամանակահատվածի պայմաններում։
«Այս նախագիծը, իմ համոզմամբ և իմ պատկերացմամբ, լինելու է Հայաստանի տարածքից դուրս գտնվող մարդկանց իրապես հետապնդելու և նրանց կողմից թույլ տրվող արտահայտություններն անհետևանք չթողելու մասին»,- ասաց նախագծի հեղինակը։
Նա հիշեցրեց, որ ՀՀ տարածքից դուրս «հարևան», բայց իրականում թշնամի երկրի ռազմաքաղաքական ղեկավարությունն ինչ արտահայտություններ է իրեն թույլ տալիս. «Խոսում է Սյունիքի, Երևանի, Սևանի մասին, իրենց զառանցանքների պայմաններում փորձում են այդ ամենը ՀՀ պատկանելիության տեսանկյունից կասկածի տակ դնել»։
«Կարծում ենք, որ սա նաև լավ հնարավորություն կլինի նման արտահայտություններ թույլ տվողներին, չնայած նույնիսկ այն պայմաններում, որ գտնվեն Հայաստանի տարածքից դուրս, ենթարկվեն քրեական հետապնդման։ Այս գործիքը նաև մեզ թույլ կտա հետախուզում հայտարարել բոլոր նման արտահայտություններ թույլ տվող անձանց նկատմամբ, չնայած որ նրանք չեն գտնվի ՀՀ տարածքում»,- ասաց Վարդևանյանը։
Այնուհետև նա հարցադրում արեց՝ կարող է հարց առաջանալ՝ որքանո՞վ այն արդյունավետ կլինի, արդյո՞ք այդ հետախուզումն ի վերջո արդյունք կտա. «Գիտեք, ես ունեմ այն համոզմունք, որ 21-րդ դարում Եվրոպայի խորհրդի անդամ փաստացի պետություն հանդիսացող Ադրբեջանի դեպքում չի կարող այդ անգործությունը եվրոպական հանրույթի կողմից շարունակական լինել, չի կարող ժառանգաբար իշխանություն ստանալը, կնոջ համար պաշտոն ստեղծելն ու հետո կնոջն այդ պաշտոնին նշանակելը թույլատրելի լինի եվրոպական երկրում։
Հենց այս հոդվածի ընդունման դեպքում քրեական հետապնդումը, հետախուզումը մի օր իր արդյունքը կտա, որովհետև այդ լռությունը մի օր ավարտվելու է»։
Մեկ այլ հարցադրում հնչեցրեց՝ արդյո՞ք այս նախագիծը վերաբերում է նաև ՀՀ քաղաքացիներին։
«Պատասխանը հստակ է՝ այո։ Կարծում եմ, վստահ եմ նաև այս կարծիքը իմ թիմակիցները ևս կիսում են, ՀՀ տեղեկատվական տեռորի ազդեցության տակ գտնվող մարդիկ, որը հնարավոր է և կազմակերպվում է ՀՀ տարածքից դուրս կրկին, այս ազդակը կստանան ու նման հայտարարություններ կամ նման արտահայտություններ իրենց թույլ չեն տա, իսկ պաշտոնատար անձինք առավել ևս նման արտահայտություններ թույլ չեն տա, թեև այս ժամանակահատվածում տեսել ենք նաև իրարամերժ արտահայտություններ, որոնք առավել քան վտանգավոր եմ»,- ասաց Ա.Վարդևանյանը։
Նա նշեց, որ այսօրվա Քրեական օրենսգիրքը նման արտահայտությունները քրեորեն հետապնդելի արարք չի համարում, կոչերը՝ որոշակիորեն համարում է, բայց ոչ այն տրամաբանությամբ, որով իրենք են առաջարկում։
«Հավատացեք՝ սա իսկապես մի այնպիսի նախագիծ է, որը քաղաքական կոմպոնենտ չունի։ Այն ուղղված է սրբազան արժեքի պաշտպանությանը»,- ասաց «Հայաստան» խմբակցության պատգամավոր Արամ Վարդևանյանը։
Հարակից զեկուցող ՔՊ-ական պատգամավոր Վահագն Հովակիմյանն ասաց, որ նախագիծը մանրամասն քննարկվել է պետաիրավական հարցերի մշտական հանձնաժողովում, տրվել է բացասական եզրակացություն։
«Հիմնական մոտեցումը եղել է այն, որ ներկայիս քրեաիրավական գործիքակազմով Հայաստանի տարածքային ամբողջականությունը լիարժեք պաշպանված է, պաշտպանված է Հայաստանի տարածքային ամբողջականությամբ դեմ ցանկացած ոտձգությունից, եթե կլինի գործողության տեսքով, պաշտպանված է Հայաստանի տարածքային ամբողջականությամբ դեմ կոչերից։ Ըստ էության, այն խնդիրը, որը հնչեցվում է զեկուցողի կողմից, մեր քրեական օրենսդրությամբ լուծված է։ Փոխարենն այս նախագծով առաջարկվող մոտեցումը հստակ խնդիրներ է հարուցում, իրավական որոշակիության տեսանկունից այս նախագիծն ուղղակի որևէ քննության չի կարող դիմանալ»,- ասաց Հովակիմյանը։
Նա կոչ արեց դեմ քվեարկել նախագծին, քանի որ «վնասում է ՀՀ քաղաքացու շահերին, դնում է ՀՀ քաղաքացուն ծանր կացության մեջ, քաղաքացին չի իմանալու ինչպիսի իրավաչափ վարքագիծ պետք է դրսևորի, որպեսզի քրեորեն պատժելի արաք արած չլինի»։
Հարակից հրապարակումներ`
Լրահոս
Տեսանյութեր
«Գոյ» թատրոնի դերասանները դիմեցին ոստիկանություն
