Ձեր վստահելի աղբյուրը

Արցախյան 44-օրյա պատերազմում զոհված 3822 անձանցից 1431-ի ինքնությունը պարզվել է իրականացված դատագենետիկական փորձաքննությունների արդյունքներով: Panorama.am-ի գրավոր հարցմանն ի պատասխան նման տվյալներ են տրամադրել Քննչական կոմիտեից։

«Զոհված 3822 անձանցից շուրջ 100-ի հարազատները հրաժարվում են հուղարկավորել դատագենետիկական փորձաքննությունների արդյունքում նույնականացված մարմինները»,-հայտնում են քննչական մարմնից։

Առողջապահության նախարարության, Քննչական կոմիտեի և Անհայտ կորածների միջազգային հանձնաժողովի միջև կնքված համագործակցության պայմանագրի շրջանակներում 2021 թվականի օգոստոսին 53 բարդ փորձանմուշ լրացուցիչ դատագենետիկական հետազոտություն կատարելու նպատակով ուղարկվել է Նիդեռլանդների Թագավորություն: Բացի այդ, 2021 թվականի նոյեմբերին ևս 47 բարդ փորձանմուշ լրացուցիչ հետազոտություն կատարելու համար ուղարկվել է Նիդեռլանդների Թագավորություն:

«Հայաստանում և արտերկրում նույն փորձանմուշների վերաբերյալ իրականացված դատագենետիկական հետազոտության տարբեր արդյունքներ չեն ստացվել»,-նշում են քննչական կոմիտեից։

ՀՀ քննչական կոմիտեի զինվորական քննչական գլխավոր վարչության հատկապես կարևոր գործերի քննության վարչությունում շարունակվում է Ադրբեջանի Հանրապետության ռազմաքաղաքական ղեկավարության կողմից Արցախի Հանրապետության դեմ ագրեսիվ պատերազմ սանձազերծելու և վարելու, ռազմական գործողությունների ընթացքում նախապես հավաքագրված վարձկաններ օգտագործելու, պատերազմ վարելու արգելված մեթոդներ և միջոցներ կիրառելու, քաղաքացիական բնակիչներին զինծառայողներից չտարբերակելու և Արցախի Հանրապետության խաղաղ բնակավայրերի քաղաքացիական բնակչությանը համակարգված, կանխամտածված և նպատակաուղղված գրոհների թիրախ դարձնելու, մասնավորապես' խորը թիկունքում գտնվող քաղաքացիական բնակչությանը և քաղաքացիական օբյեկտները ոչ ընտրովի հարձակման թիրախներ դարձնելու և հրետակոծելու, միջազգային մարդասիրական իրավունքի նորմերի լուրջ խախտումներ համարվող արարքներ կատարելու, ահաբեկչության, ահաբեկչության ֆինանսավորման, միջազգային ահաբեկչության փաստերի առթիվ հարուցված քրեական գործի նախաքննությունը:

Քրեական գործի շրջանակներում պարզվել է, որ Ադրբեջանի կողմից սանձազերծված ագրեսիվ պատերազմի հետևանքով զոհված զինծառայողների և քաղաքացիական անձանց ընդհանուր թվաքանակը 21.03.2022թ. դրությամբ կազմում է 3822 անձ, անհայտ է 187 զինծառայողի և 21 քաղաքացիական անձի գտնվելու վայրը:

Հիշեցնենք, որ օրեր առոջ առողջապահության նախարար Անահիտ Ավանեսյանը, խոսելով չհուղարկավորված մասունքների ճակատագրի մասին, ասել էր. «Մենք հասկանում ենք, որ ժամանակի ընթացքում ինչ-որ պահի պետք է անդրադառնանք այս հարցին, հուղարկավորենք անհատական ձևով, ոչ եղբայրական... դրա մասին խոսք չկա, և այսպես ինչ-որ կերպ հարցը լուծենք»։