Ձեր վստահելի աղբյուրը

Ուկրաինայում  իրավիճակով պայմանավորված՝  ՀՀ ԱԳ նախարարի հրամանով Հունգարիա է գործուղվել ԱԳՆ ներկայացուցիչ, որը շուրջօրյա ռեժիմով պատասխանել  է հեռախոսազանգերին, համագործակցել է Հունգարիայի պատկան գերատեսչությունների  ներկայացուցիչների հետ,  բազմաթիվ ՀՀ քաղաքացիների, նրանց ընտանիքի անդամ հանդիսացող Ուկրաինայի քաղաքացիների տրամադրել է հյուպատոսական աջակցություն (օրինակ՝  ապահովել  է ՀՀ վերադարձի վկայականների տրամադրում), կազմակերպչական և այլ խնդիրների հետ կապված խորհրդատվություն: Այս մասին հայտնում է ՀՀ ԱԳՆ մամուլի խոսնակ Վահան Հունանյանը։

Անհրաժեշտության դեպքում կազմակերպվում է սահմանային անցակետերից մինչև Բուդապեշտ քաղաքացիների տեղափոխում և նրանց հետագա ճամփորդությունը Հայաստան:
«Մեր հայրենակիցները, անկախ նրանց քաղաքացիությունից, աջակցություն են ստանում նաև Հունգարիայի հայկական ինքնավարությունից»,- նշում է ԱԳՆ խոսնակը։ 

Հիշեցնենք, որ Հայաստանը Հունգարիայի հետ դիվանգիտական հարաբերությունները կասեցրել է  2012 թվականի օգոստոսի 31-ին Հայաստանի ԱԱԽ որոշմամբ։ Այս մասին հայտարարել էր ՀՀ երրորդ նախագահ Սերժ Սարգսյանը Հայաստանում հավատարմագրված ՄԱԿ-ի անդամ պետությունների դիվանագիտական ներկայացուցչությունների ղեկավարների և Հայաստանում գործող միջազգային կառույցների ղեկավարների մասնակցությամբ հրավիրած արտակարգ խորհրդակցության ժամանակ։

2004 թվականին Բուդապեշտում՝ ՆԱՏՕ-ի զորավարժություններին մասնակցող քնած հայ սպա Գուրգեն Մարգարյանին կացնահարելու համար Հունգարիայի դատարանի կողմից ցմահ ազատազրկման դատապարտված ադրբեջանցի սպա Ռամիլ Սաֆարովը  հանձնվել էր Ադրբեջանին։  Բաքու հասնելուց հետո Սաֆարովը ներում էր ստացել Իլհամ Ալիևի կողմից ու ստացել ազգային հերոսի կոչում։

«Դա տեղի է ունեցել, քանի որ Եվրոպական միության և ՆԱՏՕ-ի անդամ Հունգարիայի իշխանությունները գործարքի մեջ են մտել Ադրբեջանի իշխանությունների հետ։ Իրենց այս համատեղ գործողություններով Հունգարիայի և Ադրբեջանի իշխանությունները դուռ բացեցին նման հանցագործությունների կրկնության համար», - հայտարարել էր Սերժ Սարգսյանը: