Ձեր վստահելի աղբյուրը

«Քաղաքական մեծամասնությունը դեմ քվեարկեց մի օրենքի նախագծի, որով նախատեսվում էր քրեական հետապնդում այն մարդկանց նկատմամբ, ովքեր կասկածի տակ կդնեին ՀՀ տարածքային ամբողջականությունը և միևնույն ժամանակ, երբ խախտվում է ՀՀ տարածքային ամբողջականությունը, դրսևորում են բացառիկ հանդուրժողականություն և դեռ պարզ էլ չէ, թե ՀՀ տարածքային մաբողջականությունը վերականգնելու համար ինչ են անում կամ առհասարակ ինչ-որ բան անո՞ւմ են, թե՞ ոչ»,-կառավարության հետ հարցուպատասխանի ժամանակ «Հայաստան» խմբակցության պատգամավոր Աննա Գրիգորյանը:

Նա հիշեցրեց, որ Ներքին Հանդում, երբ թշնամին հերթական անգամ ներխուժել է ՀՀ սուվերեն տարածք, և  բնակիչներն են արոտավայր գնալիս նկատել, որ ադրբեջանցիները վրաններ են տեղադրել այդ տարածքում, ՊՆ-ն սկզբից հերքել էր, հետո հաղորդագրություն տարածել, որ այնտեղ տեղակայված են ադրբեջանցիներ, բայց դա Ադրբեջանի վերահսկողության տակ գտնվող տարածք է:

«Ինչո՞ւ է հնարավոր եղել ադրբեջանցիների առաջխաղացումը, երբ ադրբեջանցիները նախորդ տարի դուրս էին եկել և հիմա են նոր վերադառնում, ինչո՞ւ այդ ընթացքում հայկական կողմն այդ դիրքերը չի զբաղեցրել, որը ենթադրում է առանց որևէ բախման այդ դիրքերի զբաղեցում, և երրորդ, ինչո՞ւ է ՀՀ քաղաքացին ինքը գնում և տեսնում, որ ադրբեջանցիներն են այնտեղ տեղակայված»,-հարցրեց ընդդիմադիր պատգամավորը:

Հարցին պատասխանող պաշտպանության նախարար Սուրեն Պապիկյանն ասաց, թե կարևոր է, որ բարձրաձայնված հարցերի մեջ սուտն ու մանիպուլյացիան քիչ լինեն։

Պապիկյանի պատասխանն ապեցուցիչ էր. «Իսկ ո՞վ է ասել, որ դրա մասին Պաշտպանության նախարարությունը տեղյակ չէր կամ չենք տիրապետում մենք մեր սահմաններին կամ զբաղեցրած դիրքերին։  Հրապարակային պետք է ամեն ինչ խոսե՞նք, դա ձեր գործելաոճն է հրապարակայնացնել այն, ինչը կարիք չկա հրապարակայնացնելու։ Դա 5-րդ շարասյան գործն է՝ համոզել համայնքապետին՝ խոսել նրա մասին, որ համայնքը զրկվել է ջրից, այնինչ, համայնքը ջուր է ստանում հակառակ կողմից»:

Նախարարը հայտնեց, որ չի կարող ԱԺ ամբիոնից հաստատել նման կեղծիքները:

«Չեմ կարող ասել, որ այո, ճիշտ էր ասում 5-րդ շարասյան հին թե նոր առաջնորդը, չգիտեմ ինչպես անվանել այդ նախկին պաշտոնյային, թե իբր չի տարբերում Ներքին Հանդը Հին Հանդից։ Սա սովորական մանիպուլյացիա է»,-հայտարարեց Պապիկյանը և նկատեց որ հանրային քննարկումը  բերելու ե նրան որ ՊՆ-ն ստիպված լինի խոսել և հավելեց. «ՊՆ-ն ստիպված կլինի խոսել նրա մասին, որ իքս ժամանակաշրջանում, երբ ՀՀ զորքերը զբաղեցրել են իքս դիրքեր, հակառակորդն էլ զբաղեցրել է այլ դիրքեր։ Ի՞նչ, հրապարակային նշե՞նք, թե որ հատվածներում են գտնվում մեր դիրքերը։ Լավ, վերջապես մենք պիտի ունենանք հանրային գիտակցություն, որ ամեն ինչ չէ, որ կարելի է օգտագործել քաղաքական նպատակներով։ Ես ամաչում եմ նրա համար, որ քննարկում ենք բաներ, որ պիտի համատեղ ուժերով փորձենք բացառել և ոչ թե փնտրել առիթներ՝ ոնց անենք, որ ցեխին հավասարեցնենք սեփական բանակը, սեփական զինվորի սխրանքը: Վերջ տվեք այս գործելաոճին, սա լավ տեղ չի տանում»։

Աննա Գրիգորյանը հայտնեց, որ Պապիկյանից նման մանիպուլյատիվ և ոչ բովանդակային պատասխան չէր սպասում և չհասկացավ թե ինչ նկատի ունի 5-րդ շարասյուն ասելով:

«Մեզանից յուրաքանչյուրն այստեղ ամաչելու խնդիր ունի, երբ ադրբեջանցին օր-օրի առաջ է գալիս»,-հայտարարեց պատգամավորը՝ անդրադառնալով Պապիկյանի այն խոսքին, թե ինքը ամաչելու խնդիր չունի: