Ձեր վստահելի աղբյուրը

Երևանի Արգիշտի փողոցի բնակիչներն ահազանգում են՝ կողք կողքի խիտ շարված շենքերի կողքին մեկն էլ  են կառուցում։

«Ո՞ւր ենք փախչելու, եթե աստված մի արասցե, երկրաշարժ լինի»,-հարցնում են նրանք՝ ցույց տալով  օր օրի փոքրացող ազատ տարածքը։

Իրականացվող շինարարության ձայնից, փոշուց բողոքող քաղաքացիներին առավել շատ մտահոգում է հարցը՝ արդյոք շենքին շատ մոտ  իրականացվող ասֆալտի քանդման, հորատման աշխատանքների հետևանքով չի՞ տուժի իրենց շենքերի սեյսամակայունությունը։ 

Ի դեպ՝ նոր շինարարության կողքը նաև ստորգետնյա ավտոտնակներ են։

«Դիմանալ չի լինում, ողջ օրը տեխնիկայի աշխատանքի ձայնն է, աղմուկ, նույնիսկ հանգստյան օրերին, երբ մնում ենք տանը՝ իբր հանգստանալու»,-ասում են բնակիչները։

Շինհրապարակից մի քանի մետր այն կողմ գտնվող բազամահարկ շենքերի բնակիչները ստիպված են դեռ 27 ամիս լսել տեխնիկայի ձայնն ու մտահոգվել՝ անվտանգ կմնա՞ն իրենց շենքները շինաշխատանքներից հետո։

Ի պատասխան Panorama.am-ի գրավոր հարցման, Երևանի քաղաքապետարանից հայտնեցին՝  Արգիշտի 7/6 հասցեի հարակից հատվածում «Նյու էյջ քոնսթրաքշն» ՍՊԸ-ին անցած տարեվերջին՝  22.12.2021 թ. տրվել է բազմաբնակարան շենքի կառուցման շինթույլտվություն։ Շինարարական աշխատանքները կտևեն  30 ամիս:

«Շինթույլտվության և կառուցապատվող օբյեկտի տեխնիկական բնութագրի վերաբերյալ տարածքում առկա է համապատասխան ցուցանակ»,-ասացին քաղաքապետարանից։