Ձեր վստահելի աղբյուրը

«Այն, ինչ արվում է Ադրբեջանի իշխանությունների կողմից՝ Թուրքիայի հովանավորությամբ, հետևանքն է Հայաստանի կապիտուլյանտ ռեժիմի հետևողական անգործության, հակապետական ու հակազգային քաղաքականությանը»,-  Կոմիտասի անվան պանթեոնում լրագրողների հետ զրույցում նշեց ՀՀԿ խոսնակ Էդուարդ Շարմազանովը:

Նա նշեց, որ այս իշխանությունը փոխանակ ամրապնդներ անվտանգությունը, հարաբերությունները մեր ռազմավարական դաշնակցի հետ, վերակազմավորեր բանակը, զենք-զինամթերք գնել, ի՞նչ են արել կամ վերջին 1,5 տարում այս իշխանությունն իր առաջնորդի գլխավորությամբ քանի՞ անգամ է պաշտպանել ազգային շահը։ 

«Եթե Նիկոլ Փաշինյանը երբեք չի խոսել ադրբեջանական օկուպացիայի մասին, խորհրդարանում հրաժարվում է Շուշին ու Հադրութը օկուպացված համարել, ոչ մի միջազգային հարթակում Ադրբեջանի հանցագործությունների մասին չի խոսում, եթե խորհրդարանական իշխանական դիվանագիտությունը տարբեր միջազգային հարթակներում չի բարձրաձայնում Ադրբեջանին սանկցիաների տակ մտցնելու հարցը, չի ասում՝ Ադրբեջանը հանցագործ պետություն է, այլ այս ամեն ինչը մի կողմ դնելով ասում է՝ ինձ համար գլոբալ առումով ընդունելի են Ադրբեջանի 5 կետերը, ի՞նչ էիք սպասում Ադրբեջանից: Այս իշխանությունը դարի նվեր է Էրդողանի ու Ալիևի համար: Թուրքերն ու ադրբեջանցիները եթե 1000 տարի երազեին, Հայաստանում նման  անգործունյա, հակապետական իշխանության չէին գտնի»,- ասաց  քաղաքական գործիչը։

Նա նշեց, որ Նիկոլ Փաշինյանի այսօրվա տեսակետը հետևյալն է՝ «մեր պաշտպանությունը մեր անպաշտապնության մեջ է», այսինքն մենք ոչինչ չենք անում, գնում ենք խաղաղության, բայց թուրքը պատրա՞ստ է խաղաղության:

«Թուրքը խաղաղություն չի ուզում, ասում է՝ հանձնվիր: Ազգերն ապրելու համար պետք է պատրաստ լինեն ինքնապաշտպանվել, անվտանգությունն ապահովել։ Ամեն ինչ ռուսի վրա գցելո՞վ է: Հիմա էլ ասում են՝ ռուս խաղաղապահները թող գնան: Ռուս խաղաղապահները որ գնան … Դա տրամվայ չի, ոչ էլ տրոլեյբուս, որ ռուսները գնան, զիջեն ամերիկացիքին կամ եվրոպացիքին: Ռուսները, որ գնան, ո՞վ է մտնելու։ Թուրքը: Այսօր լավ է, վատ է, այս գործողությունները ցույց են տալիս, որ Հայաստանի իշխանությունը վաղուց ձեռքերը լվացել է Արցախից»,-ասաց նա:

Էդուարդ Շարմազանովի խոսքով, մի բան պետք է գիտակցել՝ մի իշխանություն, որը պարտվողական է,  չի կարող երկրին խաղաղություն բերել, սա թուրք-ադրբեջանական տիրապետության տակ ապրել է։

Անդրադառնալով Նիկոլ Փաշինյանի հայտարարությանը, թե նախկին իշխանությունները նույնպես ընդունել են տարածքային ամբողջականության սկզբունքը, նա նշեց. «Այո, նախկիններն էլ են ընդունել տարածքային ամբողջականության սկզբունքը, բայց նախկինները դրանից առաջ ասել են, որ Արցախը չի կարող լինել Ադրբեջանի կազմում և նախկինների համար թիվ մեկ ամենակարևոր խնդիրը եղել է ինքնորոշման իրավունքի իրացումը: Պատերազմից հետո երբևէ լսե՞լ եք այս իշխանությունների բերանից, որ Արցախի ժողովրդի ինքնորոշման իրավունքի պարտադիր իրացումն այլընտրանք չունի, և Արցախը չի լինելու Ադրբեջանի կազմում: Այդ մեսիջները նաև Ադրբեջանում և Թուրքիայում են չէ՞ լսում։  Կամ ո՞նց կարելի է ասել՝ մենք Ադրբեջանի 5 կետերին համաձայն ենք»։

Հարցին, թե ինչո՞ւ ռուս խաղաղապահներին չի հաջողվում ադրբեջանցիների սադրանքները զսպել, ՀՀԿ-ական քաղաքական գործիչը պատասխանեց. «Ես ռուս խաղաղապահների փոխարեն չեմ կարող, բայց ինձ հայտնի չէ աշխարհում որևէ խաղաղապահի կոնտինգենտ, որը 100 տոկոսով կարողանում է իր վրա դրված պարտականությունները կատարել: Ինձ համար անհասկանալի և անընդունելի է անել հայտարարություններ, որ Արցախի ու Հայաստանի անվտանգությանը կսպառնա։

Ռուս խաղաղապահներն այստեղ հրավիրատոմսով չեն եկել, որ գնան, եթե չգային, ամբողջ Արցախը կլիներ Ադրբեջանի վերահսկողության տակ։ Սա փաստ է, որ Նիկոլ Փաշինյանն էլ է ասել»:

Նա չհանաձայնվեց այն դիտարկանը, որ  իշխանության մեջ  այսօր ավելի շատ ռուսամետությունն է. «Նրանք ոչ ռուսամետ են, ոչ արևմտամետ են, նրանք աթոռամետ են։ Պարզապես եթե այսօր իրենց աթոռի համար անհրաժեշտ է  սիրաշահել Արևմուտքին,  կսիրաշահեն Արևմուտքին, եթե անհրաժեշտ է  սիրաշահել հյուսիսին, կսիրաշահեն հյուսիսին… անհրաժեշտ է  սիրաշահել Ադրբեջանին ու Թուրքիային, կսիրաշահեն այդ երկրներին։ Այս մարդիկ գաղափարազուրկ,  ապազգային ուժ են»։

Էդուարդ Շարմազանովն ասաց, որ այս իրավիճակից ելքը իշխանափոխությունն է, բայց չգիտի՝ ինչպես։

«Հայաստանում ընդդիմությունը բավականին բազմաշերտ է: Իմ կոչը իմ ընդիմադիր գործընկերներին հետևյալն է՝ պահեք ձեզ ՀՀԿ-ի նման: Այսինքն՝ վերմակը ձեր վրա մի քաշեք, բոլորիս է վերաբերվում, և համախմբվեք գաղափարի շուրջ: Որովհետև եթե ամեն մեկս մեզ փոքրիկ Բոնապարտի տեղ ենք դնում, մարդիկ կարող են ասել, որ սա ոչ թե հայրենիքի փրկության խնդիր է, այլ իշխանության կռիվ է:  Դրա համար մենք ասել ենք, որ իշխանության ռևանշ չենք ուզում, մենք քաղաքականությունից կուշտ ենք, մեր խնդիրը մեր 30-ամյա երազանքն անվերապահ չկործանելն է»,- ասաց քաղաքական գործշիչը։

Նա նաև նշեց, որ այս իշխանություն կոչվածը Նիկոլ Փաշինյանի գլխավորությամբ,  հայեցակարգային առումով դեմ է երրորդ հանրապետության ծնունդի հայեցակարգին.

«Երրորդ հանրապետությունը ղարաբաղյան շարժման ծնունդ է, անկախության հռչակագրի ծնունդ է,  իսկ անկախության հռչակագրում ցեղասպանության միջազգային դատապարտումը բոլոր իշխանությունների սուրբ պարտականությունն էր։ Այս մարդիկ մսխեցին  ղարաբաղյան շարժումը, չեն խոսում ինքնորոշման իրավունքի իրացման և Շուշին հայկական լինելու մասին, իսկ Ցեղասպանության միջազգային ճանաչումն էլ… Արարատ Միրզոյանի վերջին այցն էլ ձեզ վկա.  չեմ լսել, որ այնտեղ Ցեղասպանության միջազգային ճանաչման մասին խոսք լիներ»։