Arcakh24.info-ի գլխավոր խմբագիրը մանրամասներ է ներկայացնում. «Տեղի ունեցածն առևանգում է»
Արցախում գործող Arcakh24.info լրատվական կայքը երեկ տեղեկություն էր հրապարակել, որ «առևանգվել են կայքի գլխավոր խմբագիրը Մարատ Եգանյանը և կայքի թղթակից Անդրանիկ Հակոբյանը»։
«Արայիկ Հարությունյանի անմիջական հրամանով կայքի աշխատակիցներն առևանգվել են, մասնավորապես, վերջին շրջանում բարձրաձայնված խնդրահարույց տեղեկությունների անդրադարձի պատճառով։ Խախտելով զանգվածային լրատվության մասին ԱՀ օրենքը կայքի գլխավոր խմբագիրը և թղթակիցը առևանգվել են առանց որևէ պարզաբանման»,- գրել էր կայքը։
Ավելի ուշ Մարատ Եգանյանը հայտնել էր. «Այս պահին արդեն գտնվում եմ մեր տանը: Իսկապես տեղի է ունեցել առևանգում ոստիկանության բարձրաստիճան աշխատակիցների մասնակցությամբ` արայիկ հարությունյանի անմիջական ցուցումով (այլ խոսք չեմ գտնում)»։
Այսօր ֆեյսբուքյան ուղիղ եթերում Մ. Եգանյանը պատմում է, որ ֆեյսբուքում գրառման էր հանդիպել, որ մի քանի անձով պատրաստվում են գնալ հրապարակ, պահանջել, Արայիկ Հարությունյանը իջնի ժողովրդի մոտ ու պատասխանի մարդկանց հուզող հարցերին։ Նա ասում է, որ չի ընդունել և չի ընդունում Արայիկ Հարությունյանին որպես Հանրապետության նախագահ, սակայն ստեղծված իրավիճակում ճիշտ է համարել իջնել հրապարակ և տեղեկանալ, թե ինչ է սպասվում իրենց, ինչ գործողություններ է իրականացնում Ա. Հարությունյանը։
«Ունեի մի քանի հարց, որոնք ուզում էի ուղղել Արայիկ Հարությունյանին։ Հրապարակում մարդիկ հավաքվել էին, տարբեր փոքր խմբերով էին։ Սկսվեց շրջանառվել տեղեկություն, որ Արայիկ Հարությունյանը չի իջնելու ժողովրդի մոտ։ Ժողովուրդը հուսալքված ուզում էր հեռանալ։ Ես դիմեցի ժողովրդին՝ եթե չի ուզում իջնի ժողովրդի մոտ, թող ժողովուրդը գնա Արայիկ Հարությունյանի մոտ։ Մեծամասնությունն ինձ հետ համաձայնվեց, մենք ուղղվեցինք դեպի նախագահական նստավայր։ Մեր ճանապարհը երեք շարքով փակեցին անվտանգության աշխատակիցները։ Նախագահի նստավայրը շատ ավելի լավ է պաշտպանվում, քան մեր գյուղերը թշնամուց։
Ահագին սադրանքներ տեղի ունեցան, փորձում էին այնպես անել, որ մեր նպատակին չհասնենք, չփորձենք անհանգստացնել Արայիկ Հարությունյանին, բայց ժողովուրդը սադրանքների չգնաց, չլռեց։ Իջան տարբեր պաշտոնատար անձինք, փորձեցին ապակենտրոնացնել ժողովրդի ինքնաբուխ հավաքը, սակայն չհաջողվեց»,- պատմում է նա։
Նրա ներկայացմամբ, այնտեղ հայտարարվեց, որ Ա. Հարությունյանը կիջնի մեկ պայմանով, եթե Մարատ Եգանյանը հարց չտա, ակտիվություն չցուցաբերի։ Այնուհանդերձ, նա եկել է հանդիպման ժողովրդի հետ։
«Հնչում էին Արայիկ Հարությունյանի համար ոչ հաճելի հարցեր։ Շատ անհարգալից վերաբերմունք էր ցուցաբերում ժողովրդի հետ խոսելիս։ Ասում էր՝ լռեք, հիստերիկ տպավորություն էր թողնում, կարծես փորձում էր կամ վախեցնել, կամ ցույց տար, որ լուրջ է մտադրված։ Արգելել էր նկարահանել։
Հարց էի տալիս, Հարությունյանը վիրավորական ձևով ասաց՝ սուս արա մի հատ, ես ասացի՝ դու լռի։ Այդ պահին երկու կողմից բռնեցին ձեռքերս, քաշում էին այս կողմ, այն կողմ։ Չորս կողքս ոստիկաններ էին։ Թիկունքիս հարվածեցին։ Ձեռքերս բռնած տարան, նստացրեցին մի մեքենայի մեջ, որը սկսեց քաղաքով քշել։ Թե որքան ժամանակ տևեց դա, չեմ կարող ասել։ Տարան ու քաղաքի մի ծայրամասում ինձ բաց թողեցին ու հեռացան։
Ինչո՞ւ եմ ասում առևանգում։ Դա բերման ենթարկում չէր, քանի որ այդ դեպքում պետք է տանեին ոստիկանական բաժանմունք, արձանագրություն կազմեին»,- պատմում է Մ. Եգանյանը։
Մանրամասները՝ տեսանյութում։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
