Ձեր վստահելի աղբյուրը

Ռուսաստանը ծայրահեղ մտահոգություն է հայտնել Լեռնային Ղարաբաղում աճող լարվածության կապակցությամբ։ ՏԱՍՍ-ի հաղորդմամբ, այս մասին նշված է ՌԴ արտաքին գործերի նախարարության հայտարարության մեջ։

«Մենք մեր ծայրահեղ մտահոգությունն ենք հայտնում Լեռնային Ղարաբաղում աճող լարվածության կապակցությամբ: Մարտի 26-ին Ռուսաստանի Դաշնության պաշտպանության նախարարության տեղեկատվական տեղեկագրում արձանագրված ռուսական խաղաղապահ զորակազմի՝ պատասխանատվության գոտի զինված ներթափանցման և հրադադարի ռեժիմի խախտման փաստերը հակասում է Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի հայտարարության դրույթներին»,- ասված է նախարարության հաղորդագրության մեջ։

ՌԴ ԱԳՆ-ն հայտնել է, որ ռուսական խաղաղապահ զորակազմը ձեռնարկում է անհրաժեշտ միջոցներ Լեռնային Ղարաբաղում իրավիճակը դեէսկալացնելու համար։

«Ռուսական խաղաղապահ կոնտինգենտի գծով, երկու կողմերի հետ համագործակցելով, անհրաժեշտ միջոցներ են ձեռնարկվում տարածաշրջանում իրավիճակի ապաէսկալացիայի համար»,- ընդգծել են դիվանագիտական գերատեսչությունում։

Ռուսաստանը  Լեռնային Ղարաբաղում հակամարտող կողմերին կոչ է անում զսպվածություն ցուցաբերել և ապահովել Ռուսաստանի, Հայաստանի և Ադրբեջանի ղեկավարների միջև եռակողմ պայմանավորվածությունների կատարումը։

«Մենք խստորեն կոչ ենք անում կողմերին զսպվածություն ցուցաբերել և ամենաբարձր մակարդակով ապահովել գործող եռակողմ համաձայնագրերի խստիվ պահպանումը», - ասվում է ՌԴ ԱԳՆ տարածած հայտարարության մեջ։