Ձեր վստահելի աղբյուրը

Սյունիքի մարզի ընդհանուր իրավասության դատարանը՝ դատավոր Գնել Գասպարյանի նախագահությամբ, հրապարկեց Գորիսի համայնքապետ Առուշ Առուշանյանի գործով դատավճիռը։

«Առուշ Առուշանյանն արդարացվեց»,- գրել է փաստաբան Էրիկ Ալեքսանյանը։ 

Առուշ Առուշանյանն ազատ արձակվեց դատարանի դահլիճից։

Դատավորն ընթերցեց դատավճիռը, որի համաձայն. «Ճանաչել և հռչակել Առուշ Առուշանյանի անմեղությունը ՔՕ 38-154.2 մաս 4 կետ 2-ով, 35-154.2 մաս 4 կետ 2-ով, ՔՕ 291-րդ հոդվածի 2-րդ մասով և ՔՕ 188-րդ հոդվածի 3 մաս 1 կետով  նախատեսված հանցանքի կատարման մեջ և նրան արդարացնել արարքներում  հանցակազմերի բացակայության հիմքով։

Առուշ Առուշանյանին մեղավոր ճանաչել ՔՕ 308-րդ հոդվածի (Պաշտոնեական լիազորությունները չարաշահելը) 1-ին մասով և որպես  պատիժ նշանակել՝ տեղական ինքնակառավարման մարմիններում ղեկավար պաշտոն զբաղեցնելու իրավունքից զրկել 5 տարի ժամկետով։

Առուշ Առուշանյանին մեղավոր ճանաչել ՔՕ 322-րդ հոդվածի (Ինքնիրավչությունը) 2-րդ մասով և նրա նկատմամբ պատիժ նշանակել տուգանք՝ նվազագույն աշխատավարձի 700-ապատիկի չափով։

Առուշ Առուշանյանին մեղավոր ճանաչել ՔՕ 113–րդ հոդվածով (Դիտավորությամբ առողջությանը միջին ծանրության վնաս պատճառելը), նրա նկատմամբ պատիժ նշանակել ազատազրկում 1 տարի  3 ամիս ժամկետով։  Ազատազրկում նշանակված պատժի ժամկետի մեջ  հաշվարկել արգելանքի  տակ գտնվելու ժամկետը՝ 8 ամիս 12 օր և վերջնական պատիժ թողել 6 ամիս 18 օր ժամկետով։ 

Ազատազրկման ձևով նշանակված պատիժը պայմանականորեն չկիրառել և սահմանել փորձաշրջան 1 տարի 6 ամիս ժամկետով։

Բավարարել Առուշ Առուշանյանի պաշտպանի միջնորությունը և  ամբաստանյալի  նկատմամբ ընտրված խափանման միջոց կալանավորումը փոփոխել, կիրառել որպես խափանման միջոց  չհեռանալու մասին ստորագրությունը մինչև դատական  վճիռն օրինական ուժի մեջ մտնելը և վերջինիս անհապաղ ազատ արձակել դատական նիստերի դահլիճից»։

Մեղադրական եզրակացության համաձայն. «Առուշ Առուշանյանին մեղադրանք է առաջադրվել այն բանի համար, որ նա 2021 թվականի հունիսի 20-ին Հայաստանի Հանրապետությունում կայացված Ազգային ժողովի արտահերթ ընտրությունների նախընտրական քարոզարշավի ընթացքում ուղղակի դիտավորությամբ նախապատրաստել է ծանր հանցագործություն՝ ընտրություններին մասնակցելու և Հայաստան դաշինքի օգտին կողմ քվեարկելու համար երկու կամ ավելի ընտրողի կաշառք տալը, սակայն նրա կամքից անկախ հանգամանքներով հանցագործությունն ավարտին չի հասցվել:

Բացի այդ, Առուշ Առուշանյանը, սոցիալապես անապահով վիճակում գտնվելու փաստով պայմանավորված կախվածության մեջ գտնվելն օգտագործելով, Գորիս համայնքի Քարահունջ բնակավայրի վարչական ղեկավար Լուսինե Ավետյանի միջոցով կազմակերպել է նույն բնակավայրի երկու և ավելի ընտրողի 2021 թվականի հունիսի 20-ին կայանալիք ՀՀ Ազգային ժողովի արտահերթ ընտրություններին մասնակցելուն և Հայաստան դաշինքի օգտին կողմ քվերակելուն հարկադրելը:

Բացի այդ, 2021 թվականի ապրիլի 28-ին Առուշ Առուշանյանի պահանջով Լուսինե Ավետյանը կազմակերպել է նրա հանդիպումը Քարահունջ բնակավայրի մի շարք բնակիչների, այդ թվում՝ Սաթենիկ Սինանյանի, Նարինե Արզումանյանի, Լիանա Մկրտչյանի, Ալինա Օհանջանյանի և Նաիրա Սարգսյանի հետ, ովքեր Առուշ Առուշանյանից տարբեր խնդիրների լուծման համար դրամական աջակցություն են խնդրել: Այնուհետև Գորիս համայնքի ղեկավարի տեղակալի 2021 թվականի մայիսի 5-ի թիվ 265-Ա որոշման հիման վրա Սաթենիկ Սինանյանի որդուն՝ Հարութ Սինանյանին, Նարինե Արզումանյանի, Ալինա Օհանջանյանին և Նաիրա Սարգսյանին բանկային փոխանցման միջոցով տրամադրվել է 100000-ական ՀՀ դրամ, իսկ Լիանա Մկրտչյանին՝ 220000 ՀՀ դրամ:

Հետագայում՝ նախընտրական քարոզարշավի ընթացքում, Սյունիքի մարզի Գորիս համայնքի ղեկավար Առուշ Առուշանյանը, Հայաստանի դաշինքի օգտին Սյունիքի մարզի Գորիս համայնքի ընտրողներից առավելագույն քվեներ ապահովելու և ընտրություններում ցանկալի արդյունք արձանագրելու անձնական և խմբային շահերից ելնելով, կազմակերպել է սոցիալապես անապահով վիճակում գտնվելու փատով պայմանավորված կախվածության մեջ գտնվող երկու և ավելի ընտրողներին ընտրությանը մասնակցելուն և Հայաստան դաշինքի օգտին կողմ քվերակելուն հարկադրելը»։