Ձեր վստահելի աղբյուրը

«Ի հաշիվ արտաքին աղբյուրների, մենք կարողացանք հաջողությամբ 750 մլն դոլար ծավալով միջոցներ տեղաբաշխել եվրատոմսերում»,- ԱԺ տնտեսական հարցերի մշտական հանձնաժողվում հայտնեց ֆինանսների նախարար Տիգրան Խաչատրյանը՝ զեկուցելով ՀՀ կառավարության 2022 թվականի փետրվարի 28-ի «Հայաստանի Հանրապետության կառավարության ծրագրի (2021-2026 թթ.) 2021 թվականի կատարման ընթացքի և արդյունքների զեկույցի մասին» N 234-Ա որոշմամբ հավանության արժանացած զեկույցի՝ իր ղեկավարած գերատեսչության հատվածը:

Նրա խոսքով՝ այդ եվրաբոնդերն իրենց եկամտաբերության ցուցանիշով նախորդ բոլոր թողարկումների նկատմամբ զգալի բարձր ցուցանիշներով են եղել, տեղաբաշխել է 750 միլիոն դոլար ծավալով, 3.6% արժեկտրոնի եկամտաբերությամբ եվրապարտատոմսեր։ Տեղաբաշխման եկամտաբերությունը կազմել է 3.875%:

Խոսելով արտաքին պարտքի մասին՝ Տիգրան Խաչատրյանն ասաց, որ անհրաժեշտություն են ունենալու առաջիկա տարիներին էլ ներգրավել փոխառու միջոցներ:

Ըստ նախարարի՝ 2020թ. կառավարության պարտքը կազմել է ՀՆԱ-ի 63.5%, իսկ 2021 թվականին այն հասցվել է 60.3%, որը թվային տեսքով 4 տրիլիոն 210 մլրդ դրամ է կամ  8 մլրդ 261 մլն ԱՄՆ դոլար:

Տնտեսական հարցերի հանձնաժողովի նիստում ՀՀ ֆինանսների նախարար Տիգրան Խաչատրյանը նշեց, որ կարևորվում են պետական, մասնավորապես՝ կառավարության պարտքի կառավարման հետ կապված հարցերը:

«Չենք պատրաստվում ու չենք կարծում, որ պարտքը կարելի է անկառավարելի ձևով ավելացնել: Պարտք պետք է վերցնել միայն, երբ դրա անհրաժեշտությունը հստակ է, և վերադարձման կարողություններն առկա են: Այսինքն՝ մենք միշտ մեր հնարավորությունները պետք է համադրենք այն պարտքի ներգրավման որոշումների հետ, որոնք վերաբերում են մեր ընթացիկ անելիքներին»,-հայտարարեց Խաչատրյանը և նշեց, որ այդպես էլ գործադիրում կայացնում են որոշումները։

Նախարարի խոսքով՝ Կառավարությունը 2021-2026 թվականների համար ընտրել է պարտքի կառավարման հստակ ռազմավարություն: