Ձեր վստահելի աղբյուրը

Ուկրաինայում հատուկ ռազմական գործողության հիմնական խնդիրները, ընդհանուր առմամբ, կատարվել են: Այդ մասին հայտարարել է ՌԴ պաշտպանության նախարար Սերգեյ Շոյգուն, որի խոսքերը մեջբերել է «ՌԻԱ նովոստին»։

«Նախ՝ Ուկրաինայի տարածքում ՌԴ ԶՈւ հատուկ ռազմական գործողության ընթացքի մասին: Ընդհանուր առմամբ, օպերացիայի առաջին փուլի հիմնական խնդիրները կատարված են, Ուկրաինայի զինված ուժերի մարտունակությունն էականորեն նվազել է, ինչը մեզ թույլ է տալիս կենտրոնացնել մեր ուշադրությունն ու ջանքերը հիմնական նպատակի՝ Դոնբասի ազատագրման վրա»,- ասել է Շոյգուն երեքշաբթի օրը կայացած գործավարական խորհրդակցության ժամանակ։

Նա հավելել է, որ ուկրաինական բանակը զգալի կորուստներ է կրել։

«Ուկրաինայի զինված ուժերը էական վնասներ են կրել: Օդային գերակայություն է ձեռք բերվել, գործնականում ոչնչացվել են օդուժը և հակաօդային պաշտպանության համակարգերը: Երկրի ռազմածովային ուժերը գործնականում դադարել են գոյություն ունենալ, զգալի կորուստներ են կրել բոլոր ցամաքային և օդադեսանտային զորքերը»,- ասել է նա։