Սամվել Ալեքսանյանի՝ ինքնակամ կառուցած տան ճակատագիրը
Գործարար Սամվել Ալեքսանյանը, որը հանրությանն առավել հայտնի է «Լֆիկ Սամո» մականունով, երեք հայց է ներկայացրել վարչական դատարան՝ պահանջելով անվավեր ճանաչել քաղաքապետարանի որոշումներն ու օրինականացել պետական սեփականություն հանդիսացող հողամասերում իր կողմից կառուցված ինքնակամ շինությունները։
Քաղաքապետարանը որոշել է չօրինականացնել հայտնի գործարարին պատկանող ինքնակամ շինությունները։ Վարչական դատարան հայցերը ներկայացվել են 2020-ին՝ մայիսի 25-ին ու սեպտեմբերի 16-ին։
Հիշեցնենք, որ մարտի 21-ին գործակարգավարական խորհրդակցության ժամանակ քաղաքապետ Հրաչյա Սարգսյանը հայտարարեց, որ ինքնակամ շինությունները չեն օրինականացվելու։
«Ես ենթադրում եմ, որ ինչ-որ մարդիկ քաղաքապետարանում ինչ-որ բան են խոսք տալիս այդ մարդկանց։ Ես ձեզ հիմա պաշտոնապես հայտարարում եմ, ինքնակամ կառույցները չենք օրինականացնելու, պրծավ»,-ասաց Հրաչյա Սարգսյանը, երբ փրկարար ծառայության ներկայացուցիչը զեկուցեց, որ նախորդ շաբաթվա ընթացքում ինքնակամ շինությունների մասին 4 ահազանգ են ստացել։
Այս հայտարարությունից հետո Panorama.am-ը սկսեց ուսումնասիրել, թե ի՞նչ ճակատագրի են արժանացել չօրինականացված ինքնակամ շինությունները։
Սամվել Ալեքսանյանը պետական սեփականության հանդիսացող մոտ 9 հա հողատարածքում ինքնակամ շինություններ է կառուցել
2020 թ. սեպտեմբերի 16-ին Երևանի քաղաքապետը կայացրել է «Երևան քաղաքի Մալաթիա-Սեբաստիա վարչական շրջանի Շրջանային փողոցի հ.102/4 հասցեի հետնամասում գտնվող ինքնակամ կառույցները քանդելու պետական սեփականություն հանդիսացող հողամասերն ապօրինի տիրապետումից ազատելու մասին» որոշումը։ Դրա ներքո ստորագրել է Երևանի նախկին քաղաքապետ Հայկ Մարությանը։
Իրավական այս ակտից պարզ է դառնում, որ պետական սեփականություն հանդիսացող հողամասում Սամվել Ալեքսանյանի կողմից դեռ 2005-ին իրականացվել են ապօրինի շենք-շինությունների կառուցման շինարարական աշխատանքներ։
Նախկին քաղաքապետը որոշել է՝ չօրինականացնել ինքնակամ կառուցված շենք-շինությունները, հանձնարարել Երևան քաղաքի Մալաթիա-Սեբաստիա վարչական շրջանի ղեկավարին՝ Երևանի քաղաքապետարանի աշխատակազմի քաղաքաշինության և հողի վերահսկողության վարչության ու հասարակական կարգի պահպանության ծառայության օժանդակությամբ քանդել Շրջանային փողոցի հ.102/4 հասցեի հարևանությամբ կառուցված ինքնակամ շենք-շինություններն ու ապօրինի տիրապետումից ազատել պետական սեփականություն հանդիսացող հողամասը:
Ըստ քարտեզի, ենթադրվում է, որ խոսքը Սամվել Ալեքսանյանի առանձնատան մասին է։
Մարությանի որոշումից 9 օր անց Երևանի ավագանու անդամ Գայանե Մելքոմ-Մելքոմյանը, որը 2020-ի դեկտեմբերին ընտրվեց փոխքաղաքապետ, ֆեյսբուքյան իր էջում մի նկար է հրապարակում ու գրում.
«Այս նկարում երևացող շինությունները կառուցվել են ապօրինաբար՝ զավթելով Դալմայի այգիների պահպանվող տարածքում ներառված, մոտ 9 հա անտառային նշանակության պետական հողեր։«Դրանք «աննկատ» կառուցվել ու մոտ 15 տարի մայրաքաղաքի մեջ անհետևանք կանգնած են մնացել։
Օրերս Երևանի քաղաքապետ Հայկ Մարությանը որոշում է կայացրել շինությունները քանդելու և պետական հողամասն ապօրինի տիրապետումից ազատելու մասին: Որոշումը բողոքարկել է ինքնակամ կառույցներն իրականացրած անձը՝ Սամվել Ալեքսանյանը»։
Որոշումը կայացնելուց երկու օր անց՝ սեպտեմբերի 18-ին Սամվել Ալեքսանյանը հայց է ներկայացնում վարչական դատարան Երևանի քաղաքապետի 16.09.2020թ. թիվ 2898-Ա որոշումն անվավեր ճանաչելու պահանջով։
Դատական տեղեկատվական համակարգում հրապարակված նյութերի համաձայն, դատավոր Ռուզաննա Ազրոյանը 2021թ. ապրիլի 30-ին բավարարում է Ալեքսանյանի հայցը։ Քաղաքապետարանը դիմում է վերաքննիչ դատարան՝ նշելով, որ հայցի դեմ առարկում է ամբողջությամբ:
2022 թվականի փետրվարի 2-ին Վերաքննիչ դատարանը (հետևյալ կազմով՝ նախագահող դատավոր Քրիստինե Մկոյան, դատավոր Արման Թովմասյան, դատավոր Արթուր Առաքելյան) քաղաքապետարանի բողոքը մերժել է ամբողջությամբ` դատական ակտը թողնելով օրինական ուժի մեջ։
Քաղաքապետարանն այս տարվա մարտի 4-ին դիմել է վճռաբեկ դատարան՝ գործն ըստ էության լուծող դատական ակտի դեմ։ Գործը ստացվել է մարտի 23-ին, զեկուցող դատավորն է Գոռ Գագիկի Հակոբյանը։
Նույն հասցեի ինքնակամ կառույցի ու պարիսպի քանդման որոշման դեմ ևս Ալեքսանյանը հայց է ներկայացրել
Մինչ այդ՝ 2020թ. մայիսի 25-ին հայտնի գործարարը դիմել է վարչական դատարան՝ պահանջելով անվավեր ճանաչել քաղաքապետարանի 15.05.2020 թվականի թիվ Վ-19/5 որոշումը։
Ըստ Դատալեքսում հրապարակված նյութերի, քաղաքապետարանը հայցվորին առաջարկել է քանդել Շրջանային փողոց 102/4 հասցեի ետնամասում վերջինիս կողմից ինքնակամ կառուցված քարե շինությունները և պարիսպը, պահանջը չկատարվելու դեպքում, Վարչական իրավախախտումների վերաբերյալ ՀՀ օրենսգրքի 48-րդ հոդվածի համաձայն, կկազմվի համապատասխան արձանագրություն:
Ըստ հայցվորի, առնվազն 05.03.2020 թվականի դրությամբ պատասխանողը տեղյակ է եղել ենթադրյալ իրավախախտման մասին, հետևաբար, ՎԻՎ Օրենսգրքի 37-րդ հոդվածի համաձայն՝ Օրենսգրքի 48-րդ հողվածով սահմանված իրավախախտման համար հայցվորին վարչական պատասխանատվության ենթարկելու վերաբերյալ որոշումը կարող էր կայացվել առավելագույնը մինչև 05.05.2020 թվականը, մինչդեռ, վիճարկվող վարչական ակտը կայացվել է 15.05.2020 թվականին:
Պատասխանողը հայտնել է, որ տվյալ դեպքում Երևանի քաղաքապետարանի աշխատակազմի համապատասխան աշխատակցի կողմից 05.05.2020 թվականին կազմվել է թիվ 034038 արձանագրությունը, համաձայն որի՝ քաղաքացի Սամվել Լիմինդրի Ալեքսանյանի կողմից թույլ է տրվել օրենսգրքի 48-րդ հոդվածի 1-ին մասով նախատեսված վարչական իրավախախտում, այն է՝ վերջինիս կողմից Շրջանային փողոցի հ. 102/4 հասցեի ետնամասում, առանց հողօգտագործման իրավունքի պետական գրանցման, ինքնակամ զավթվել է Երևան համայնքին սեփականության իրավունքով պատկանող հողատարածքը:
Նշվածի հիման վրա՝ Երևանի քաղաքապետարանի աշխատակագմի վարչական իրավախախտումների վերաբերյալ գործերի քննության բաժնի պետի 15.05.2020 թվականի «Վարչական տույժ նշանակելու մասին» թիվ Վ-19/5 որոշմամբ քաղաքացի Սամվել Լիմինդրի Ալեքսանյանի նկատմամբ, Օրենսգրքի 48-րդ հոդվածի 1-ին մասով, կիրառվել է վարչական տույժ՝ 200.000 ՀՀ դրամ գումարի չափով:
«Պատասխանողը գտնում է, որ հայցն անհիմն է և խնդրել է այն մերժել ամբողջությամբ»,-տեղեկանում ենք Դատալեքսից։
Դատավոր Մերի Համբարձումյանը հոկտեմբերի 27-ին մերժել է Ալեքսանյանի հայցը։ Նոյեմբերի 23-ին Ալեքսանյանը բողոք է ներկայացրել վերաքննիչ վարչական դատարան։ Որոշումը կհրապարակվի ապրիլի 13-ին՝ ժամը 17։15-ին։
Ալեքսանյանը պահանջում է օրինականացնել ինքնակամ շինությունները։
2020-ի մայիսի 25-ին Ալեքսանյանը ևս մեկ հայց է ներկայացրել Վարչական դատարան՝ ՀՀ կառավարության 18.05.2006թ. թիվ 912-Ն որոշմամբ սահմանված կարգով ք.Երևան, Շրջանային 102/4 հասցեի ետնամասում գտնվող Սամվել Ալեքսանյանի կողմից ինքնակամ կառուցված շինությունները օրինական ճանաչելու վերաբերյալ բարենպաստ վարչական ակտ ընդունելուն պարտավորեցնելու պահանջով։
Հայցվորը նշել է՝ գտնում է, որ «հայցվորի կողմից կառուցված հիշյալ ինքնակամ շինությունները չօրինականացնելու համար վերը նշված կարգով սահմանված հիմքերն առկա չեն, ուստի գտնում է, որ դրանք ենթակա են օրինականացման:
Ելնելով վերոգրյալից` խնդրել է պարտավորեցնել Երևանի քաղաքապետարանին ընդունել բարենպաստ վարչական ակտ, այն է` ՀՀ կառավարության 18.05.2006 թվականի N 912-Ն որոշմամբ սահմանված կարգով օրինական ճանաչել ք. Երևան, Շրջանային փողոց 102/4 հասցեի ետնամասում գտնվող Սամվել Ալեքսանյանի կողմից ինքնակամ կառուցված շինությունները»։
Պատասխանողը հակադարձել է՝ գրությամբ հայցվորին հայտնվել է, որ քննարկման առարկա հանդիսացող շինություններով ծանրաբեռնված հողամասերի գերակշիռ մասն ընդգրկված է հողային օրենսգրքի 60-րդ հոդվածով նախատեսված սահմանափակումների ցանկում, ուստի քաղաքացիական օրենսգրքի 188-րդ հոդվածի 5-րդ մասի 2-րդ կետի համաձայն` դրանք ենթակա չեն օրինականացման:
Երևանի քաղաքապետարանի աշխատակազմի ճարտարապետության և քաղաքաշինության վարչության 09.03.2020 թվականի հ. 18-06/270 եզրակացության համաձայն` Շրջանային փողոցի հ.102/4 հասցեին կից գտնվող պետական սեփականություն հանդիսացող 7.69 հա և 1.04 հա հողատարածքները ՀՀ կառավարության 27.03.2003 թվականի «Երևանի Դալմայի այգիների պահպանման ենթակա հողերի սահմանների և նպատակային նշանակության փոփոխության մասին» հ.1941-Ա որոշման համաձայն ընդգրկված են անտառային նշանակության հողերում, իսկ ինչ վերաբերում է համայնքային սեփականություն հանդիսացող 0.73 հա և 0.28 հա հողատարածքներին, ապա քննարկվող հողատարածքներում շինություններ առկա չեն, ուստի օրինականացման գործընթաց ՀՀ կառավարության 18.05.2006 թվականի «Ինքնակամ կառույցների օրինականացման և տնօրինման կարգը հաստատելու մասին» 912-Ն որոշման շրջանակներում չի կարող քննարկվել:
Դատավոր Ս. Հավոկիմյանն այս տարվա փետրվարի 24-ին բավարարել է Սամվել Ալեքսյանյանի հայցը։ Քաղաքապետարանը դիմել է Վերաքննիչ դատարան...
Ի դեպ, քաղաքապետարանի դեմ ներկայացրած հայցեր ունի նաև Սամվել Ալեքսանյանի կինը։ Պահանջը նույն է՝ նրա կողմից ինքնակամ կառուցված շենքերը և շինություները օրինական ճանաչելուն պարտավորեցնելը։ Այս անգամ այդ շինությունները Ալեքսանյանի ընտանիքին պատկանող «Փարվանա» ռեստորանի մոտ են։
Դատական այդ վեճերի մասին՝ հաջորդ հրապարակման մեջ։
Panorama.am-ը գրավոր հարցում է ուղարկել քաղաքապետարան՝ հետաքրքրվելով, թե քանի՞ ինքնակամ կառույցի օրինականացման դիմում է ստացել քաղաքային իշխանությունը, չօրինականացնելու դեպքում ի՞նչ ճակատագիր է սպասվում դրանց և այլն։
Լրահոս
Տեսանյութեր
Ուզում են երկիրը Հյուսիսային Կորեա սարքեն, մենք էլ դառնանք իրենց համբալները. Բողոքի ակցիա
