Ձեր վստահելի աղբյուրը

Երեկ Օսլոյում կայացած Նորվեգիա-Հայաստան ընկերական հանդիպումն ավարտվեց մեր ընտրանու ջախջախիչ պարտությամբ՝ 0:9 հաշվով: Սա Հայաստանի հավաքականի՝ իր պատմության ընթացքում կրած ամենախոշոր հաշվով պարտությունն էր։

Հայաստան գլխավոր մարզիչ Խոակին Կապառոսը, Հայաստանի ֆուտբոլի ֆեդերացիան, Հայաստանի ազգային հավաքականի մարզչական շտաբն ու ֆուտբոլիստները ներողություն են խնդրել բոլոր երկրպագուներից այս արդյունքի համար։

Սակայն երկրպագուներին այնքան էլ այդ ներողությունը, կարծես թե, չեն  ընդունում, ինչի մասին են վկայում հենց Հայաստանի ֆուտբոլի ֆեդերացիայի ֆեյսբուքյան էջի՝ քննադատական,  հուսահատական, ծաղրական գրառումները։

«Իտալիայից կրած պարտությունից հետո, ամբողջ մարզչական շտաբը և ամբողջ ՀՖՖ գործկոմը հրաժարական տվեց, այնպես որ սպասում եմ հրաժարականների»,- գրել է օգտատերերից մեկը։

«Աբրահամ Խաշմանյանը, որ 1-9 պարտվեց Իտալիային, հոգին քրքրեցին էդ մարդու: Սպասում եմ…
Իտալիայի հետ խաղն էլ բան չէր նշանակում, բայց Խաշմանյանը հրաժարական տվեց: Իրեն սարքեցին քավության նոխազ: Ինչա թե Կապառոսը 5 խաղ ա հաղթել, իրան կարելի ա ներել հա՞»,- գրել է մարզական մեկնաբան Ռոբերտ Գասպարյանը։

Հիշեցնենք, որ 2019 թ. նոյեմբերի 18-ին ԵՎՐՈ 2020-ի որակավորման խմբային փուլի տասներորդ տուրի Իտալիա-Հայաստան հանդիպմանը  Հայաստանի հավաքականը պարտվել էր 1:9 հաշվով:

Ռ.Գասպարյանը նաև հարցադրում է արել. «Էսքանից հետո ՀՖՖ նախագահի և/կամ գլխավոր մարզչի հրաժարականը պահանջել չի՞ կարելի։ Թե՞ կարմիր քարտը կամ ընկերական խաղի հանգամանքը կարելի ա համարել մեղմացուցիչ»։

2019 թ. դեկտեմբերի 23-ից ՀՖՖ նախագահն է Արմեն Մելիքբեկյանը։ 

«Նորմալ երկրում, երբ նման հաշիվ է գրանցվում, մարզիչը անմիջապես հրաժարական է տալիս, բայց ոչ մեր դեպքում...մենք մարսեցինք Արցախի մեծ մասի կորուստը ու դեռ շարունակում ենք մարսել այդ թվում Հայաստանի սուվերեն տարածքների: Ֆուտբոլը ինչ է, որ չմարսենք»,- գրել է մեկ այլ օգտատեր։

Տնտեսագիտության թեկնածու, ՀՊՏՀ «Ամբերդ» հետազոտական կենտրոնի հետազոտող Համազասպ Գալստյանը գրել է. «Մեծից փոքր հրաժարական տվեք, ֆեդերացիան լրիվ լուծարեք ու նորից հավաքեք։ Բազմաթիվ ստորացումները արդեն չափից դուրս են։ Հերիք ա։ Էդ տղեքի համար էլ, մի հատ նորմալ, ծամոն չծամող ու մեզ չթերագնահատող մարզիչ բերեք, թեկուզ հայ։

Հլը մի հատ էլ ձոն-հայտարարություն եք գրում, թե բա եսիմ ինչ, մենք միասնական պիտի լինենք։ Արա, դուք 9-0 բերանո՞վ եք ասում, բա էդքան ստորանալ կլինի՞։ Դուք նորմա՞լ եք մտածում, թե ձեզ թվում ա ներողությունը բավարար ա։ Էդ ներողությունը, էդ ինքնահավան իսպանացին սարքել ա խասյաթ։ Դուք էլ ընկել եք նրա ջրերը։ Դրան տված փողերով գյուղերում մի 8-10 հատ մանկական մարզադաշտ կսարքեիք։ Հերիք ա փողերը քամուն տաք։ Դուրս եկեք ձեր սարքած ճռտոյի դուքանից, աշխարհը փոխվել ա... Ոտներդ ձեր ուժի գյորա գցեք, որ գոնե նվիրված երկրպագու դաստիարակեք, ոչ թե պարտությունից հետո մի բան էլ ուրախացած պոֆիգիստ մարդկանց ամբոխ։ Ամոթ ա, ա-մո՜թ»։

«Ո՞ր թույլ, պարտված, ընկճված, անտերության մատնված երկիրն ունի ուժեղ հավաքական, պետք չի տղաներին մեղադրել»,- գրել է մեկ այլ երկրպագու։

«Անկախ խաղի ընթացքը ոնց էր ընթանում, ցավալի էր տեսնել ֆուտբոլիստների, ովքեր կրում էին ազգային հավաքականի մարզաշապիկ, բայց չունեին այդ գիտակցումը, կանգնած նայում էին, թե ինչպես են իրենց անցնում ու գոլ խփում, դա ամենացավալին էր, դա ոչ բոլոր ֆուտբոլիստներին է վերաբերում»,- նման գրառում է արել մեկ այլ օգտատեր։

Ծաղրական մեկնաբանությունների պակաս նույնպես չկա.

«Ասում են Նորվեգիայի դարպասապահը 20-րդ րոպեից հետո լքել է դաշտը ու խաղին հետևել է տնից»։

«Գնացինք Օսլո, քաղաքը տեսանք, Հալանդին տեսանք մոտիկից, 9 գոլ կերանք, պատմության մեջ մտանք, հետ եկանք»։

«Միակ սփոփանքն այն է, որ նոր ռեկորդ խփեցինք»։

«Եկեք պայմանավորվենք, անկախ ամեն ինչից մենք մեզ պարտված չենք համարելու, մենք մեզ պարտված չենք համարելու»։

«Ջան, տղերք ջան, զատո գինեսի գրքում կգրանցվենք»։

«Հալալա տղերքին։ Մինչև վերջ պայքարեցին ու չթողեցին, որ 10-րդը խփեն։»։

Օգտատերերը հիշել են նաև Նիկոլ Փաշինյանի հայտարարությունը, որ ֆուտբոլի ազգային հավաքականը մինչև 2050-ը պետք է դառնա աշխարհի կամ Եվրոպայի առաջնության մրցանակակիր։

«Իր ասածի հակառակն է սովորաբար կատարվում, քիչ- քիչ հակառեկորդների չեմպիոն ենք դառնում»։

«Տղերք ջան դուխներդ չգցեք, վերևներից ասել են, որ դուք մինչև 2040 թիվը աշխարհի չեմպիոն եք դառնալու»։

Երկրպագուները պահանջում են գլխավոր մարզիչ Խոակին Կապառոսի հրաժարականը։

«Ներողություն է խնդրում ու հրաժարական չի տալիս, քանի որ համ լավ փող են տալիս, համ էլ Մելիքբեկյանը իսպանական ֆուտբոլի երկրպագու է՞»։

«Իհարկե սկզբունքորեն Կապառոսը պետք է հեռացվի, եթե չհեռացվի հենց ինքը քթի տակ կխնդա մեր վրա։ Կապառոսի կարիերային եթե ուշադիր եք հետևել, ինքը ցանկացած թիմում աշխատանքի սկզբում որոշակի արդյունք ա ցույց տվել, բայց դա եղել ա շատ կարճ ու հետո շատ վատ արդյունքներով հեռացվել։ Իսկ մեր հավաքականում ինքը շատ վաղուց սպառվել ա։ Բայց եթե անգամ սպառված չլիներ ու իմանայինք որ դեռ անելիք ունի մեր հավաքականում, միևնույնն է էս խայտառակությունից հետո նրան հեռացնելը սկզբունքային հարց է։

Ես հարգում եմ Հայաստանի հավաքականին ու հենց դրա համար կողմ եմ, որ այս պարտությունից հետո հեռացվի։ Չնայած մեջս մի քիչ ունեմ հավատ, որ նա պրոֆեսիոնալ է, և չի սպասի որ իրան հեռացնեն ու հրաժարական կտա»,- գրել է օգտատերերից մեկը։ 

Օգտատերեը բողոքում են նաև մանկապատանեկան ֆուտբոլում առկա իրավիճակից։

«Մանկապատանեկան ֆուտբոլում, որ էտ մարզիչներն ունեք, դուք վաղը, մյուս օրը 15-20 գնդակի տարբերությամբ եք պարտվելու: Վերացրեք ծանոթ, բարեկամ կեղտոտ հասկացությունը մանկապատանեկան ֆուտբոլում: Դա ձեր համար բիզնես չի: Երկիր եք ներկայացնում, լուրջ նայեք էտ հարցին»,- գրել է օգտատերեից մեկը։

Որպես արձագանք մեկ այլ օգտատեր նշել է. «Կառավարություն կոչվածը լուրջ չի նայում, ուր մնաց  թե ֆեդերացիան, սաղ էլ սրանք մեր հարկերի հաշվին ապրող սողուներ են»։

Մեկ այլ երկրպագու գրել է. «Մինչև մենք մասնագետներ չունենանք, որոնք կգնան, գյուղերում և քաղաքներում փողոցային ֆուտբոլը նայելու և այնտեղից տաղանդներ հայտնաբերելու, մեր ֆուտբոլը չի զարգանա, պետք է մեր մասնագետները իրենց բարձր տեղից իջնեն և իրենք սկսեն տաղանդներ փնտրել, մենք շատ տաղանդավոր ֆուտբոլիստ երեխաներ ունենք, ոչ թե սպասեն թե ով ծանոթ կամ բարեկամով մի երեխու կբերի իրենց թիմ որ երեխեն պարապի...

Այս պահին էլ 9-0 ենք պարտվում։ Իսկ ֆեդերացիան ինչա մտածում այդ մասին կամ ինչ քայլերա ձեռնարկում։ Կարողա փակեք, փոխարենը կյոռլինգի ֆեդերացիա բացեք։

Ամոթա, ամոթ, լուրջ ներդրումներ արեք, լրջորեն զարգացրեք մանկապատանեկան ֆուտբոլը, վերապատրաստման ուղարկեք մարզիչներին, որ մի գեղեցիկ օր այս խայտառակ մղձավանջն ավարտվի։

Երբեք մեղքը միայն դաշտում գտնվող տղաների վրա չբարդեք, խնդիրները շաաաաատ խորքային են, որոնց մեջ ֆեդերացիան էլ իր մասնաբաժինն ունի։

Իրար եկեք, տեղում մի դոփեք»։

Իհարկե, կան նաև պաշտպանողներ՝ նշելով, որ հզոր հավաքականների դեմ խաղալու փորձի պակաս ունի ազգային հավաքականը։

«Իսկական երկրպագուն ձեր նման ոչ կոռեկտ մեկնաբանություններ չի գրի այլ կհուսադրի որ չկոտրվեն ու շուտ վերականգնվեն։ Մի մոռացեք ում դեմ էինք խաղում ինչ կազմով ու քանի հոգով։ Ես չեմ արդարացնում, այլ փորձում եմ հասկանամ ու նույնը խորհուրդ կտամ բոլոր սուտի երկրպագուներին»։

«Ամեն մի պարտություն սկիզբ է ավելի մեծ հաղթանակի և այդ օրը գալու է 100%։ Կեցցե մեր հավաքականը, մեր հայ տղաները»։