Ձեր վստահելի աղբյուրը

«Դուք լավ գիտեք, որ այսօր բակում, թաղում, կոլեկտիվում ծայրահեղ բևեռվածություն կա, ես ձեզ ասեմ՝ անգամ ընտանիքներում այն կա, որը մեզ տանում է վատ տեղ»,-«Հայկական օրակարգ. ներքին համերաշխություն, համահայկական ռեսուրս» թեմայով պանելային քննարկման ժամանակ ասաց ՀԱՕԿ գլխավոր քարտուղար, սպորտի և երիտասարդության նախկին նախարար Հրաչյա Ռոստոմյանը:

Նրա կարծիքով՝ այդ բևեռվածությունը վերացնելու համար հասարակության տարբեր շերտերի միջև պետք է սկսվի ուղիղ երկխոսություն, իսկ քաղաքական գործիչներն իրենց վարքով զրկվել են այն կազմակերպելու մանդատից:

«Քաղաքական գործիչներն ամեն ինչ արեցին հասարակության մեջ պառակտում ստեղծելու համար, նրանք անցան բոլոր կարմիր գծերը»,-հայտնեց Ռոստոմյանը։

Նրա խոսքով՝ կան թե՛ ներքին, թե՛ արտաքին ուժեր, որոնց հայ հասարակության պառակտումը ձեռնտու է և միասնականության ուղղությամբ պետք է գործուն քայլեր կատարել, որը կարող է հանդիպել նաև դիմադրության:

«Մտավորականները, մարզիկները և հոգևոր առաջնորդները պետք է առանցքային դեր ունենան այստեղ»,-ասաց ՀԱՕԿ գլխավոր քարտուղարը։