Ձեր վստահելի աղբյուրը

«Արցախյան պատերազմը խորն իդենտիֆիկացիոն ազդեցություն թողեց հայկական աշխարհի վրա»,- «Հայկական օրակարգ. ներքին համերաշխություն, համահայկական ռեսուրս» թեմայով քննարկման ժամանակ ասաց Այլընտրանքային նախագծեր խմբի անդամ Վահե Հովհաննիսյանը և բացատրեց, որ հայկական աշխարհը միավորող համակարգը՝ հաղթանակը և անկախ Հայաստանը փլուզվել են:

Վ. Հովհաննիսյանի խոսքով՝ շատ դժվար է միավորվել պարտության շուրջ, ոչ ոք չի ուզում պարտության շուրջ միավորվել և հայկական աշխարհի փլուզումն արցախյան պատերազմից հետո սրընթաց էր։

Ըստ Վահե Հովհաննիսյանի, ՀՀ հետպատերազմյան վերականգնման ամենաառանցքային կետերից մեկը՝ նոր համահայկական օրակարգի ձևավորումն է, որը պետք է առաջարկեր հայրենիքը, բայց այդ ուղղությամբ ոչինչ չի արել:

«Նոյեմբերի 9-ից հետո այն պետք է աներ և պարտավոր էր անել ընդդիմությունը, այն ուժը, որը պետք է գար իշախանության,  բայց ես, ցավով պետք է նշեմ, որ այդ ուժը չտեսավ այդ գաղափարի կարևորությունը և իր մեջ չգտավ այդ պարտավորության տեսանկյունից հանդես գալու առաքելությունը»,-հայտարարեց բանախոսը:

Նրա խոսքով՝ այն մեկ օրում հնարավոր չէր ձևավորել, բայց քննարկումների մեկնարկն արդեն միասնականության առաջին փուլը կլիներ:

Ըստ Վահե Հովհաննիսյանի՝ ուկրաինական ճգնաժամը շատ լուրջ բարիկադավորման վտանգ է պարունակում հայկական աշխարհի համար, քանի որ Ռուսաստանում ապրող հայերը ռուսական քարոզչության ազդեցության տակ են, ԱՄՆ-ինը՝ ամերիկյան, և այդ առումով  նույնիսկ տարբեր են Հայաստանի և Արցախի հայության վիճակը:

«Այն միավորը, մարդկանց խումբը, դաշինքները, որոնք իրենց մեջ համահայկական նոր օրակարգի քննարկման և ձևավորման առաքելությունն կզգան, նրանք են դառնալու և՛ Հայաստանի հաջորդ իշխանությունը, և՛ հայկական աշխարհի առանցքը»,-ասաց Հովհաննիսյանը։

Նրա խոսքով՝ հիմնական գաղափարը հայաստանակենտրոն հայկական աշխարհի գաղափարն է ր պետք է ֆիքսել, որ այլևս այլ ռեսուրս չի մնում Հայրենիքը, Արացախը պահելու համար, քանի որ վտանգ կա, որ աշխարհի հանդարտեցումից հետո անվերադարձ կորցնելու ենք այն:

«Ո՞վ պետք է դա անի: Դա պետք է անի իշխանությունը, բայց չի անում ու չի անի։ Այն երեկ և այսօր պետք է անի ընդդիմությունը, բայց իմ կարծիքով, այս ընդդիմությունը այս ձևաչափով չունի կոնսոլիդացնող ռեսուրս։ Գուցե այն կարող է անել եկեղեցի՞ն, բայց նրա գործիքակազմը բավարար չի»,-նշեց Հովհաննիսյանը և հավելեց. «Մեզ չհաջողվեց անկախ երկրի քաղաքացի ձևավորել, չհաջողվեց ազգային և պետական ​​էլիտաներ ձևավորել, որոնք վեր կլինեին իշխանությունից, կլանային և անձնական շահերից։ Մեր էլիտաները կամ փող են աշխատել, կամ ապրել են այլ իրականության մեջ»: