Ձեր վստահելի աղբյուրը

«ԱԽ ընդլայնված կազմով վերջին նիստի հայտարարության մեջ շեշտադրվում էր, որ Ադրբեջանը Լեռնային Ղարաբաղի ուղղությամբ նոր սադրանքներ և հարձակում ձեռնարկելու նպատակ ունի: Արձանագրել էինք, որ նման զարգացումների բավական մեծ հավանականություն կա նաև Հայաստան-Ադրբեջան սահմաններին»,-կառավարության նիստում ասաց Նիկոլ Փաշինյանը:

Նա հայտնեց, որ ԱԽ հայտարարությունները հարցեր է առաջացրել և ցանկանում է հանդես գալ պարզաբանումներով, որպեսզի թե հայաստանյան, թե միջազգային հանրության համար տարածաշրջանում հաստատված իրավիճակն առավել պարզ լինի:

«Ինչպես 2020 թվականի 44-օրյա պատերազմից առաջ, դրա ընթացքում, այնպես էլ պատերազմից հետո Ադրբեջանը Հայաստանի և Լեռնային Ղարաբաղի դեմ վարում է ռազմական հարձակումը հիմնավորող խոսույթի բովանդակության ձևավորման քաղաքականություն: Այն նախ դիվանագիտական կամ հանրային հարթակ է նետում մեկնաբանություններ, թեզեր, առաջարկություններ, ապա Հայաստանին մեղադրում է այդ թեզերին, առաջարկություններին կամ մեկնաբանություններին չարձագանքելու կամ ապակառուցողական կերպով արձագանքելու , կամ դրանք մերժելու մեջ, ապա Հայաստանի վերագրում է ինչ-որ խոստումներ, բանահյուսում ինչ-որ պայմանավորվածություններ, հետո այս խոսույթի համատեքստում Հայաստանին վերագրում է ապակառուցողականություն, մերժողականություն, խոստումները չկատարելու, պայմանավորվածությունները չպահելու գործելակերպ, այդ մեղադրանքի վրա կառուցում է ագրեսիվ հռետորաբանություն, որին հաջորդում են ագրեսիվ գործողություններ, որոնք արդեն արդարացվում են վերը նկարագրված խոսութով և բանաձևեևով»,-հայտարարեց Փաշինյանը:

Նրա խոսքով՝ այդ գործելակերպը բազմիցս կրկնվել է և շարունակվում է նաև հիմա և ակնհայտ է, որ Ադրբեջանը դրանով փորձում է ԼՂ-ի և ՀՀ-ի դեմ լայնամասշտաբ հարձակման լեգիտիմություն ձևավորել և իր այսօրվա ելույթի նպատակը այդ խոսույթի անհիմն և ոչ լեգիտիմ լինելն ի ցույց դնելն է: