Ձեր վստահելի աղբյուրը

«Արևմտյան շրջաններում  լայնորեն շրջանառվում է Ադրբեջանական  աղբյուրների այն կեղծ տեղեկատվությունը, թե իբր Հայաստանը իր ունեցած 4 հատ ՍՈւ-30 բազմաֆունկցիոնալ ինքնաթիռները տրամադրել է Ռուսաստանին Ուկրաինայում օգտագործելու համար»,-խոսելով Ադրբեջանի տարածած ապատեղեկատվության մասին՝ հայտարարեց Նիկոլ Փաշինյանը

Աղաղակող ապատեղեկատվություն համարելով այդ լուրը՝ նա հայտնեց, որ այդ ինքնաթիռները Հայաստան ներկրվելուց հետո երկրի սահմանը ոչ մի անգամ չեն լքել:

Նա նաև նշեց, որ նույն կերպ կեղծ լուր է տարածվում, թե իբր Հայաստանի տարածքով վարձկան ահաբեկիչներ են տեղափոխվում Ուկրաինա:

«Ցանկացած քիչ թե շատ տեղյակ մարդ գիտի, որ Հայաստանը, որը երկու տարի առաջ ինքն է տուժել պատերազմում իր դեմ վարձկան ահաբեկիչների ներգրավումից, երբեք չի կարող նպաստել այլ վայերրում նրանց ներգրավմանը և այն կատարելապես անհեթեթ տեղեկատվություն է»,-հայտարարեց Նիկոլ Փաշինյանը:

Նկատելով, որ Հայաստանի և Ադրբեջանի միջև էսկալացիա հրահրելու համար ամենաշատ շահարկվող թեման խաղաղության պայմանագիրն է՝ շարունակաբար պնդելով, թե ՀՀ-ն անարձագանք է թողնում այդ հարցը՝ Փաշինյանը նշեց, որ այն բացարձակամպես չի համապատասխանում իրականությանը, քանի որ ինքը՝ Փաշինյանը բազմիցս հայտարարել է Ադրբեջանի հետ խաղաղության պայմանագիր կնքելու պատրաստակամության մասին:

«Բանը հասել է նրան, որ Ադրբեջանն այսօր էլ շարունակաբար հայտարարում է, թե Հայաստանին 5 կետանոց առաջարկ է փոխանցել, բայց մենք, իբր անարձագանք ենք թողել այդ առաջարկությունները»,-ասաց նա և տեղեկացրեց, որ հայկական կողմը 4 օր անց՝ մարտի 14-ին գրավոր պատասխանել է այդ առաջարկին և այն փոխանցել այն ճանապարհով, որով ստացել են, այն է՝ ԵԱՀԿ Մինսկի անդամ պետության միջոցով և հայտարարեց, որ Ադրբեջանի առաջարկներում հայաստանի համար անընդունելի ոչինչ չկա:

Նրա խոսքով՝ Ադրբեջանի փոխանցած հինգ կետանոց առաջարկին Հայաստանի Հանրապետությունը արձագանքել է թե՛ հրապարակային և թե՛ աշխատանքային-դիվանագիտական խողովակներով, ինչը նշանակում է, որ Հայաստանի համար ընդունելի է փոխադարձաբար տարածքային ամբողջականության և սահմանների անխախտելիության ճանաչման սկզբունքը:

«Եվ ուրեմն հարց է ծագում, ինչու՞ է Ադրբեջանն այս արձագանքը համարում արձագանքի բացակայություն»,-հարցրեց գործադիրի ղեկավարը և բացատրեց, որ Հայաստանի Հանրապետությունը իր հրապարակային և դիվանագիտական արձագանքներում արձանագրել է, որ կա Լեռնային Ղարաբաղի հիմնախնդիր և Հայաստան-Ադրբեջան համապարփակ կարգավորման համատեքստում պետք է հասցեագրվի արցախահայության իրավունքների հարցը:

Ըստ նրա՝ Ադրբեջանի դիրքորոշումն այն է, որ Արցախի հիմնախնդիր չկա, այն այլևս լուծված է:

«Ադրբեջանի այս դիրքորոշումը չի պատասխանում սակայն մի կարևոր հարցի. իսկ ինչպես է այդ դեպքում լուծվել Լեռնային Ղարաբաղի հայության իրավունքների հարցը: Այս հարցի պատասխանը չկա ու սա է պատճառը, որ միջազգային հանրությունը շարունակաբար խոսում է Լեռնային Ղարաբաղի հիմնախնդրի համապարփակ կարգավորման անհրաժեշտության մասին, ինչի դրսևորումը տեսնում ենք միջազգային ամենատարբեր հարթակներում: Հասկանալով, որ Լեռնային Ղարաբաղի հիմնախնդիրը առկա է և ավելի է արտահայտվելու միջազգային օրակարգում, Ադրբեջանը փորձում է ոչ թե լուծել այդ հարցը, այլ փակել այն և այս գործողությունն է մեկնարկել Ասկերանի շրջանի Փառուխ գյուղից: Ադրբեջանը ըստ էության փորձում է բոլոր հայերին տեղահանել Լեռնային Ղարաբաղից, այդպիսով հարցը փակված համարելու համար, որը շարունակվելու ակնհայտ միտում ունի»,-հայտնեց Փաշինյանը և հավելեց. «Եթե սխալվում ենք, Ադրբեջանն ուրեմն թող Լեռնային Ղարաբաղի հայության իրավունքների և անվտանգության երաշխիքների հարցերի քննարկմանը նկատմամբ կոնկրետ հետաքրքրություն ցուցաբերի: Խնդիր, որ առաջ է քաշում ոչ միայն Հայաստանը այլև ողջ միջազգային հանրությունը»:

Ըստ Փաշինյանի՝ պաշտոնական Բաքուն հակառակ ուղղությամբ է շարժվում, պնդելով, որ Լեռնային Ղարաբաղ չկա և սա է պատճառը, որ Ադրբեջանի պաշտոնական շրջանակները բավական ագրեսիվ են արձագանքում բոլոր այն դեպքերին, երբ միջազգային հանրությունը  օգտագործում է Լեռնային Ղարաբաղ անվանումը:

«Այս անվանման օգտագործումը սակայն, միանշանակ լեգիտիմ է, այլոց թվում նաև այն պատճառով, որ նոյեմբերի 9-ի եռակողմ հայտարարության մեջ հստակ արձանագրված է՝ Լեռնային Ղարաբաղ, Լեռնային Ղարաբաղի հակամարտություն եզրույթները: Այդ հայտարարության տակ դրված է նաև Ադրբեջանի նախագահի ստորագրությունը», ասաց նա: