Ձեր վստահելի աղբյուրը

ԱԺ-ն այսօր՝ ապրիլի 1-ին, գումարել է արտահերթ նիստ, որի օրակարգում մեկ հարց է՝ «Տեղական ինքնակառավարման մասին» օրենքում լրացում կատարելու մասին օրենքի նախագիծն առաջին և երկրորդ ընթերցմամբ ընդունումը:

Օրենքի համահեղինակ Վահագն Հովակիմյանը հայտնեց, որ ՏԻՄ կառավարման բնականոն ընթացքը խաթարվել է և օրենքի նախագծի հրատապությունը դրանով է պայմանավորված, որպեսզի այն համայնքներում, որտեղ նման խնդիր է ստեղծվել, կառավարումը բնականոն շարունակվի:

«Հայաստան» խմբակցության քարտուղար Արծվիկ Մինասյանը հետաքրքրվեց, թե կոնկրետ ո՞ր համայնքներին է վերաբրում օրենքի նախագիծը:

«Կոնկրետ այն խնդիրը, որը  ստեղծվել է, կարող է ստեղծվել ապագայում ցանկացած համայնքում, իսկ այս պահին նման խնդիր կա Վանաձոր համայնքում»,-պատասխանեց Հովակիմյանը:

Արծվիկ Մինասյանը հետաքրքրվեց, թե արդյոք հնարավոր չէր մարդու իրավունքների, մասնավորապես՝ համայնքապետի կալանավորման հարցը լուծել և ոչ թե օրենքով:

«Կամ դուք լուջ չեք ընդունում ձեր քաղաքական ղեկավարի հայտարարությունները, խոսքերը կամ էլ այն չեք կարդացել: Փաստորեն՝ երբ Հայաստանը գտնվում է պատերազմից  հինգ պակաս, ամեն դեպքում երեկ Նիկոլ Փաշինյանի հայտարարությունը դրա մասին էր, մենք այստեղ պետք է քննարկե՞նք մի հարց, որն առնչվում է այն համայնքին, կամ համայքներին, որտեղ ձեզ չի հաջողվել վերցնել իշխանությո՞ւնը… Հարցս հետևայալ է՝ որքանով եք ադեկվատ համարում ձեր պահվածքը»,-Հովակիմյանին հարցրեց «Հայաստան» խմբակցության պատգամավոր Ագնեսա Խամոյանը

Օրենքի համահեղինակը պատասխանեց. «Առավել ադեկվատ է մեր պահվածքը, բայց որքանո՞վ է ադեկվատ ձեր հարցը քննարկվող խնդրին»:

Ագնեսա Խամոյանը խորհուրդ տվեց դիտել Փաշինայնի ելույթը, որում ասվում է, որ պատերազմը հնարավոր է, իսկ ՔՊ-ն բերել է ՏԻՄ-ին վերաբերյալ հարցը:

Վահագն Հովակիմյանը, պատասխանելով ՔՊ մեկ այլ պատգամավորի հարցին, բացատրեց, որ Վանաձորի ավագանում առաջին նսիտը՝ համայնքի ղեկավարի ընտրելու հարցով, դատարանի որոշմամբ արգելվել է և ՏԻՄ-ն անգործության է մատնվել:

Նիստի մեկնարկին «Հայաստան» խմբակցության պատգամավոր Զենֆիրա Միրզոևան ուղերձ հղեց Ասօրիների Նոր տարվա առթիվ, որը նշվում է ապրիլի 1-ին և խաղաղություն ու բարօրություն մաղթեց բոլորին: