Ձեր վստահելի աղբյուրը

«Հայաստանն  ուզում են զավթել, երեկ այդ մասին հայտարարվեց կառավարության նիստում: Ուզում է զավթել Ադրբեջանը՝ հարձակվելով Հայաստանի և Արցախի վրա»,- ԱԺ արտահերթ նիստում հայտնեց «Հայաստան» խմբակցության պատագամավոր Անդրանիկ Թևանյանը և հավելեց, որ կառավարության նիստում հայ ժողովրդին տեղեկություն է փոխանցել, որ նա լայնամասշտաբ պատերազմի շեմին է, բայց արտահերթ նիստում քննարկվում է «Տեղական ինքնակառավարման մասին» օրենքում լրացում կատարելու մասին օրենք:

Նրա  խոսքով՝ արտահերթ նիստում խորհրդարանին է ներկայացվել մի օրենքի նախագիծ, որը կրկին  զավթման մասին է՝ բայց արդեն ներսից:

Ըստ Թևանյանի՝ փորձ է արվեւմ ՏԻՄ հասկացությունը վերացնել՝ այն դարձնելով նշանակովի:

«Եթե մինչև վերջ ազնիվ ու անկեղծ լինեին այս օրենքի նախաձեռնողները, ապա օրենքը պետք է վերնագրեին «Մամիկոն Ասլանյանին, կամ վանաձորցիներին քվեի իրավունքից զրկելու մասին օրինագիծ»,-հայտարարեց «Հայաստան» խմբակցության պատագամավորը:

Նա նկատեց, որ Հայաստանն իրոք ներսից զավթման վտանգի առաջ է կանգնած, այն դեպքում, երբ իշխանությունը խոսում է ժողովրդի քվեի, բաց, թափանցիկ գործունեության մասին:

«Մեզ համար անընդունելի է այս մոտեցումը և այս զավթողական քաղաքականությանը պետք է վերջ դրվի՝ ինչպես դրսից, այնպես էլ ներսից»,-խոսքն ավարտեց Անդրանիկ Թևանյանը: