Ձեր վստահելի աղբյուրը

Երևան-Հրազդան տրանսպորտն էսօր 500 դրամից միանգամից դարձել է 750 դրամ: Այսօր առավոտյան ֆեյսբուքյան իր էջում ահազանգեց օգտատեր Լևոն Ստեփանյանը։

«Բնականաբար հասկանում ենք, որ գլոբալ թանկացման պայմաններում, հնարավոր ա նաև տրանսպորտի թանկացում լինի, բայց միանգամից 50%, էդ արդեն աբսուրդ ա:

Չգիտեմ ով ա էդ որոշումը կայացրել, բայց հեչ լավ որոշում չի, հրազդանցին «անտեր» չի, որ ով ոնց ուզի, էս մարդկանց վրա փող աշխատի»,-գրել էր նա։

Գրառման ներքո թողած մեկնաբանություններից պարզվեց, որ բարձրացել են նաև Գորիս-Երևան, Սևան-Երևան, Բյուրեղավան-Երևան և հակառակ ուղղություններով ողևորափոխադրումների գները։

Քաղաքացիներն իրենց բողոքն են արտահայտում  համընդհանուր թանկացման դեմ, առաջարկում են ընդհանրապես չօգտվել հասարակական տրանսպորտից։

Քիչ առաջ հրազդանցիների բողոքին արձագանքել է համայնքի ղեկավար Սևակ Միքայելյանը.

«Սիրելի′ հրազդանցիներ,

Երևան-Հրազդան երթուղին սպասարկող ընկերությունը տրանսպորտի ուղեվարձն այսօրվանից բարձրացրել էր` այն դարձնելով 750 ՀՀ դրամ: 

Անընդունելի համարելով հետևյալ գործելաոճը և կարևորելով այն հանգամանքը, որ անհատ տաքսիներից ամենօրյա կերպով օգտվում են բազմաթիվ հրազդանցիներ և ուսանողներ, անմիջապես կապ եմ հաստատել երթուղին սպասարկող ընկերության սեփականատիրոջ հետ:

Հարգելի համաքաղաքացիներ, սեփականատիրոջ հետ ունեցած խոսակցությունից հետո տեղեկացնում եմ ձեզ, որ վաղվանից ուղեվարձի փոփոխություն չի լինելու,  և գործելու է նախկին արժեքը՝ 1 անձի համար` 500 ՀՀ դրամ»։