Ձեր վստահելի աղբյուրը

«Հրապարակ» թերթը գրում է.

«Իշխող թիմում չեն բացառում, որ Երևանի ավագանու արտահերթ ընտրություններ կլինեն, հակառակ դեպքում ժամանակից շուտ խաղաքարտերը չէին բացի, ինչպես արեցին օրերս` Վահագն Ալեքսանյանի բերանով հայտարարելով, որ Տիգրան Ավինյանը քաղաքապետի ՔՊ թեկնածուն է և առաջիկայում փոխքաղաքապետ է նշանակվելու, ինչպես մենք գրել էինք շաբաթներ առաջ։

Բացի այդ, մեր աղբյուրների փոխանցմամբ, դե յուրե և դե ֆակտո քաղաքապետների` Հրաչ Սարգսյանի և Տիգրան Ավինյանի ջրերն արդեն մի առվով չեն գնում` տարաձայնություններն այնքան շատ են, որ չնայած թաղապետերի թեկնածուները որոշված էին շատ առաջ, սակայն հիմա նոր-նոր են նշանակվում` Ավինյանի ձեռամբ։

Սարգսյանին թվացել էր, թե մեկ տարի կարող է լիարժեք վայելել պաշտոնը, քանի որ քաղաքապետի ընտրվելուց հետո 1 տարի չեն կարող անվստահություն հայտնել, սակայն նրան հասկացրել են, որ «Երևանի վարչական բաժանման մասին» օրենքում փոփոխություն անելը 1 օրվա հարց է։

Ժամանակին քննարկում էին Փարաքարը Երևանին միացնելով Մարությանից ազատվելու, հիմա՝ Ջրվեժը Երևանին միացնելու խոշորացման նախագծով արտահերթ ընտրություն անելու և Հրաչ Սարգսյանից ազատվելու տարբերակը։ Վարչական նոր բաժանման դեպքում համայնքում նոր ընտրություններ են անցկացվում։ Երևանի ավագանու հերթական ընտրությունը 2023 թվականին է»։

Մանրամասները թերթի այսօրվա համարում