Ձեր վստահելի աղբյուրը

«Բացառապես Հայաստանի Հանրապետության քաղաքացին կարող է վճռել իր ապագան ու վաղվա օրը։ Երբ այսօր Ազատության հրապարակը այսքան մարդաշատ է, ուրեմն մեր  հայրենակիցներն, ի վերջո, հասկացել են, որ հայրենիքն ու Արցախը վտանգված է,  իրենք պետք է քայլեր գործարկեն, որպեսզի այս իրավիճակից դուրս գանք»,- Ազատության հրապարակում ընդդիմադիր դաշինքների կազմակերպած հանրահավաքի ժամանակ լրագրողների հետ զրույցում ասաց ԱԺ «Պատիվ ունեմ» խմբակցության ղեկավար, «Հայրենիք» կուսակցության ղեկավար, ԱԱԾ նախկին տնօրեն Արթուր Վանեցյանը։

Խոսելով հանրահավաքային պայքարի մասին՝ Արթուր Վանեցյանը նշեց, որ այս գործընթացը մշտական պետք է դառնա։

«Կարծում եմ՝ ճիշտ չէ, եթե հստակ ներկայացնեմ ծրագրեր, բայց սա մեկանգամյա գործընթաց չէ, այլ շարունակական։

Ամենակարևոր խնդիրը, որը պետք է հասկանալ՝ Հայաստանի քաղաքացին է իր մասնակցությամբ, իր  ակտիվությամբ, իր քայլերով վճռելու վաղվա օրը, Հայաստանի ու Արցախի ապագան։

Ընդդիմադիր քաղաքական ուժերն ունեն մեկ մանդատ, այն մեզ տվել են մեր հայրենակիցները՝ հեռացնել այս իշխանություններին, որպեսզի Հայաստանն ու Արցախը կարողանան ուղղել իրենց մեջքը, նորմալ բանակցային դիրքերից հանդես գալ, ապահովել Հայաստանի ու Արցախի ազգային և պետական շահերը»,- ասաց «Պատիվ ունեմ» խմբակցության ղեկավարը։

Անդրադառնալով ապրիլի 6-ին Բրյուսելում Փաշինյան-Ալիև հանդիպմանն ու ի՞նչ կարելի է սպասել այդ հանդիպումից, նա նշեց, որ այս իշխանություններն ապացուցել են, որ մշտապես պայմանավորվածություններ են ձեռք բերում ժողովրդի թիկունքում։

«Չեմ կարծում վաղը որևէ փաստաթուղթ կստորագրվի, բայց հավանականությունը շատ մեծ է, որ այդ հնարավոր ստորագրվելիք փաստաթղթի կետերի մասին կխոսվի։ Սպասենք, թե ինչ է լինելու։
Այսօրվա այս հանրահավաքը դրա մասին էր, որ Նիկոլ Փաշինյանը չի կարող հանդես գալ ողջ հայ ժողովրդի, Արցախի, Հայաստանի անունից, և այսօր այս բազմամարդ  հանրահավաքը հենց դրա ապացույցն է»։

Հիշեցնելով  քարոզարշավի ժամանակ և ընտրություններից հետո այս իշխանությունների հայտարարությունները, ընդդիմադիր քաղաքական գործիչը նշեց, որ փոխվել է հռետորաբանությունը, շեշտադրումները. «Ունենք տասնյակ զոհեր, նոր գերիներ, տարածքների կորուստներ, Արցախի հնարավոր հանձնումը թշնամուն։ Սա պետք է հասկանալ, որ այս իշխանությունները խաբել ու մանիպուլացրել են,  խոսել են խաղաղության օրակարգից, արել են այլ բան»։

Առավել մանրամասն՝ տեսանյութում։