Ձեր վստահելի աղբյուրը

«Նախագծով առաջարկվում է նվազագույն աշխատավարձը 68 հազար դրամից հասցնել 80 հազար դրամի»,-Աշխատանքի և սոցիալական հարցերի մշտական հանձնաժողովի նիստում հայտնեց «Հայաստան» խմբակցության պատգամավոր Աղվան Վարդանյանը՝ ներկայացնելով իր հեղինակած «Նվազագույն ամսական աշխատավարձի մասին» ՀՀ օրենքում փոփոխություններ կատարելու մասին նախագիծը:

Պատգամավորը հիշեցրեց, որ մարտ ամսին իր հեղինակած նախորդ նախագիծը, որով առաջարկվում էր նվազագույն աշխատավարձը դարձնել 100 հազար դրամ, ԱԺ-ն մերժել էր մի քանի դիտողություններով, որոնք էլ պատագամավորը հաշվի է առել նոր ներկայացված նախագծում:

Վարդանյանը հայտնեց, որ նախագծով փոփոխություններ են արվում նաև գործավարձով, ժամավճարով վարձատվող աշխատակիցների ժամային, տարիֆային դրույքների նվազագուն չափերը:

Օրենքի նախագծում ասվում է. «Գործավարձով եւ ժամավճարով վարձատրվող աշխատակիցների համար ժամային տարիֆային դրույքի նվազագույն չափը սահմանել`

1) աշխատաժամանակի նորմալ տեւողության դեպքում (40-ժամյա աշխատանքային շաբաթ)` 478 դրամ.

2) աշխատաժամանակի կրճատ տեւողության դեպքում (36-ժամյա աշխատանքային շաբաթ)` 534 դրամ.

3) աշխատաժամանակի կրճատ տեւողության դեպքում (24-ժամյա աշխատանքային շաբաթ)` 800 դրամ»:

Պատգամավորը նշեց, որ ընդունվելու դեպքում օերնքն ուժի մեջ կմտնի 2023 թ հունվարի 1-ից՝ նկատի ունենալով նոր բյուջետային տարվա պլանավորումները:

Աղվան Վարդանյանը հիշեցրեց, որ երբ վերջին անգամ 2019 թվականին նվազագույն աշխատավարձը 55 հազար դրամից բարձրացվել էր 68 հազար դրամի՝  կառավարությունն իր այդ նախաձեռնությունը հիմնավորել էր, որ այն ժամանակ բարձրացումը ռիսկեր ունի աշխատատեղերը թաքցնելու առումով, սակայն այն էական վնաս չի ունենա, քանի որ դրական ազդեցությունը տնտեսության վրա ավելի էական է:

Ըստ կառավարության 2019 թ.-ի հրմնավորման՝ նվազագույն աշխատավարձը կգերազանցի սպառողական զամբյուղի արժեքը՝ լուծելով սոցիալական խնդիր, կբարձրանա նաև միջին աշխատավարձը, քաղաքացիներն ավելի գնողունակ կդառնան, ինչը կբերի պահանջարկի և առաջարկի աճին և կկրճատվի պետական ու մասնավոր ոլորտներում աշխատավարձերի տարբերությանը:

Աղվան Վարդանյանն ընթերցեց 2019 թվականին նվազագույն աշխատավարձը բարձրացնելու կառավարության հիմնավորումը, որում ասվում էր. «Կարծում ենք, որ նվազագույն աշխատավարձը պետք է բարձրանա մինչև ամսական 150 հազար դրամ՝ մի քանի տարվա ընթացքում»:

Ընդդիմադիր պատգամավորը նկատեց, որ ներկայում կա էական գնաճ և պետք է հոգ տանել հարյու հազարավոր քաղաքացինրի մասին:

«Առաջարկում եմ առաջնորդվել այս կառավարության՝ 2019թ. ընդունած օրենքին տված եզրակացությամբ և անել լավ բան»,-ասաց «Հայաստան» խմբակցության պատգամավորը և հավելեց. «Այսօր Հայաստանում ոչ միայն աղքատության բարձր մակարդակ կա, այլև մենք ունենք աղքատության որոշակի մակարդակ նաև աշխատողների շրջանում»:

Աշխատանքի և սոցիալական հարցերի նախարարի տեղակալ Ռուբեն Սարգսյանը ներկայացրեց կառավարության բացասական կարծիքը, որը տրամագծորեն հակառակն էր, ինչ տրված էր 2019 թվականի նույնանման նախագծին՝ բացասական համարելով այն բոլոր գործոնները, որոնք այն ժամանակ դրական էր գնահատվել:

Ըստ կառավարության՝ նվազագույն աշխատավարձի բարձրացումը պետք է հիմնվի մակրոտնտեսական ցուցանիշների վրա և բխի տնտեսական հնարավորություններից, որն այսօր չկա:

Փոխնախարարը հայտնեց,որ պատգամավորի առաջարկն ընդունելու դեպքում այն պետական բյուջեի վրա 99.1 մլրդ դրամի բեռ կավելացնի, հետևաբար բացասական եզարակացություն է տաչվում նախագծին:

Հանձանաժողովը բացասական եզարակցություն տվեց նախագծին: