Ձեր վստահելի աղբյուրը

«Այսօր Հայաստանն ապրում է վերջին հարյուր տարվա իր ամենածանր օրերը»,- Ազատության հրապարակում ընդդիմության հրավիրած հանրահավաքի ժամանակ հայտարարեց «Հայաստան» խմբակցության պատգամավոր Արամ Վարդևանյանը։

Նրա խոսքով՝ դա չափանազացություն չէ, հայ ժողովուրդը կանգնած է վերանալու շեմին, որպես ազգ, որպես պետություն վերանալու շեմին։

«Այսօր իշխանությունը խոստանում է խաղաղություն, բայց ո՞ւմ է խոստանում այս խաղաղությունը՝ մե՞զ, հայ ազգի՞ն, ոչ, այս իշխանությունը խոստանում է խաղաղություն Ադրբեջանին և Թուրքիային, նա խոստանում է, որ չի լինի հայկական այնպիսի պետություն, որի հետ դրանք ստիպված ուզեն, թե չուզեն հաշվի նստեն։

Այս խաղաղությամբ, որ խոստանում են, կբացվի թուրք-ադրբեջանական խաղաղության դարաշրջանը, երբ Հայաստանը երկու երկրների համար կդառնա ոտքի տակ երկիր։ Այդ ժամանակ թուրքերը խաղաղ կապրեն։ Այս խաղաղությունը Ադրբեջանի համար նշանակում է Արցախի՝ որպես ինքնորոշված հանրապետության վերացում։ Այս խաղաղությունը նշանակում է Սյունիքի ուզուրպացիա։ Այն կլինի թուրք-ադրբեջանական ուղիները սպասարկող շրջան։ Այդ ժամանակ թուրքերը խաղաղ կապրեն։

Այս խաղաղությունը Թուրքիայի համար նշանակում է Ցեղասպանությունը մարսել։ Մի բան, որի դեմ 100 տարի ամբողջ հայությունը, աշխարհը պայքարել են։ Այս խոսքերը, ցավոք, չափազանցություն չեն։ Եթե կա հայ մարդ, որը մտածում է՝ ամենավատն արդեն անցել է, արդեն տեսել ենք, ախր՝ ոչ, դա այդպես չէ, սարսափելին դեռ չենք տեսել, սարսափելին չի էլ թակում, այլ ջարդում է մեր տան, մեր հայրենիքի դռները։

Սիրելի հայրենակիցներ, ոչ ոք պատերազմ չի ուզում, բայց չի կարելի հանձնվել դահիճին։ Այո, ո՛չ պատերազմին, թող այլևս երբեք պատերազմ չլինի, բայց դրա այլընտրանքը թուրքի ու ադրբեջանցու տակ կզելը չէ։ Կարելի է պարտվել ու դասեր քաղել, բայց չի կարելի մի ամբողջ ազգի անունից վերածվել մուրացկանի, խաղաղություն մուրացողի։ Հայ ազգը նման մանդատ ոչ մեկի չի տվել»,- ասաց Արամ Վարդևանյանի։

Պատգամավորի խոսքով՝ մեզ փորձում են վախեցնել դրսից, վախեցնում, հետապնդում են ներսից, բայց պատմությունը դաժանորեն ապացուցել է՝ այն ազգը, որն իր հույսը դնում է երկակի ստանդարտներով միջազգային հանրության վրա, սեփական ուժերով չի դիմադրում, այլ փոխարենը տրվում է վախերի, այդ ազգը գոյություն չի ունենում։

Ըստ Արամ Վարդևանյանի՝ կարելի է անվերջ խոսել նախկիններից, 30 տարվա սխալներից, մեղադրել, կալանավորել ու հետապնդել բոլորին, առաջին, երկրորդ, երրորդ նախագահներին, բայց արցախցիներն ինչով են մեղավոր։

«Հասկացանք։ Բոլորը Ձեզ համար մեղավոր են։ Արցախը պահողներն ու ազատագրողները մեղավոր են։ Հա, հետո՞։ Հետո՛։ Լուծումը ո՞րն է, ստորանա՞լը, Արցախ չգնա՞լը, Արցախը հանձնե՞լը։ Բա արցախցիները, որոնք այսօր, բացի ռուս խաղաղապահի աջակցության հույսից, ուրիշ օգնություն չեն տեսնում, որոնք Հայաստանի թիվ մեկ պաշտոնյայի, անվտանգության երաշխավորի երեսը երկու տարի չեն տեսել։

Հետո Սյունիքից պահանջների հերթն է գալու։ Դա է՞լ եք ուզում խաղաղության համար հանձնե՞լ։ Թշնամին կանգ չի առնելու։ Գալու են Երևան՝ մինչև Սարյան ու Կասկադ, Սևանում չեն թողելու ջուրը մտնենք։ Այս ելույթի ողբերգական հատվածն այն է, որ սա ասում եմ ոչ թե վախեցնելու համար, այլ սա է մեր ապագան։ Այս ապագան կա, ու այս իշխանությունը դա ամեն ձևով ուզում է ապահովել։
Բայց արդյո՞ք հայ ազգի ուզած ապագան սա էր։

Այսօր շատերը թերահավատ են՝ և՛ այս հանրահավաքի, և՛ ընդդիմության նկատմամբ։ Մեզ քննադատում են, հաճախ՝ տեղին, շատերը սպասում են ավելիին, բայց ոչ թե հրապարակում գտնվելով, այլ տանը նստած՝ հետևելով եթերին ու լրահոսին։ Այս հանրահավաքը թմբիրից դուրս գալու մասին է, ճակատագրական զարգացումները կանխելու մասին է»,- ընդգծեց Արամ Վարդևանյանը։

Նա հիշեցրեց, որ ապրիլին ունենք երկու հիշատակման օր՝ Ապրիլյան պատերազմի, հերոսական դիմակայության, հաղթանակի և Հայոց ցեղասպանության զոհերի հիշատակի օրերը։ Վարդևանյանը հույս հայտնեց, որ ապրիլը մեզ համար կլինի ևս մեկ էջ բացող՝ ամենածանր պահին միավորվելու, վերանալուց փրկվելու, զրոյից սկսելու և հայրենիքը պահելու էջ, իրական խաղաղություն պարտադրելու էջ։

«Մենք հասել ենք այն կետին, որ նույնիսկ չենք կարող վախենալ հենց վախից։ Վախն իրականում ոչինչ է, երբ նժարին բոլորիս ապագան է։ Կամ մենք կհրաժարվենք վախերի շարքից՝ պաշտպանելով մեր Արցախը, դիմադրելով թուրքացմանը, պաշտպանելով մեր արյունը, մեր թաիբը, մեր երեխաներին, կամ...կամ չկա։

Եկեք օրեցօր, կոնկրետ գործողությունից գործողություն, հանրահավաքից հանրահավաք մեր մասնակցությամբ ապացուցենք, որ այսպիսի օրակարգ մեր կողքին տեղ չունի, այսպիսի օրակարգ բանակցելու իրավունք ոչ մեկ չունի։ Պաշտպանելով մեր Արցախը՝ պաշտպանենք մեր Հայաստանը»,- իր ելույթում ամփոփելով ասաց Արամ Վարդևանյանը։