Ձեր վստահելի աղբյուրը

«Եթե Նիկոլ Փաշինյանը գնում է Ադրբեջանի նախագահի հետ հանդիպման, նշանակում է, որ այդտեղ ի շահ Հայաստանի և հայ ժողովրդի ոչ մի լավ բան սպասել հնարավոր չէ, քանի որ թուրքի աչքերը չի քոռացել, որ հայի համար ինչ-որ լավ բան անի, առավել ևս՝ եթե այսօրվա իշխանության ղեկին գտնվողներն իր դրածոներն են»,- «Հայելի» մամուլի ակումբում ասաց «Ազգային ճակատ» կազմակերպության հիմնադիր Գևորգ Գևորգյանը:

Նա հայտնեց, որ չի ցանկանում այլևս անդրադառնալ այդ հանդիպմանը, այլ ուզում է դիմել հանրապետության քաղաքացիներին:

«Ժողովո՛ւրդ ջան, ժամանակն է, որ մեր բոլորի «ես»-ը դառնա «մենք»»,- ասաց բանախոսը և նկատեց, որ ՀՀ Սահմանադրությամբ ժողովուրդը պատգամավորի հետկանչի իրավունք չունի և 4-5 տարի նրանց գերին է դառնում, եթե իշխող ուժը խաբում ու չի իրականացնում խոստացած ծրագրերը, իսկ նրանց հեռացնելու միակ ճանապարհը ժողովրդական ընդվզումն է:

Գևորգյանի խոսքով՝ ընդվզումը մեզ անհրաժեշտ է, որովհետև միայն ժողովրդական ցասումով է հնարավոր «ես»-ը դարձնել «մենք» և հայկական օրակարգ թելադրել, որը հանուն Հայաստանի Հանրապետության է, այդ թվում՝ նաև նույն կուսակցությունների:

««Ես»-ը շատ դեպքերում վաճառվում է, ունի տարբեր երես, բայց «մենք»-ը ունի մեկ շահ՝ ՀՀ-ի շահը»,-ասաց «Ազգային ճակատ» կազմակերպության հիմնադիրը:

Ըստ բանախոսի՝ այսօրվա հանրահավաքի նպատակը Հայաստանը փրկելն է, քանի որ առանց նրա չի լինի նաև Արցախի փրկությունը:

«Անկախ բոլոր աշխարհաքաղաքական փոփոխություններից, եթե մենք ուզում ենք մեզանից ուժ ներկայացնել, ապա պետք է ունենանք մեր պետականությունը՝ փրկելով այն»,- հայտարարեց Գևորգ Գևորգյանը:

Ըստ նրա, կան քաղաքական ուժեր, որոնք պառակտում են հասարակությանը և կեղծ քաղաքական օակարգերով տանում տարբեր կողմեր, բայց հասարակությունը պետք է ձգտի նման կառավարելի վիճակից դուրս գա՝ ցույց տալով, որ իրեն ոչ մեկը չի կարող կառավարել հանուն իրենց առևտրային և անձնական շահերի:

Նրա ներկայացմամբ՝ թուրքերը և ադրբեջանցիները դիրքային առումով ավելի բարենպաստ պայմաններում են գտնվում, հետևաբար՝ նրանք պատճառ չունեն չիրականացնելու իրենց դարավոր երազանքը՝ Հայաստանի ոչնչացումը:

«Թուրքը չի կարող այն անել, եթե մենք ունենանք ժողովրդական ցասում և ընդվզում: Միայն միավորվելով հնարավոր է բոլորին պարտադրել կատարել հայ ժողովրդի օրակարգը և կամքը: Կփրկենք Հայաստանի Հանրապետությունը՝ կփրկենք Արցախը, կկորցնենք Հայաստանը՝ կկորցնենք ամեն ինչ, այդ թվում՝ նաև բոլորիս երազանքները»,-հայտարարեց Գևորգյանը և բացատրեց, թե ինչու պետք է ՀՀ քաղաքացին այսօր գնա հանրահավաքի. «ՀՀ քաղաքացին Ազատության հրապարակում պետք է լինի հայկական պետականությունը փրկելու համար»: