Ձեր վստահելի աղբյուրը

«Շնորհակալ եմ, որ գիտակցում եք՝ մեր հայրենիքը վտանգված է ու էլ այսուհետ հանդուրժելու տեղ չունենք, ոչ մեր երկրի բզկտմանը, ոչ էլ բզկտողներին»,- այսօր հրավիրված հանրահավաքում իր ելույթը սկսեց «Հայաստան» խմբակցության պատգամավոր Վահե Հակոբյանը:

Դիմելով հանրահավաքին չներկայացած քաղաքացիներին՝ նա հարց տվեց, թե արդյոք վերջիններս գիտակցում են, որ երկիրը ծայրահեղ վտանգված է և հարցը միայն Արցախին չի վերաբերում:

«Այսօր հանրահավաքի նպատակներից մեկը զանգ խփելն է, ինչքան ուժ ունենք զանգելն է՝ արթնացման, համախմբման միավորման համար»,- ասաց պատգամավորը:

Նկատելով, որ գրեթե մեկ տարի է Ադրբեջանի զինուժը գտնվում է ՀՀ սուվերեն տարածքում՝ Վահե Հակոբյանը նշեց՝ որևէ մեկն այսօր երկրում չի կարող երաշխիք տալ, որ թշնամու մտքով չի անցնի ավելի խորանալ կամ այլ տեղերից մտնել Հայաստանի սուվերեն տարածք՝ չհանդիպելով որևէ դիմադրության:

«Սյունեցին և արցախցին այսօր մենակ է և չի կարող հասկանալ, թե իրեն ո՞վ է պաշտպանում, իսկ Ադրբեջանը շարունակում է լկտիանալ և մեծացնել ախորժակը: Այնքան է լկտիացել, որ Արցախում, ՌԴ խաղաղապահների վերահսկողության տակ գտնվող գոտում ոտնձգություններ է սկսել Արցախի քաղաքացիների նկատմամբ»,- ասաց ընդդիմադիր պատգամավորը և հավելեց, որ այսօր հոգեբանական ճնշումներով հումանիտար աղետով պարտադրում են, որ մեր հայրենակիցները լքեն իրենց տները:

Վահե Հակոբյանի խոսքով՝ Փաշինյանն էլ այս վիճակում շարունակում է խաղաղության դարաշրջանի կեղծ օրակարգը բերել առաջին պլան:

«Ադրբեջանը, Թուրքիայի ձեռքը բռնած, հայ-ադրբեջանական պայմանագրի հիմքում պարտադրում է, որ իրենց առաջադրած 5 կետը լինի, որոնք բխում են Ադրբեջանի շահերից»,- արձանագրեց Վահե Հակոբյանը և հավելեց. «Ի՞նչ է անում մեր, այսպես կոչված, կառավարությունը: Ասպեկտներ է մտցնում, երկու հատ: Համար մեկ ասպեկտ, կամ լրացում՝ Արցախի ժողովրդի անվտանգության հարցը»:

Հակոբյանը նկատեց, որ այդ ասպեկտով խոսվում է ոչ թե Արցախի հանրապետության, այլ ժողովրդի անվտանգության մասին, ինչը հեռու գնացող կործանարար նպատակներ է հետապնդում:

«Երկրորդ ասպեկտը՝ կարգավիճակն է, ոչ թե ինքնորոշման իրավունքի իրացման, այլ կարգավիճակի, այստեղ էլ է պարզ չէ, որ Ադրբեջանի կազմում էլ այդ կարգավիճակը կարող է լինել»,- հայտարարեց «Հայաստան» դաշինքի անդամը և տարակուսեց, որ այդ փաստաթուղթը փոխանցվել է ԵԱՀԿ Մինսկի խմբին, քանզի չեն պատկերացնում, որ այդ կառույցն Արցախի խնդրի լուծման համար է ստեղծված, ոչ թե հայ-ադրբեջանական հարաբերությունների հարթման համար:

Հռետորական հարց տալով, թե ո՞ւմ շահերն են սպասարկում Նիկոլ Փաշինյանն ու իր հետևորդները՝ Վահե Հակոբյանն ասաց. «Վաղը մեր սերունդը հարցնելու է՝ լավ ապրելը ո՞րն է, երբ չունենք ո՛չ սկզբունք, ո՛չ արժեք, ո՛չ էլ հայրենիք: Մեր երկիրն այսօր հանել են աճուրդով վաճառքի, այն չի կարող ապրել լավ, քանի որ տեղ չի ունենալու ապրելու»:

Հակոբյանը կարևոր չհամարեց, թե ինչ է ստորագրվելու Բրյուսելում, քանի որ պարզ է, որ միևնույնն  է նա թշնամիների թելն է թելելու՝ խախտելով ի նպաստ Հայաստանի գրավոր բոլոր պայմանավորվածությունները:

«Այդ մարդը չի հասկանում, թե ինչով է նա այսօր խաղ անում: Վաղը մեր երեխաներն ասելու են, ինչո՞ւ լուռ հանձնեցիք մեր երկիրն ու այդ պատասխանը մենք չենք կարողանալու տալ: Մենք այսօր այս անտարբերության հետ գործ ունենք և այսօրվա հավաքը դրա դեմ է: Այսօրվա հավաքը Հայաստանի, Արցախի համար է, լինել-չլինելու համար է»,- ելույթն ամփոփեց Վահե Հակոբյանը: