Ձեր վստահելի աղբյուրը

Երևան քաղաքի ընդհանուր իրավասության դատարանը, դատավոր Դավիթ Հարությունյանի նախագահությամբ, հրապարակեց Վազգեն Սարգսյանի անվան ռազմական ինստիտուտում կուրսանտ 19-ամյա Հայկազ Բարսեղյանի մահվան գործով անցնող չորս ամբաստանյալների դատավճիռները։

Սպանության մեջ մեղադրվող Գնել Թևոսյանին, Վաչե Սահակյանին, Նորիկ Սահակյանին և Մովսես Ազարյանին մեղադրանք էր առաջադրվել  Քրեական օրենսգրքի 104-րդ հոդվածի 2-րդ մասի 5,-րդ, 7-րդ և 10-րդ կետերով՝   շմի խումբ անձանց կամ կազմակերպված խմբի կողմից խուլիգանական դրդումներով առանձին դաժանությամբ սպանություն։

Դատարանի վճռով, նրանց արարքները վերաորակեց Քրեական օրենսգրքի 104-րդ հոդվածի 2-րդ մասի 7-րդ կետով՝ մի խումբ անձանց կամ կազմակերպված խմբի կազմում սպանության։ Նրանք  դատապարտվեցին 15-ական տարի ազատազրկման։ Պատժի կրման սկիզբը  հաշվում են 2015 թ. հունվարի 29-ից։

Դատախազությունն ավելի խիստ պատիժներ էր պահանջել ամբաստանյալների համար. Գնել Թևոսյանի և Վաչե Սահակյանի համար` 20-ական, իսկ Նորիկ Սահակյանի ու Մովսես Ազարյանի համար` 18-ական տարի ազատազրկում։ Սպանվածի հայրը` Արկադի Բարսեղյանը պնդում էր, որ 4 ամբաստանյալներին էլ  պետք է ցմահ ազատազրկման դատապարտել։

Դատարանի վճռի հրապարակումից հետո լրագրողների հետ զրույցում Արկադի Բարսեղյանն ասաց, որ համաձայն չէ դատարանի որոշման հետ։

«Գոնե անձամբ մարդասպանը, ով սպանել է իմ որդուն, վկաների ցուցումունքով Գնել Թևոսյանն է եղել, իրեն 20 կամ 25 տարի, կամ ցմահ դատապարտեին։ Ո՞նց կարելի է սպանողին էլ 15 տարի դատապարտեն, ոտք բռնողին էլ։ Ուզում եմ իմանալ՝ Հայաստանում էլ ինչ ձևի հանցագործություն պետք է կատարվի դաժան, որ դատապարտվի ցմահ, կամ 20-25 տարի»,- ասաց նա։

Հայկազ Բարսեղյանի դաժան սպանությունը տեղի էր ունեցել հունվարի 29-ին. ըստ պաշտոնական տեղեկության, ժամը 06:35-ի սահմաններում զորամասի մարզահրապարակում հայտնաբերվել էր նույն զորամասի զինծառայող Հայկազ Արկադիի Բարսեղյանը՝ պտտաձողի վրա պարանով կախված վիճակում: