Ձեր վստահելի աղբյուրը

«Պատեազմի պայմաններում ուկրաինահայության մի զգալի մասը կամ ընդհանրապես Ուկրաինայից հեռացել է դեպի ԵՄ երկրներ, կամ գտնվում է երկրի արևմտյան տարածքներում»,-Կառավարության լրատվական թողարկմանը տված հարցազրույցում ասաց Սփյուռքի գործերով գլխավոր հանձնակատար Զարեհ Սինանյանը:

Նրա խոսքով՝ Խերսոնի և Մարիուպլի նման տարածքներում գործնակնում կապ չկա տեղի հայերի հետ, իսկ Գրամատոր և Խարկով քաղաքներում կապը վատ է, բայց Ուկրաինայի արևմուտքում ավելի հեշտ է կապ հաստատել:

Զարեհ Սինանյանի տեղեկացմամբ՝ Եվրամիության երկրներում տարբեր ռեժիմներ են գործում ուկրաինայից ժամանած տարբեր քաղաքացիություն ունեցող անձանց համար, մասնավորապես՝ Ուկրաինայի քաղաքացիների համար մինչև 1 տարի ժամկետով թույլատրվել է գտնվել ԵՄ տարածքում, իսկ այլ երկրների քաղաքացիներն ունեն ընդամենը 15 օր, որպեսզի մեկնեն իրենց երկրները:

«Պատեազմի սկսզբից մոտ 25 անցակետ է գործել դեպի Եվրամիության պետություններ, իսկ տեղերում հայերին դիմավորել են Լեհաստանի, Ռումինիայի, Մոլդովիայի, Սլովակիայի, Բուլղարիայի, Հունգարիայի հայկական համայնքները, ինչպես նաև ՀՀ դիվանագիտական ներկայացուցիչերը»,-հայտնեց Սփյուռքի գործերով հանձնակատարը և հավելեց. «Լեհաստանում և Մոլդովիայում, որտեղ հոսքը շատ մեծ էր, համայնքի և պետության հնարավորությունները մի պահ սպառվել էին և ՀՀ-ն ջանքեր է գրոծադրել, որպեսզի հավելյալ ռեսուրսներ հատկացվեն մեր դիվանագիտական անձնակազմին, որպեսզի նրանք կարողանան այդ մարդկային հոսքը պատշաճ ձևով դիմավորել և համապատասխան ծառայություններ մատուցել:

Նրա խոսքով՝ եղել է դեպք, երբ գրասենյակը տեղեկություն է ստացել, որ կա տարհանվել ցանկացողների կրիտիկական զանգված, բայց երբ դեսպանատներում պահանջել են, օգնելու համար գրանցվել, այդ թիվը չի հավաքվել:

«Կառավարությունը քաղաքականություն ունի, որ ցանկացած ՀՀ քաղաքացի և հայ, որը Ուկրաինայից հեռացել է և ֆինանսապես չի կարող Հայաստան գալ, թող աջակցության համար անպայման դիմի սփյուռքի գլխավոր հանձնակատարի գրասենյակին, մեր դիվանագիտական կառույցներին: Այդպիսի մի ցուցակ կար, որը պետությունն արդեն բավարարել է»,-տեղեկացրեց Զարեհ Սինանյանը:

Նա հայտնեց, որ պետությունը հնարավորինս դյուրին կդարձնի Ուկրաինայից մեր հայրենակիցների Հայաստան գալը, իսկ տեղերում համայքներն ու դեսպանատներն են օգնում՝ նրանց կարիքները հոգալով կամ երրորդ երկրներ մեկնելուն աջակցելով:

«Հայաստան ժամանող մեր ուկրաինահայ քաղաքացիների մոտ մի տհաճ երևույթ կար, որ, որպես փախստական  գալով, նրանք ստիպված էին, ինչպես պատվաստում չունեցող բոլոր մուտգ գործող անձինք, ՊՇՌ թեստ հանձնեին և դրա համար գումար էր գանձվել»,-տեղեկացրեց սփյուռքի գործերի հանձնակատարը և հավելեց. «Պետությունը չէր կարող դրան չարձագանքել և այս պահին ցանկացած քաղաքացի, որը գալիս է Ուկրաինայից, կարող է հայտնել այդ մասին և նրան կուղղորդեն համապատասխան ծառայության վայր ՊՇՌ թեստ հանձնելու, որտեղ իրենցից գումար չի գանձվի»:

Նա հայտարարեց, որ ուկրաինահայերը բոլոր երկրներում պետք է դիմեն հայկական դիվանագիտական ներկայացուցչություններ, որպեսզի ՀՀ-ն իմանա թե ինչ օգնության կարիք ունեն և աջակցի նրանց: