Ձեր վստահելի աղբյուրը

«Արցախը չի լինելու Ադրբեջանի կազմում, Հայաստանը թուրքական միջանցք չէ, մենք չենք հրաժարվելու մեր պահանջատիրությունից՝ Թուրքիայից, Նիկոլ Փաշինյանը չի ներկայացնում հայկական պետության և  հայերի շահերը»,- «5165» շարժման ակցիայի ժամանակ հայտարարեց ռազմական փորձագետ Կարեն Վրթանեսյանը, ով նախապես ասաց, որ ինչպես այս ակցիային, այնպես էլ երեկվա՝ ընդդիմադիր դաշինքների հրավիրած հանրահավաքին մասնակցել է բարձրաձայնելու հետևյալ սկզբունքը՝ «ես որպես ՀՀ քաղաքացի որևէ մեկին չեմ տվել մանդատ, ձայն, չեմ լիազորել իմ անունից ինչ-որ բան հանձնել ՝ լինի դա ՀՀ տարածք, որը նույնպես վտանգված է, լինի Արցախ»։

«Մենք  որևէ հանձնելու բան չունենք,  մենք որևէ մեկին որևէ բան հանձնելու չենք լիազորել։ Աշխարհի ոչ մի կետում Փաշինյանն իրավունք չունի խոսել իմ և իմ այլ համաքաղաքացիների  անունից։

Նիկոլ Փաշինյանը չի ներկայացնում Հայաստանի բնակչության մեծամասնությանը, նա չունի որևէ բան հանձնելու մանդատ։ Մենք սա պետք է բացատրենք թե մեր համաքաղաքացիներին, թե ողջ աշխարհին»,- ասաց Կ.Վրթանեսյանը։

Նա նշեց, որ մենք այսօր գործ ունենք օկուպացիոն վարչակարգի հետ։

«Մենք այսօր ապրում ենք օկուպացված երկրում. մի կողմից օկուպացրել են Սև լիճը, Արցախի տարածքները, մյուս կողմից օկուպացրել են Հայաստանի պետական համակարգը։ Սա շատ կարևոր է հասկանալ»,- ասաց փորձագետը։

Կարեն Վրթանեսյանի խոսքով, այս 4 տարվա ընթացքում հետևողական ձևով միշտ ամենավատ ընտրությունն է եղել հայերի համար. «Կարելի է  սխալվել 1, 2, 3 անգամ, հնարավոր չէ 4 տարի  անընդհատ սխալվել ու շարունակել պահպանել իշխանությունը»։