Ձեր վստահելի աղբյուրը

«Այս ամենը տեղի է ունենում քաղաքական արևմուտքի քավորությամբ: Մենք փոքր երկիր ենք և շատ կարևոր է, թե ինչ արտաքին ազդեցություններ կան մեր վրա, առաջին պլան է գալիս, թե մեծերից ում շահերն են համընկնում կամ հակասում քո շահերին»,- ասուլիսում ասաց քաղաքագետ Էդգար Էլբակյանը՝ անդրադառնալով Բրյուսելում կայացած Փաշինյան-Շառլ Միշել-Ալիև- հանդիպմանը:

Նա նշեց, որ այս հանդիպումը կազմակերպվեց Արևմուտքի կողմից, արվեց այն պահին, երբ Ռուսաստանը, մեղմ ասած, զբաղված է Ուկրաինայով:

«Արևմուտքը Մինսկի խմբի համանախագահության մեջ ունենալով քանակական առավելություն՝ 3 համանախագահներից 2–ն իրենք են, ինքն իր ձեռքով, նաև ադրբեջանցիների շահերին ընդառաջ գնալով, այդ ձևաչափը թաղեց: Որպես այդպիսին ԵԱՀԿ Մինսկի խմբի ձևաչափը ոչնչացված է, որն առաջին հերթին խփում է բուն հայկական շահերին և քաղաքական հարված է Ռուսաստանի թիկունքին»,-ասաց Է.Էլբակյանը:

Նա մեջբերեց հանդիպումից հետո արված հայտարարության առաջին նախադասությունը՝  կողմերը հանդիպեցին քննարկելու Հարավային Կովկասում  իրադրությունը և ԵՄ կապերի խորացումն այդ տարածաշրջանի հետ։

«Այսինքն իրենք նույնիսկ հայ-ադրբեջանական հարաբերությունների կարգավորման համար չեն հավաքվել։ Սա շատ պարզ է, քանի որ քաղաքական Արևմուտքը՝ այսինքն ԱՄՆ, Մեծ Բրիտանիան, ԵՄ-ն իրենք այս տարածաշրջանը միշտ դիտարկել են  ընդհանրական, որպես այս կամ այն չափով ռուսական ազդեցության գոտի, մանավանդ Հայաստանը, ամեն ինչ արել են, որ այդ երկրները ինչքանով կարող են հանել ռուսական ազդեցությունից»,- ասաց Է. Էլբակյանը։