Ձեր վստահելի աղբյուրը

Կառավարության հերթական նիստն այսօր ավանդական ժամը 11-ի փոխարեն տեղի կունենա 15:00-ին, ինչը, ամենայն հավանականությամբ, պայմանավորված է Բրյուսելից Նիկոլ Փաշինյանի վերադարձի ժամկետներով:

Այսօրվա հերթական նիստում  կառավարությունը նախատեսում է օրակարգում ընդգրկված 44 հարցերից չզեկուցվող 43 նախագծերի թվում բացասական եզրակացություն տալ ԱԺ «Հայաստան»  խմբակցության «2020 թվականի սեպտեմբերի 27-ին Ադրբեջանի Հանրապետության կողմից սանձազերծված ռազմական գործողությունների հանգամանքներն ուսումնասիրող հանձնաժողովի մասին» Հայաստանի Հանրապետության օրենքի և կից օրենքների նախագծերի փաթեթին:

Նոր մշակված օրենքի նախագծով նախատեսվում է սահմանել կարգավորումներ 2020 թվականի սեպտեմբերի 27-ին Ադրբեջանի կողմից ռազմական գործողությունների հանգամանքներն ուսումնասիրող հանձնաժողովի ստեղծման և գործունեության վերաբերյալ:

«Հարկ ենք համարում նշել, որ ներկայացված նախագիծն իր նպատակադրումներով և բովանդակային ընդգրկմամբ հակասում է Սահմանադրության 108-րդ հոդվածի 4-րդ մասին:

Միևնույն ժամանակ, հայտնում ենք, որ փաթեթում ներառված մյուս նախագծերին անդրադարձ չի կատարվել՝ հաշվի առնելով նախագծի վերաբերյալ սույն առաջարկության անխզելի կապը փաթեթում ներառված մյուս նախագծերի հետ:

Հիմք ընդունելով վերոգրյալը՝ առաջարկում ենք ձեռնպահ մնալ նախագծերի փաթեթի ընդունումից»,-ասված է գործադիրի՝ օրենքը մերժող եզրակացության մեջ: