Ձեր վստահելի աղբյուրը

«Սասնա ծռեր» համահայկական շարժումը տեսանյութ է հրապարակել, թե ինչպես են իրենց աջակից երիտասարդները պղծում Երևանի Ֆրանսիայի հրապարակում բարձրացված Արցախի Հանրապետության դրոշը:

«Մեկ պետություն` մեկ դրոշ. Արցախից եկած ՀՀ քաղաքացիները Օպերայում ներկել են Արցախը ՀՀ-ից բաժանող դրոշը», - «Սասնա ծռեր» շարժումը այսպես է վերնագրել տեսանյութը։

Դրոշը պղծելու դեպքին արձագանքել է «Քաղաքացիական գիտակցություն» ՀԿ-ի նախագահ Նարեկ Սամսոնյանը ՝ գրելով. «Ըստ տեղեկությունների սասնա ծռեր ահաբեկչական խմբավորման ներկայացուցիչները պղծել են՝ Ֆրանսիայի հրապարակում բարձրացված Արցախի Հանրապետության դրոշը: Կապիտուլյանտի ողորմածությամբ ազատության մեջ գտնվող ահաբեկիչների կողմից նման պղծություն անելը անակնկալ չէ:

Խնդրեմ ահաբեկիչների արածի հետևանքները և այս ամենն արվել է, ամենայն հավանականությամբ ադրբեջանական ոստիկանների լուռ հայացքների ներքո: Վստահ եմ ազգությամբ հայ ոստիկանները թույլ չէին տա պղծել Արցախի դրոշը: Էս ամեն ինչից նիկոլական պատվերի գարշահոտ է փչում»:

Ավելի ուշ Ազգային-ժողովրդավարական բևեռի խորհուրդը հայտարարություն է տարածել. «Քիչ առաջ Ազատության հրապարակում հերթապահող ԱԺ Բևեռի աջակիցներին են մոտեցել ՀՅԴ երկու անդամներ, որոնցից մեկը Իգոր Սարգսյան անուն ազգանունով և պահանջել են վերականգնել Ֆրանսիայի հրապարակում իրենց տեղադրած Արցախի դրոշը, որն այսօր առավոտյան Բևեռի աջակիցները ներկելու միջոցով վերածել են Հայաստանի դրոշի։ Նրանք սպառնացել են, որ հակառակ դեպքում կես ժամ հետո կվերադառնան և հաշվեհարդար կտեսնեն։

Տեղեկացնում ենք, որ եթե ոստիկանությունը չկանխի Բևեռի աջակիցների նկատմամբ նախատեսվող բռնությունը, ապա դրա դեմ ինքնապաշտպանության իրավունքի հիման վրա կլինի համարժեք պատասխան»։ 

ՀՀ ոստիկանության հասարակայնության հետ կապի և լրատվության վարչությունից Panorama.am-ին հայտնեց, որ ինչպես դրոշի պղծման, այնպես էլ ԱԺ Բևեռի աջակիցներին սպառնալու վերաբերյալ ահազանգեր չեն ստացել։ 

Հիշեցնենք, որ ապրիլի 5-ի Ազատության հրապարակում ընդդիմադիր դաշինքների հանրահավաքից հետո Արցախի Հանրապետության դրոշը բարձրացվել է Երևանի Ֆրանսիական հրապարակում։

«Սա իր մեջ ունի խորհուրդ, սա մեր պայքարի սկիզբն է։ Մենք պայքարում ենք հանուն Արցախի դրոշի, հանուն Եռագույնի, հանուն միասնության ու հանուն վաղվա հաղթանակի»,- հայտարարել էր ՀՅԴ ԳՄ ներկայացուցիչ, ընդդիմադիր գործիչ Իշխան Սաղաթելյանը։ 

Հիշեցնենք նաև, որ Արտաշատ քաղաքի հրապարակում քաղաքացիները ապրիլի 6-ին նույնպես բարձրացրել էին Արցախի դրոշը։ Երեկ ՀՅԴ Արարատի մարզային կոմիտեի ներկայացուցիչ Գերասիմ Վարդանյանը տեղեկացրել էր, որ գիշերն առևանգվել է Արտաշատում տեղադրված Արցախի դրոշը: