Ձեր վստահելի աղբյուրը

Արցախի Հանրապետության դրոշը, որն ապրիլի 5-ի Ազատության հրապարակում ընդդիմադիր դաշինքների հանրահավաքից հետո բարձրացվել էր Երևանի Ֆրանսիական հրապարակում, իսկ այսօր պղծվել «Սասնա ծռեր» համահայկական շարժման աջակիցների կողմից, փոխվեց։
ՀՅԴ-ական երիտասարդները հանեցին պղծված դրոշն ու տեղադրեցին նորը։

«Մենք՝ դաշնակցական  երիտասարդական միության ընկերներով եկանք այստեղ փոխելու բարձրացված դրոշը, նորից Ֆրանսիայի հրապարակում ծածանելու Արցախի դրոշը։ Ամենաուրախալի փաստն այն է, որ մեզանից ավելի վաղ այստեղ էին հասել մի խումբ քաղաքացիներ, ովքեր արդեն փոխում էին դրոշը, մի խումբ քաղաքացիներ էլ փողոցն էին անցնում, որպեսզի գային ու փոխեին դրոշը»,- լրագրողների հետ զրույցում ասաց ԱԺ «Հայաստան» խմբակցության պատգամավոր, ՀՅԴ անդամ Քրիստինե Վարդանյանը։

Ինչ վերաբերում է դրոշը պղծելու փաստին, նա նշեց. «Կարծում եմ՝ բոլորս հասկանում ենք, որ  այդ շարժման ձեռքով ներկա իշխող խմբակի պատասխանն էր ապրիլի 5-ի հանրահավաքին։ Փաստորեն, Արցախի դրոշ ծածանելուն իշխանությունը զավթած խմբակի պատասխանն այդ դրոշը պղծելն է»։

Նրա խոսքով, սա անհետևանք չպետք է մնա, ու նաև ոստիկանությունից պետք է ստանալ հարցի պատասխանը, թե ինչպես են քաղաքի կենտրոնում, որտեղ մշտապես հերթապահում են ոստիկաններ, մարդիկ անխոչընդոտ հասել այստեղ ու ներկել, պղծել դրոշը, այնուհետև հեռացել։

Ք. Վարդանյանը նաև հայտնեց, որ Արտաշատում տեղադրված Արցախի դրոշը, որն առևանգվել էր, նրանք, ովքեր հեռացրել էին կամ առնվազն պատկան մարմինները վերադարձնում են ճիշտ այն տեղը, որտեղից հեռացրել էին։

«Վստահ եմ՝ եթե իրենք չանեն դա,  արժանապատվություն ունեցող քաղաքացիները, ինչպես այստեղ են վերականգնում, անելու են Արտաշատում, Հայաստանի մյուս բոլոր բնակավայրերում, քանի որ սա մեր արժանապատվության խորհրդանիշն է։ Չի լինելու այդ անարժանապատիվ Հայաստանը, որին այդ խմբակն այդքան ձգտում է ու  դեպի ուր մեզ տանում են։ Արժանապատվությունը Հայաստանում հաղթելու է»,- ասաց ՀՅԴ-ական Ք. Վարդանյանը։

ՀՅԴ ԳՄ անդամ, «Հայաստան» խմբակցության պատգամավոր Գեղամ Մանուկյանը դժվարացավ գտնել բառեր բացատրելու այն, ինչ կատարվել է։

«Արցախի պետական դրոշի դեմ պայքարում է  Ադրբեջանը, Արցախի պետական դրոշի դեմ պայքարում է  Թուրքիան։ Միայն այսքանը կարող եմ ասել, մեր հայրենակիցները  սրանից արդեն ինքնին հետևություն պետք է անեն»,- նշեց նա։

Գ.Մանուկյանն ասաց, որ պետք է հիշել՝ այս դրոշի տակ հազարավոր արցախցիներ պատերազմել են  առաջին պատերազմից սկսյալ, վերջին 44-օրյա պատերազմում արցախցի շուրջ 1000 նահատակ հայրենի հողին են հանձնվել իրենց դագաղի վրա կրելով Արցախի դրոշը։

«Ուղղակի թրքություն ասեմ, ինչ ասեմ, այն արարքը, որ կատարվել է»,- ասաց ընդդիմադիր քաղաքական գործիչը։

Ըստ նրա, նույն ձեռագիրն է նաև Արտաշատում, որտեղից հեռացվել էր դրոշը։

«Ձեռագիրը նույնն է։ Իշխանության կոկորդում է մնալ Արցախի դրոշն ու տեղադրումը, հիմա տարբեր կամակատարների միջոցով փորձում են թուրքական, ադրբեջանական պատվերը կատարել»,- ասաց Գեղամ Մանուկյանը։

Նա հայտնեց, որ «Հայաստան» խմբակցության պատգամավորները խոսել են Արցախի գլխավոր դատախազի հետ, սա Արցախի Հանրապետության պետական սիվոլի նկատմամբ ոտնձգություն է։

Հիշեցնենք, որ ապրիլի 5-ի Ազատության հրապարակում ընդդիմադիր դաշինքների հանրահավաքից հետո Արցախի Հանրապետության դրոշը բարձրացվել է Երևանի Ֆրանսիական հրապարակում։
«Սա իր մեջ ունի խորհուրդ, սա մեր պայքարի սկիզբն է։ Մենք պայքարում ենք հանուն Արցախի դրոշի, հանուն Եռագույնի, հանուն միասնության ու հանուն վաղվա հաղթանակի»,- հայտարարել էր ՀՅԴ ԳՄ ներկայացուցիչ, ընդդիմադիր գործիչ Իշխան Սաղաթելյանը։

Այսօր առավոտյան Ազգային-ժողովրդավարական բևեռի աջակիցները ներկելու միջոցով Արցախի դրոշը վերածել էին Հայաստանի դրոշի։ «Սասնա ծռեր» համահայկական շարժումը տեսանյութ էր հրապարակել, թե ինչպես են իրենց աջակից երիտասարդները ներկում  Ֆրանսիայի հրապարակում բարձրացված Արցախի Հանրապետության դրոշը, այն վերնագրել էր. «Մեկ պետություն` մեկ դրոշ. Արցախից եկած ՀՀ քաղաքացիները Օպերայում ներկել են Արցախը ՀՀ-ից բաժանող դրոշը»։

Հիշեցնենք նաև, որ Արտաշատ քաղաքի հրապարակում քաղաքացիները ապրիլի 6-ին նույնպես բարձրացրել էին Արցախի դրոշը։ Երեկ ՀՅԴ Արարատի մարզային կոմիտեի ներկայացուցիչ Գերասիմ Վարդանյանը տեղեկացրել էր, որ գիշերն առևանգվել է Արտաշատում տեղադրված Արցախի դրոշը: