Ձեր վստահելի աղբյուրը

«Արցախի Հանրապետության, Արցախի Հանրապետության ժողովրդի ինքնորոշման և անվտանգության վերաբերյալ չկա որևէ հիշատակում Բրյուսելում կայացած եռակողմ հանդիպման արդյունքում Շառլ Միշելի հրապարակած հայտարարության մեջ»,- «Տարբեր կարծիքներ Աննա Դանիելյանի հետ» հաղորդման ժամանակ ասել է «Հայրենիք» կուսակցության մամուլի քարտուղար Սոս Հակոբյանը:

Նրա խոսքով, կարծեք թե չի եղել Արցախյան հակամարտություն, դրա վերաբերյալ խնդիր:

«Եկեք վերհիշենք, որ տեղի ունեցած պատերազմը, երեսուն տարվա բանակցությունները,  որոնք Լեռնային Ղարաբաղի խնդրի մասին էր։ Մենք հիմա ինչի՞ շուրջ ենք բանակցում, ինչի՞ համար ենք խաղաղություն կնքում, եթե չենք անդրադառնում հիմնական խնդրին, չենք անում քայլեր դրա արդարացի լուծման ուղղությամբ»,- ասել է Ս. Հակոբյանը։

Ըստ «Հայրենիք» կուսակցության մամուլի քարտուղարի, կարծեք թե փորձ է արվում ստեղծել մի նոր ձևաչափ, այսպես կոչված խաղաղության պայմանագրի ստորագրման նպատակով կամ այդ գործընթացն առաջ տանելու համար։

«Հայաստանի իշխանությունը որոշ ժամանակ առաջ հայտարարեց, որ դիմել է ԵԱՀԿ Մինսկի խմբին որպեսզի այս բանակցությունների միջնորդությունն իր հովանու ներքո անցկացնի, որը կբերի պայմանագրի ստորագրման։ Ի սկզբանե դա շատ վատ միտք էր  այն իմաստով, որ փորձ է արվում ղարաբաղյան  հակամարտության այս 30 տարվա ընթացքում ձեռք բերված որոշակի մեխանիզմներ, տարրեր, տրամաբանություն, սկզբունքներ, այդ ամեն ինչը հանել և այդ վակումը լցնել անորոշ, լղոզված խաղաղության պայմանագրով Հայաստանի և Ադրբեջանի միջև։ Բայց սրանից էլ է նահանջ կատարվում և, կարծես, փորձ է արվում դա տեղափոխել Եվրոպական միության միջնորդության դաշտ։

Ո՞րն է հատկապես դրա ռիսկը։ Խաղաղության բանակցությունների ԵՄ ձևաչափը կարող է հանգեցնել ՌԴ-ին գործընթացներից դուրս մեղելուն. Եվրոպական Միության միջնորդության շրջանակներում իրականացվող բանակցություններում ԱՄՆ դիրքորոշումներն ավելի հեշտ է համահարթեցնել ԵՄ հետ՝ հաշվի առնելով իրենց դաշնակցային հարաբերությունները: 

Հայաստանի և Արցախի համար անվտանգային առումով շատ մեծ նշանակություն ունեցող երկրի Ռուսատանի շահերն ու մասնակցությունը ԵՄ ձևաչափով տեղ չունեն, սա կարող է հանգեցնել կամ գոնե դրան փորձին, որ Ռուսաստանը դուրս մղվի գործընթացից, ինչը հղի է շատ լուրջ ռիսկերով թե տարածաշրջանի, թե Հայաստանի համար»,- նշել է նա։

Ցավոք սրտի, Ս.Հակոբյանի խոսքով, մեր երկիրը դառնում է դրան մասնակից և այս աշխարհաքաղաքական մրցակցության շրջանակներում ուղղակի դառնում է  գործիք այս կամ այն կողմի ձեռքում՝ ստեղծելով մեծ անվտանգային խնդիրներ Հայաստանի ու Արցախի համար։