Ձեր վստահելի աղբյուրը

«Վիճակախաղերում կամ շահումով խաղերում ներգրավվածների վիճակագրությունը բավական մտահոգիչ է՝ մասնակիցների թիվը 2018 թ.-ի 18.300-ի դիմաց 2020 թ.-ին հասել է 44082-ի, սա  մեծ հաշվով սարսափելի ցուցանիշ է»,- ԱԺ Ֆինանսավարկային և բյուջետային հարցերի մշտական հանձնաժողովի նիստում ասաց «Հայաստան» խմբակցության քարտուղար Արծվիկ Մինասյանը:

Հանձնաժողովը քննարկեց «Շահումով խաղերի, ինտերնետ շահումով խաղերի և խաղատների մասին» օրենքում և հարակից օրենքների փաթեթում առաջարկվող փոփոխությունների նախագիծը, որով արգելվում է կանխիկ ձևով և էլեկտրոնային դրամապանակներից լիցքավորել բուքմեյքերական հաշիվները: 

Արծվիկ Մինասյանը կառավարության ներկայացուցչին հայտնեց, որ խաղային բիզնեսում շրջանառվող 3.9 տրիլիոն դրամը համախառն  ներքին արդյունքի 1/2-ն է և եթե դրանք ներառվեն պետության համախառն ներքին արդյունքի մեջ, ապա մուլտիպլիկատիվ էֆեկտը շատ մեծ կլինի:

Ընդդիմադիր պատգամավորը հետաքրքրվեց, թե ինչ մեխանիզմով է հնարավոր այդ գումարը մղել տնտեսության իրական սեկտոր, այլ ոչ թե թողնել վիճակախաղերի և շահումով խաղերի դաշտում՝ նկատելով, որ եթե նախագիծն ընդունվի և շահումով խաղերին մասնակցողների նույնականացումն ավելի արդյունավետ լինի, հնարավոր է նրանց հարկել և պետական բյուջե ավելի շատ եկամուտներ գեներացնել:

«2021 թ. «Շահութահարկի մասին» օրենքն է ուժի մեջ մտել, բայց մեծ ակնկալիքներ չունենք այս ոլորտից, դրա համար էլ Ֆինանսների նախարարությունը մտածում է, թե ինչ հարկման մեխանիզմ դնենք, որ այն համադրելի լինի ֆինանսական հոսքերին»,- հայտնեց փոխնախարարը:

Արծվիկ Մինայանը նկատեց, որ ներկայում շահած քաղաքացին չի հարկվում և իր բարձրացրած խնդիրը դա է:

Արմեն Հայրապետյանը պատասխանեց, որ շահումը հարկելը նշանակում է պայմաններ ստեղծել, որ խաղացող մարդը խաղից դուրս չգա, քանի որ նրա շահումի 50%-ը հարկվում է և նա այդ դեպքում չի ուզի շահումով խաղի համակարգից դուրս գա:

«Մեր նպատակն է, որ նա շուտ դուրս գա այդ համակարգից, ինչքան երկար մնա այնտեղ, այնքան շատ կպարտվի»,- ասաց փոխնախարարը և բացատրեց՝ նպատակը պետք է լինի այն, որ քաղաքացին գիտակցի՝ խաղերի ոլորտ է մտնում պարտվելու:

Արծվիկ Մինասյանն ընդգծեց, որ երբ բուքմեյքերական ընկերությունը խաղացողին է փոխանցում վերջանական շահած գումարը, այդ ժամանակ նոր պետք է հարկվի:

Կառավարության ներկայացուցիչը կրկին պնդեց, որ առաջարկը միանշանակ չի կարող երաշխավորել արդյունքներ:

Հանձնաժողովը կողմ քվեարկեց և նախագիծն ընդգրկվեց ապրիլի 12-ի ԱԺ նիստերի օրակարգ: